Job 3

1Teipa Job quitelchijqui nopa tonali quema yajaya tlacatqui. 2Quiijto: 3"Tlatelchihuali ma eli nopa tonali quema nitlacatqui huan nopa yohuali quema tlayolmelajque para tlacajtoya se oquichpil. 4M'as cuali ax panotosqu'ia nopa tonali. Nochi tlacame ma quiilcahuaca nopa tonali para nochipa. Huan Toteco Dios ma quiixpolihuilti. Ma quiixtzacua nopa tonali ipan tzintlayohuilotl para nochipa. 5Quena, ma Toteco Dios quitlali tzintlayohuilotl queja miquistli ipan nopa tonali huan ma quiixtzacua se hueyi mixtli tlen tlahuel yayahuic para ax quema panotosqu'ia nopa tonali. 6Nipaquisqu'ia intla hueli quiixpolojtosqu'ia nopa tonali ipan calendario, huan ma ax monextis ipan niyon se xihuitl o ipan niyon se metztli. 7M'as cuali eltosqu'ia nopa yohuali intla niyon se conetl ax tlacajtosqu'ia. M'as cuali intla ax oncatosqu'ia paquilistli ipan nopa tlayohua pampa tlacatqui se oquichpil. 8Tlacame tlen m'as quimatij tlatelchihuaj ma quitelchihuaca nopa tonali. Ma quitelchihuaca nopa chicahuaque tlacame tlen motemacaj para quiixitise nopa hueyi tlapiyali tlen temajmati tlen itoca leviat'an. 9Achi cuali intla tzintlayohuilijtosqu'ia sitlalime ipan nopa yohuali quema nitlacatqui. M'as cuali intla nochi quichixtosqu'ia tlahuili nopa tonali, pero nopa tonali ax quema hualajtosqu'ia. Intla ax oncatosqu'ia nopa tonali huan nopa tlahuili ax tlahuijtosqu'ia ica ijnaloc, ax nitlacajtosqu'ia. 10¿Para tlen Toteco Dios ax quitzajqui iijti nonana para ax nitlacajtosqu'ia? ¿Para tlen tinechcahuili ma nitlacati para ma niquijiyohuis nochi ni tlen ama nechpano? 11"¿Para tlen ax nimijqui iijtico nonana o quema san niontlacajtoya? 12¿Para tlen nopa tetlachicuenijquetl nechcahuili ma niitzto? ¿Para tlen nechchichiti nonana? 13Intla nimictosqu'ia quema nitlacatqui, huajca amantzi niitztosqu'ia cuali. Niitztosqu'ia nicochtoc huan nimosiyajcajtoc. 14Ama niitztosqu'ia nimictoc ininhuaya tlanahuatiani huan tetlalnamictiani tlen mochijchihuilijque inincaltlanahuatilhua tlen ama ya tlaxolehuali. 15Niitztosqu'ia ininhuaya tlayacanani tlen quipixque miyac oro huan quipixtoyaj ininchaj temitoc ica plata. 16¿Para tlen ax nechtlalpachojtosqu'iaj queja se conetl tlen tlacatqui mictoc? Queja nopa ax niquitztosqu'ia tlatlanextli. 17Tlacame tlen fiero ininyolis ayoc tecualancamacase nopona campa mijcatzitzi huan nochi tlacame tlen siyajtoque mosiyajcahuase. 18Nopona tlen itztoyaj ipan tlatzactli ipan tlaltepactli itztoque ica cuali pampa axaca se tetzajquetl para quintlaijiyohuiltis. 19Itztoque san sejco tlen teicneltzitzi huan tlen tlapijpiyani. Nopona tequipanohuani itztoque malacantoque tlen inintecohua. 20"¿Para tlen Toteco Dios quinmaca tlahuili huan yolistli tlacame queja na tlen titlaijiyohu'iaj huan timocuesohuaj? 21¿Para tlen titechcahuil'ia ma tiitztoca tojuanti tlen tlahuel tijnequij timiquise huan miquistli ax ajsic? Huan tijtemohuaj miquistli queja sequinoc quitemosqu'iaj tlacualistli o tomi, pero ax hueli tijpantise. 22¿Para tlen quinmaca yolistli tlacame tlen nel'ia yolpaquise quema ajsis tonali para miquise huan quintlalpachose? 23¿Para tlen Toteco Dios quicahuil'ia ma tlacati se tlacatl huan teipa quitzacuas ipan se yolistli campa onca tlaijiyohuilistli huan cuesoli? 24Ni tlacuajcualocayotl ax nechcahuil'ia ma nitlacua. Nochoquilis motlalohua queja se atemitl. 25Nechajsitoc nopa tlamantli tlen nochipa niquimacasiyaya huan tlen m'as nijmahuiliyaya. 26Ax nijpiya tlasehuilistli ipan noyolo. Noijti mojmolin'ia. Ax hueli nimosiyajcahuas. San nijmati cuesoli."

will be added

X\