1 Huajca Job quiilhui: 2 "Xijtlacaquilica cuali tlen nimechilhuis huan san ya nopa nechyoltlalis. 3 Nimechtlajtlan'ia xinechcahuilica nicamatis huan quema nitlamis, xijsenhuiquilica xinechpinajtica intla inquinequij. 4 "Na ax nicualani ica niyon se tlacatl. Yajaya Toteco Dios tlen nijnequi nijtlajtlanis huan yeca notonaltzi tlahuel tlaijiyohu'ia. 5 Xinechtlachilica huan ximomajmatica queja nieltoc, yonque monequi xijtzacuaca imocamac ica imoma ipampa quejatza ninesi. 6 Quema nimoilhu'ia tlen nijnequi niquijtos, nechitzqu'ia se hueyi majmajtli huan nihuihuipica. 7 "Na niquita para ax cuajcualme itztoque hasta huehuejtiyaj huan moricojchihuaj. 8 Quinitaj ininconehua moscalt'iaj huan iniixhuihua nojquiya. 9 Ininchajchaj ax cuajcualme eltoque temachtli, huan ax quinajsi niyon se majmajtli. Niyon Toteco Dios ax quintlatzacuilt'ia. 10 Nochi ininhuacaxhua momiyaquil'iaj huan cuali quintlacatilt'iaj ininconehua. Ax quinmajcahuaj. 11 Ininconehua senquistoc pactoque. Motlalojtinemij huan tzicuintinemij queja pilborregojtzitzi. 12 Ax cuajcualme mojmostla huicatinemij huan mijtotijtinemij ica arpas, tambores huan flautas. Ax tleno quinpolohua pampa tlahuel ricos. 13 Ica se tlalochtli miquij niyon ax tlaijiyohu'iaj. Ica paquilistli yahuij ipan nopa hueyi ostotl campa mijcatzitzi. 14 Inijuanti quitlahuelcahuaj Toteco Dios huan quiilhu'iaj: 'Xitechtlalcahui. Ax tleno tijnequij tijmatise tlen ta, niyon ax tijnequij tijchihuase tlen tijnequi.' 15 Huan ax cuajcualme quiijtohuaj: '¿Ajqueya yajaya tlen quipiya nochi chicahualistli? ¿Para tlen monequi tijtlepanitase huan tijtequipanose? ¿Tlaque tijtlanise intla timomaijtose ica ya?' 16 Pero yonque quej ni quiijtohuaj huan nochi quisa cuali para ax cuajcualme, ax inijuanti tlen nel'ia quipiyaj tlanahuatili para quiijtose tlaque panos. Itztoque huejca tlen Toteco Dios huan yeca na niquinhuejcamajcahua huan ax nijcaqui ininconsejo. 17 "Pero niquita para nelquentzi panoj tlaijiyohuilistli ax cuajcualme. Huan Toteco Dios ica ihueyi cualancayo san quemantzi quintitlanil'ia tlacuajcualocayotl huan miquistli. 18 Ax cuajcualme quemantzi itztoque queja trigo itlasolo tlen ajacatl quihuica. Itztoque queja sacatl huactoc tlen patlani. 19 "Miyac quiijtohuaj: 'Toteco Dios quintlatzacuiltis iconehua se tlacatl tlen tlajtlacolchijtoc.' Pero na niquijtohua m'as cuali para Toteco Dios ma quitlatzacuilti nopa tetaj tlen tlajtlacolchijtoc huan ax iconehua. Huan quitlatzacuiltisqu'ia ipan itlacayo para yajaya quimatisqu'ia tlaque quinamiqui para itlajtlacolhua. 20 Quena, ma quitzontlamilti nopa tlacatl ipampa ya itlajtlacolhua. Nopa tlacatl ma quitlamimachili nochi ihueyi cualancayo Toteco Tlen Quipiya Nochi Chicahualistli. 21 Pampa quema se tlacatl mictos, ax momacas cuenta tlaque ipantis isihua huan iconehua huan intla quiselise tlatzacuiltilistli. 22 "Pero ¿ajqueya huelis quimachtis o quitlacahualtis Toteco, yajaya tlen itztoc nopa Tetlajtolsencajquetl tlen m'as hueyi? 23 Toteco quicahuil'ia se tlacatl ma miqui quema quipiya fuerza huan tominpiya huan nochi yahui cuali para ya. 24 Miqui quema quipiya nochi tlen cuali para quicuas, huan tomahuac huan senquistoc yolpactoc. 25 Huan Toteco quicahuil'ia seyoc tlacatl ma miqui tlen tlaijiyohu'ia huan ax quema quipixqui niyon se tlamantli tlen cuali. 26 Tlen tlapijpiya huan tlen teicneltzi miquij huan quintlalpachohuaj ipan san se tlaltejpoctli huan san se tlamantli ocuilime quicuaj inintlacayo. 27 "Cuali na nijmati tlaque inmoilhu'iaj huan quejatza inquinequij innechixpanose. 28 Ajachica innechilhu'iaj tlen nopa tominpiyani huan ax cuajcualme tlen quiselijque tlatzacuiltili ipampa inintlajtlacolhua huan ama senquistoc xolejtoque ininchajchaj. 29 Pero na nimechilhu'ia: xiquintlajtlanica tlen hueli tlacatl tlen miyac quimatij, huan tlen miyac tlapaxalojtoque huan inijuanti inmechilhuise tlen melahuac. 30 Ax cuajcualme nochipa momanahu'iaj quema huala tlaohuijcayotl huan cholohuaj quema Toteco Dios quinext'ia icualancayo. 31 Axaca quinajhua tlamiyacapa, niyon axaca quintlatzacuilt'ia ipampa tlen quichijtoque. 32 Ica tlatlepanitacayotl quinhuicaj inintlacayo campa tecacahuaya huan nopona mocahua se tlacatl para tlamocuitlahuis. 33 Quema quinhuicaj para quintlalpachotij, yahuij tlahuel miyac tlacame. Sequin tlayacanaj huan sequin yahuij inintepotzco para quintlalpachotij ipan tlali tlen yamanic. 34 "Huajca ¿quejatza huelis imojuanti intechyoltlalise ica tlajtoli tlen ax tleno ipati? Quema innechnanquil'iaj, ax melahuac tlen inquiijtohuaj."
