1 Teipa Eli'u sampa camatqui huan quiijto: 2 "Xinechtlacaquilica intlacame tlen intlalnamiquij huan tlen intlaixmatilme. 3 Hueli tijtlapejpenise tlaque cuali para tijtlacaquilise ica tonacas, queja ica tocamac hueli tijtlapejpenise tlaque tlacualistli eltoc ajhuiyac. 4 Huan queja nopa nojquiya monequi tijtlapejpenise tlen ojtli eltoc xitlahuac para ipan tinejnemise. Ma timomachtica san sejco tlen eltoc cuali. 5 Pampa Job quiijtojtoc para itztoc xitlahuac, pero Toteco Dios ax quitlajtolsencahua queja xitlahuac. 6 Quiijtohua para yonque ax tleno quichijtoc, Toteco quitocajt'ia se istlacatiquetl. Quiijtohua para yonque ax tlajtlacolchijtoc, Toteco quitlatzacuilt'ia nelchicahuac. 7 "¿Canque itztoc seyoc tlacatl tlen mohueyimati queja Job? San quinequi quiijtos tlen ax tleno ipati. 8 Yajaya nemi ica tlacame tlen quichihuaj tlen fiero. Quitemohuaj ax cuajcualme para ihuampoyohua. 9 Job quiijtojtoc para san tlapic para se tlacatl quichihuas campeca para quipaquilismacas Toteco. 10 "Huajca imojuanti tlen intlalnamiquij, xinechtlacaquilica. Nochi inquimatij para Toteco Tlen Quipiya Nochi Chicahualistli ax tlajtlacolchihua, niyon ax tlaixpano. 11 Yajaya quintlaxtlahu'ia nochi tlacame queja quinamiqui ica tlen ax cuali quichijtoque huan queja nopa ojtli tlen ipan nemi. 12 Huan tijmatij melahuac para Toteco ax quema quichihua tlen ax cuali. Nochipa Toteco Tlen Quipiya Nochi Chicahualistli tetlajtolsencahuas queja quinamiqui. 13 Axaca quimacac Toteco tequihuejcayotl ica ni tlaltepactli pampa elqui ya tlen quisencajqui ni tlaltepactli. 14 Huan intla Toteco Dios quiquixtilisqu'ia Itonaltzi ipan tlaltepactli huan ayoc techmacasqu'ia iijiyo para ma titlaiyotilanaca, 15 nochi tlacame miquisqu'iaj huan mocuepasqu'iaj tlaltejpoctli. 16 "Huajca xinechtlacaquili huan xijchihua campeca para tijmachilis tlen nimitzilhuis. 17 ¿Huelis tlanahuatis Toteco intla yajaya ax quinequi quichihuas tlen xitlahuac? ¿Huelis ta tijtelchihuas nopa Tetlajtolsencajquetl Tlen Quipiya Nochi Chicahualistli? 18 Yajaya Toteco Dios tlen quinilhu'ia nopa tlanahuatiani huan tlayacanani: 'Fiero imonemilis huan ax inquichihuaj tlen xitlahuac.' 19 Yajaya ax quinchicoicnel'ia tlacame. San se quinchihuil'ia tlen huejhueyi, tlen tlapijpiyani huan tlen teicneltzitzi pampa yajaya quinchijqui nochi tlacame. 20 Nochi tlacame san itztoque para se tlalochtli huan nimantzi miquij. Tlajco yohual huihuipicaj huan tlaloch miquij. Nojquiya tlaloch miquij tlacame tlen quipiyaj chicahualistli yonque axaca quitlalijtoc ima. 21 "Toteco Dios ica miyac cuidado quitlachil'ia nochi tlen tlacame quichihuaj ipan ni tlaltepactli. Yajaya quinita nochi. 22 Ax onca se tzintlayohuilotl yonque tlen m'as yayahuic campa tlacame tlen quichihuaj tlen ax cuali hueli motlatise iixpa Toteco Dios. 23 Ax itequi se tlacatl para quiijtos quema yajaya yas iixpa Toteco para yajaya ma quitlajtolsencahuas. 24 Huan Toteco Dios axaca monequi quitlajtlanis caquihuili para quitzontlamiltis se tequihuejquetl huan quitlalis seyoc ipan ilugar. 25 Yajaya quitlachil'ia nochi tlen quichihuaj huan ipan san se yohual quintepexihu'ia huan quintzontlamilt'ia. 26 Quemantzi quintzontlamilt'ia fiero tlacame tonaya iniixpa nochi tlacame, 27 pampa quitlahuelcajtoque Toteco Dios huan ayoc nejnemij ipan iojhui. 28 Huelis inijuanti quintlaijiyohuiltijtoque tlen teicneltzitzi, pero tlen teicneltzitzi quitzajtzilijque Toteco Dios, huan yajaya quincajqui. Toteco quipact'ia quintlacaquilis tlen tlaijiyohu'iaj. 29 Pero intla Toteco ax quinequi camatis, ¿ajqueya huelisqu'ia quiteilhuis ya? ¿Intla yajaya moixtlatis, ajqueya huelis quipantis? Yajaya itztoc tlen quitzacuil'ia se fiero tlacatl, 30 para ma ax tlanahuatis ipan se tlali huan ma ax hueli quitlali se tlaquetztli para itlacajhua. 31 "¿Para tlen se tlacatl queja ta ax quiilhu'ia Toteco Dios: 'Nitlajtlacolchijtoc, pero ayoc nijchihuas'? 32 O quiilhuis: 'Xinechnextili nopa tlaixpanoli tlen nijchijtoc pampa ax nijmati. Intla nitlajtlacolchijtoc, xinechilhui quejatza huan ayoc nijchihuas.' 33 "¿Timoilhu'ia para monequi Toteco Dios ma mitztlaxtlahuis queja ta mitzpact'ia quema noja ax tijnequi timoyolcuepas tlen motlajtlacolhua? Ta huan ax na tlen monequi tijtlapejpenis tlen tijchihuas huan monequi timoyolcuepas. Huajca xinechilhui tlaque timoilhu'ia. 34 Tlacame tlen tlalnamiquij huan tlacame tlen miyac quimachil'iaj nechilhuise, 35 para ta tiJob, ax tijmati tlen tiquijtohua pampa ax titlamachil'ia. 36 Quinamiquiyaya tijselis se tlatzacuiltili tlen hueyi pampa ticamatqui tlen Toteco Dios queja quichihuasqu'ia se fiero tlacatl. 37 Huajca ama ax san tijhuica tlajtlacoli ica tlen tijchijqui achtohuiya, pero nojquiya timohueyimajtoc huan tijtlaijilhuijtoc Toteco Dios ica miyac tlamantli."
