Job 23

1Pero Job quiilhui: 2"Ama sampa nicamatis ica cuesoli pampa Toteco nelchicahuac nechtlatzacuilt'ia ica ima huan ax queja quinamiqui, yonque tlahuel niayijti. 3Nijnequisqu'ia nijmatis canque hueli nijpantis Toteco Dios. Nijnequisqu'ia niyasqu'ia campa mosehu'ia huan nijcamahuisqu'ia. 4Nijpohuilisqu'ia nochi nocuesol huan teipa nijcaquisqu'ia tlaque nechilhuis. 5Huan nijmachilisqu'ia tlaque quinequi ma nijchihuas. 6Toteco Dios ax nechnanquilisqu'ia ica cualantli yonque quipiya hueyi chicahualistli. Yajaya nechtlacaquilisqu'ia huan ax nechteilhuisqu'ia. 7Tlacame tlen xitlahuaque huelisqu'iaj monajnanquilise ihuaya para nechmanahuise, huan yajaya tlen noTetlajtolsencajca quiijtosqu'ia ax nijhuica tlajtlacoli. 8"Intla nijtemohua Toteco Dios ica campa quisa tonati o campa oncalaqui, ax nijpant'ia. 9Intla yajaya quichihua huejhueyi tequitl ica norte, ax niquitas. Huan intla nimocuepa ica tlani campa yajaya motlat'ia, ax hueli nijpantis. 10Pero yajaya cuali quiixmati noojhui huan sesen tlamantli tlen nechpano. Huan quema tlami nechyejyecos, yajaya quiijtos para nixitlahuac huan nitlapajpactic queja oro. 11"Nochipa nijtoquilijtoc iojhui Toteco Dios huan ninejnentoc iicxipa. Ax quema nimoiyocatlalijtoc. 12Ax nijcajtejtoc itlanahuatilhua tlen quisque ipan icamac. Achi m'as nimopaquilismaca ipan itlajtol huan ax queja ipan notlacualis tlen nijcua mojmostla. 13Pero intla yajaya moilhuijtoc para quichihuas se tlenijqui, axaca huelis quiyolpatlas. Nochi tlen yajaya quinequi, ya nopa quichihua. 14Huajca nochi tlen yajaya quisencajtoc para quichihuas ica na, ya nopa quichihuas. Huan noja quichihuas ica na m'as tlamantli tlen quisencajtoc. 15Huan yeca nimajmahui iixpa. Quema niquilnamiqui tlen yajaya hueli quichihua, nihuihuipica. 16Toteco quiquixtilijtoc ichicahualis noyolo. Quena, Toteco Tlen Quipiya Nochi Chicahualistli quichijtoc tlahuel ma nimajmahui. 17Pero yonque san tzintlayohuilotl niquita, nopa tzintlayohuilotl tlen nechixtzactoc aya nechtzontlamiltijtoc.

will be added

X\