Job 31

1"Na nijchijqui se tlajtoli ica noixtiyol para ax nijtlachilis se ichpocatl para niquixtocas huan nijchihuas miyac tlamantli ihuaya. 2Pampa na nijmati tlen temaca Toteco Tlen Quipiya Nochi Chicahualistli. Yajaya tlen itztoc nepa huejcapa quintiochihua tlacame tlen nejnemij xitlahuac. 3Huan quintlatzacuilt'ia tlen quichihuaj tlen fiero. 4Huan Toteco quiita nochi tlen nijchihua huan quejatza nimonejnemilt'ia. 5"Na ax niistlacatitoc, niyon ax nitlacajcayajtoc. 6Ma Toteco nechtlajtolsencahuas intla ax melahuac. Yajaya quimati cuali para melahuac ax nijchijtoc tlen ax cuali. 7Ax nimocuapolojtoc huan ax nijcajtejtoc iojhui Toteco. Ax nitlajtlacolchijqui ipan noyolo ipampa tlen niquitac. Huan intla nijhuica tlajtlacoli ipan ni tlamantli o ipan sequinoc tlamantli, 8ma quipixcaca sequinoc tlen nijtoctoc huan tlen ya quipiya itlajca. Huan sequinoc ma quihuihuitlaca nochi tlen yancuic nijtoctoc. 9"Intla se sihuatl nechyoltilantoc ma nitlajtlacolchihua, o intla nijnequiyaya niitztos ihuaya isihua nocalnechca, 10huajca ma nimiqui huan nosihua ma yahui sejcoyoc huan ma mocuili seyoc tlacatl. 11Pampa se hueyi tlajtlacoli para tiquixtocas seyoc sihuatl. Intla se tlacatl quichihuas nopa tlaixpanoli, quinamiqui quitlatzacuiltise tetlajtolsencahuani. 12Tlaixtoquilistli eltoc queja se tlitl tlen nechtlamitlatisqu'ia huan nechmajcahuasqu'ia hasta mictla. Nojquiya quitlamiltisqu'ia nochi tlen nijpiya. 13"Intla ax niquinchihuilijtosqu'ia tlen xitlahuac ica nochi notlatequipanojcahua huan ax niquintlacaquilijtosqu'ia, 14¿quejatza nimoixnextisqu'ia iixpa Toteco? ¿Quejatza nijnanquilisqu'ia quema nechtlajtlanisqu'ia cuenta? 15Pampa yajaya Toteco Dios tlen nechchijchijqui na huan yajaya nojquiya quichijchijqui notlatequipanojca. Nochi tiome yajaya techchijchijqui. 16"Ax quema niquinchihuili tlen fiero nopa teicneltzitzi, niyon ax quema niquincuesolmacac cahual sihuame. 17Na nochipa niquintlamacac tlen icnotzitzi. Ax quema niitztoya niitzcuinti. 18Hasta quema nieliyaya nitelpocatl, na niquinmocuitlahui icnotzitzi ipan nochaj huan niquinitayaya queja elisqu'ia noconehua. Huan niquinconsejomacac cahual sihuame. 19Nijyoyonti tlen secmiquiyayaj huan niquinmacayaya yoyomitl, 20o tlaquemitl tlen iniijhuiyo noborregojhua para ica ma mopiquica. Huan inijuanti nechtlascamatiyayaj. 21Ax quema nijcocojtoc se tlen icnotzi san pampa nimoilhui axaca nechtlajtlanis cuenta. 22Intla nijchijtoc se tlen nochi ni tlamantli, ma postequi noajcol campa tlatzquitoc huan ma huetzi tlalchi noma. 23Pero na tlahuel niquimacasiyaya itlatzacuiltil Toteco. Intla yajaya cualanisqu'ia ica na ica nochi ichicahualis, ¿tlaque nijchihuasqu'ia? 24"Ax nimotemachijtoc ipan notomi, niyon ax niquixtocatoc oro. 25Ax quema nimopaquilismacayaya ipan notomi o nimoilhuiyaya para noja m'as nimoricojchihuasqu'ia. 26Ax nijtlachilijtoc ne tonati tlen tlahu'ia ipan elhuicac o nopa metztli tlen yahui ipan iojhui yejyectzi, 27huan ixtacatzi niquinhueyichijqui ipan noyolo. Ax quema niquintitlanili tlatzoponijcayotl ica noma ica huejca. 28Yajaya nopa elisqu'ia se hueyi tlajtlacoli huan quinamiqui quiselis tlatzacuiltili. Ax tleno tlen ni tlamantli nijchijtoc. Ax niquixpanotoc Toteco tlen itztoc elhuicac. 29"Na ax nipajqui quema nohuampo mopantiyaya ipan tlaijiyohuilistli huan tlaohuijcayotl. 30Ax quema nijtelchijqui se tlacatl niyon ax nimomacuepqui ica nocualancaitacahua. 31Niyon se notlatequipanojca ax nijcajqui ma quipano mayantli. 32Nochipa niquincahuili sejcoyoc ehuani ma cochica nocalijtic. Nochipa nijtlapohuayaya nopuerta para tlen hueli nejnenquetl. 33Ax nijchijtoc campeca para nijtlatis notlajtlacolhua ixtacatzi queja quichijqui Ad'an. 34Ax quema niquinimacasqui tlacame huan nimotlatiyaya calijtic. Ax quema niquinimacasqui nochaj ehuani tlen nechcualancaitaj. Nochipa nimocuatotoni para nijpalehuis se nohuampo. 35"Cuali elisqu'ia para se acajya nechtlacaquilisqu'ia huan quimachilisqu'ia tlaque nijmati ipan noyolo. Na nijnequi nimomanahuis ipan ni tlamantli huan nijtlalis nofirma ipan notlajtol. Nijnequisqu'ia para Toteco Tlen Quipiya Nochi Chicahualistli ma nechnextili intla melahuac nimocuapolojtoc. Yajaya ma quiijto intla melahuac tlen quiijtohuaj nocualancaitacahua. Ma quiijcuiloca tlen ica nechteilhu'ia yaja tlen nechteilhu'ia. 36Nechpactisqu'ia para san nijmatis tlen ica nechtelhu'ia. Nijpatiitasqu'ia queja se yejyectzi corona pampa tlahuel nijnequi nijmatis. 37Na niquilhuisqu'ia notlatelchijca nochi tlen nijchijtoc huan para tlen nijchijqui. Huan iixpa ya nijchihuasqu'ia campeca para nimomanahuis queja nimonextiyaya iixpa se tequihuejquetl. 38"Quinamiqui ma nechtlatzacuilti intla nomilhua nechteilhuisqu'iaj huan elisqu'ia ipan cuesoli, 39huan quiijtosqu'ia para niquichtequilijtoc itlajca o niquinmictijtosqu'ia nopa tlacame tlen iniaxca nopa tlali huan tlen nechtlanejtiyaya. 40Intla queja nopa nijchijtoc ma temaca huitztli notlal huan ax trigo. Ma temaca xihuitl tlen ax cuali huan ax cebada." Hasta nica tlanqui camati Job.

will be added

X\