Job 37

1"Huan quema nimoilhu'ia tlen ya ni, nechmajmat'ia huan quichihua ma huihuipica noyolo. 2Xijtlacaquilica itos Toteco Dios tlen eltoc queja tlatomonilotl. 3Itos ajsi campa hueli ipan elhuicactli, huan itlapetlanilo ajsi ica chicahualistli campa hueli ipan tlaltepactli. 4Teipa huala nopa tlatomonilotl tlen technextil'ia Toteco Dios ihuextilis. Quema yajaya camati, quichihua ica nochi ichicahualis. 5Nel'ia yejyectzi tijcaquij itos quema tlatomoni. Yajaya quichihua huejhueyi tlamantli tlen tojuanti ax tijmachil'iaj. 6"Yajaya quinahuat'ia nopa sitlal setl ma huetzi ipan tlaltepactli. Quiilhu'ia atl tlen huetzi chicahuac para ma tlaahuetzis cuali. 7Nochi tlacame quicahuaj inintequi huan san mocahuaj ipan ininchaj para quiixmatise ihueyi chicahualis. 8Tlapiyalime tlen nemij ipan cuatitlamitl motlat'iaj campa tetini huan campa inintepasol. 9Huala atl chicahuac tlen elhuicac huan nopa ajacatl quihualica se tlasesecayotl tlen chicahuac. 10Iijiyo Toteco Dios quititlani setl. Quichihua miyac atl ipan hueyi atl ma mochihua setl. 11Yajaya quitemit'ia nochi mixtli ica atl huan tlen nopa mixtli quititlani nopa tlatlatzini tlapetlanilotl campa hueli. 12Toteco Dios quimajcahua nopa fiero tlapetlanilotl ica ima. Huan quinhualtitlani ipan nochi ni tlaltepactli para ma quichihuaca tlen yajaya quinequi. 13Quemantzi Toteco Dios quititlani nopa miyac atl para ica quintlatzacuiltis tlacame, o huelis para ica quintiochihuas, o huelis san para quiatequilis itlaltepac. 14"Job, xijtlacaquili ni. Xijchiya se tlalochtli huan ximoyolilhui tlen nopa huejhueyi chicahualis nescayotl tlen Toteco Dios quichihua. 15¿Tijmati quejatza Toteco Dios quinahuat'ia nochi atl ma huetzi chicahuac huan quejatza quichihua ma tlapetlani tlen mixtli? 16¿Tijmati quejatza ne mixtli eltoc san ajacatipa huan ax huetzi hasta tlalchi? Tojuanti tijsentlachil'iaj ica nochi itlalnamiquilis. 17¿Tijmati ta para tlen tipatzmiqui ica tlajcotona quema tlailpitza nopa ajacatl tlen huala ica tlani? 18¿Ta tijpalehui Toteco para quipatlahuas elhuicactli queja se hueyi tescatl tlen tlahu'ia? 19"Ta tlen tiquijtohua tijmati nochi, xitechnextili quejatza timonechcahuise ica Toteco Dios, pampa tojuanti ax tijmatij. Eltoc queja tiitztoque ipan tzintlayohuilotl. 20¿Huelis niquilhuis para na nijnequi nijcamahuis? Pero ¿ajqueya quinequisqu'ia quicamahuis se queja ya tlen huelis quitolos noja yoltoc? 21Quema nopa ajacatl quiquixt'ia nopa mixtli, tojuanti niyon ax tihuelij tijtlachilitij tonati pampa tlahuel tlahuijtoc. 22Toteco Dios huala tlen norte huan yahualtic quipixtoc itlatlanex tlen tlahuel tlahu'ia. Toteco huala ica nochi ihuextilis tlen tlahuel temajmat'ia. 23Ax hueli tijmachil'iaj iyajatil Toteco Tlen Quipiya Nochi Chicahualistli, pero yajaya nel'ia xitlahuac huan tlahuel quipiya tetili. Techtlasojtla, huan yeca ax techtzontlamilt'ia. 24Yeca nochi tlacame campa hueli, quiimacasij. Yajaya ax quipatiita niyon se tlen moilhu'ia para quipiya miyac tlalnamiquistli."

will be added

X\