Job 35

1Eli'u quisenhuiquili camati huan quiilhui Job: 2"¿Huelis timoilhu'ia xitlahuac quema tiquijtohua para tiitztoc cuali iixpa Toteco Dios? 3Huan teipa tiquijtohua: '¿Para tlen ipati intla nitlajtlacolchihua?' 4"Na nimitznanquilis ta huan nochi mohuampoyohua huan nimechilhuis para tlen ipati. 5Xijtlachili elhuicactli huan mixtli huan timomacas cuenta para tlahuel m'as huejcapa que ta. 6Intla titlajtlacolchihuas, ¿tlaque tijchihuilis Toteco? Yonque titlajtlacolchihuasqu'ia ajachica, motlajtlacol ax quitlanahuisqu'ia Toteco Dios. 7Huan intla timonejnemiltis xitlahuac, yajaya ax tleno quitlani mopampa ta. ¿Tlaque regalo hueli tijmacas ta? 8Motlajtlacolhua quintlanahui sequinoc tlacame queja ta, huan quema tijchihua tlen cuali, elis senquistoc tlacame tlen tiquinpalehu'ia. 9"Teicneltzitzi tzajtzij quema tlaijiyohu'iaj ininmaco tlacame tlen quipiyaj m'as chicahualistli. Quitemohuaj se acajya ma quinmanahui. 10Pero ax quitzajtzil'iaj Toteco Dios huan quiijtohuaj: '¿Canque itztoc Toteco Dios tlen techchijchijqui huan tlen temaca paquilistli ipan tlaohuijcayotl? 11¿Canque itztoc yajaya tlen techchihuil'ia achi m'as ma tijpiyaca tlalnamiquistli que tlapiyalime huan totome?' 12"Huan quemantzi tlacame quitzajtzil'iaj Toteco Dios huan yajaya ax quinnanquil'ia, pampa inijuanti tlahuel mohueyimatij o quichihuaj tlen fiero. 13Pero ax quinamiqui intla tiquijtose para Toteco Tlen Quipiya Nochi Chicahualistli ax quintlacaquil'ia huan ax quinchihuil'ia cuenta tlen ajachica quitzajtzil'iaj. 14Huan ax neli nojquiya intla tiquijtose para Toteco Dios ax quiita nochi tlen pano. Toteco quimati tlaque tijchijtoc huan mitzchihuilis tlen xitlahuac intla timochiyas ipan ya. 15¿Ticualani ica ya san pampa ax mitznanquil'ia nimantzi huan ax quincualancaita nochi fiero tlacame? 16Job, ticamatitoc queja se tlen huihuitic. Ticamatitoc miyac pero ax tijmati tlen tiquijtohua."

will be added

X\