1 Nopa eyi tlacame ayoc quinanquilijque Job pampa Job noja quinilhuiyaya para ax quihuica tlajtlacoli. 2 Huajca Eli'u cualanqui ica Job. Eli'u elqui icone Baraquel huan iixhui Buz; huan hualayaya ipan ihueyi familia Ram. Cualanqui pampa Job ax quinequiyaya quiijtos para melahuac tlajtlacolchijtoya. Niyon ax quiijtohuayaya para quinamiqui nopa tlatzacuiltili tlen Toteco quititlanilijtoya. 3 Huan nojquiya Eli'u cualanqui ica nopa eyi ihuampoyohua Job pampa ax quimatiyayaj quejatza quinanquilise huan san achi m'as quiteilhuiyayaj. 4 Eli'u quinchixtoya nopa eyi para tlamise camatij pampa itztoyaj m'as huehuentzitzi que ya. 5 Pero quema quinitac para inijuanti ayoc huelque quinanquil'iaj, camatqui ica cualantli, 6 huan quinilhui: "Na noja nitelpocatl huan imojuanti ya inhuehuentzitzi. Yeca nimochixtoc pampa ax nimotemacayaya niquijtos tlen nimoilhuiyaya. 7 Nochi quiijtohuaj para tlen huehuentzitzi itztoque m'as tlalnamiquij, yeca ma camatica achtohui. 8 Pero tlacame itztoque tlalnamiquini pampa quipiyaj itonaltzi Toteco ipan ininyolo. Quipiyaj iijiyo Toteco Tlen Quipiya Nochi Chicahualistli. 9 Ax itztoque tlalnamiquini san pampa quipiyaj miyac xihuitl. Huan tlen huehuentzitzi ax nochipa quimachil'iaj tlen xitlahuac. 10 Huajca nimechilhu'ia, xinechtlacaquilica se tlalochtli huan xinechcahuilica ma niquijtos tlen nimoilhuijtoc. 11 "Nimochixtoc huan ica miyac cuidado nijtlacaquilijtoc nochi imotlajtol hasta quema pejqui incamatij. 12 Huan ipan nochi tlen nijtlacaquilijtoc, niyon se tlen imojuanti ax inquiixcoilhuijque Job para melahuac yajaya se tlajtlacolchijquetl. Niyon axaca quinanquilijtoc itlatzintoquil queja quinamiqui. 13 Huan amo xinechilhuica para Job itztoc m'as tlalnamictoc que imojuanti o para san Toteco huelis quinextilis se tlajtlacolchijca tlacatl para tlajtlacolchijtoc. 14 Intla Job monajnanquilijtosqu'ia nohuaya, ax na nijnanquilisqu'ia queja inquinanquilijtoque. 15 "Job, ni eyi mohuampoyohua momajmatijtoque huan ayoc quimatij tlaque quiijtose. 16 Na niquinchixtoc ma camatica, pero inijuanti ayoc molin'iaj huan ayoc mitznanquil'iaj. 17 Huajca na nojquiya niquijtos tlen nimoilhuijtoc, 18 pampa nijpiya miyac tlajtoli tlen monequi niquijtos, huan notonaltzi nechchihualt'ia ma nicamati. 19 Niitztoc queja se yancuic cuetlaxtli tlen temitoc ica xocomeca atl huan ya quinequi tzayanis. Huan queja nopa nojquiya na nitemitoc ica tlajtoli hasta tzayanisnequi noyolo. 20 Monequi nicamatis para nicaxanis se quentzi. Huajca xinechcahuilica ma nicamati. 21 Axaca nijchicoicnelis, niyon ta, niyon ne eyi. Niyon axaca nijyejyectlalis ica notlajtol. 22 Pampa intla nijhueyimati se huan seyoc axtle, Toteco tlen nechchijqui nechchihuasqu'ia nihuetzis nimictoc.
