Job 19

1Job quiilhui Bildad: 2"¿Hasta quema inquicahuase intechtlaijiyohuiltise? ¿Hasta quema inquicahuase intechcocose ica imotlajtol? 3Majtlactli hueltas intechtlaijilhuijtoque para nitlaijiyohu'ia nopampa na notlajtlacol. ¿Huelis ax inpinahuaj intechilhuise queja nopa? 4Intla melahuac nitlajtlacolchijtosqu'ia, huajca monequiyaya intechnextilise canque nimocuapolojtoc. 5Inmoilhu'iaj tlahuel inhuejhueyi huan innechpinahualt'iaj pampa innechicnotlalijtoque. 6Pero cuali xijmatica ya ni. Eltoc Toteco Dios tlen nechchihuilijtoc tlen ax cuali. Yajaya tlen nechmasiltijtoc ipan imatla. 7"Na nitzajtzi chicahuac para yajaya nechchihuilijtoc tlen ax cuali, pero axaca nechnanquil'ia para nechpalehuis. Yonque nichoca, axaca nechchihuil'ia tlen xitlahuac. 8Toteco Dios quitzactoc noojhui para ax hueli nipanos. Huan campa ninejnemi quicueptoc notlahuil ica tzintlayohuilotl. 9Yajaya nechcuili nochi tlen nijpixqui huan quichijtoc para ayoc aca ma nechtlepanita. 10Nechtlaijiyohuiltijtoc campa hueli huan yeca ya nitlantinemi. Quitlamilti nochi tlen cuali tlen nijchiyayaya. 11Yajaya tlahuel cualani nohuaya huan nechita queja se niicualancaitaca. 12Quintitlanqui isoldados para ma nechtehuica. Inijuanti mocualtlal'iaj para nechitzquise huan para quiyahualose nochaj. 13"Noteixmatcahua nechhuejcatlalijtoque huan nochi noicnihua quichihuaj queja ax nechixmatij. 14Nochi nocalnechcahua huan nohuampoyohua tlen m'as nechca nechtlahuelcajtoque. 15Nochi tlen itztoque ipan nochaj huan notlatequipanojcahua, nechitaj queja niehua sejcoyoc. 16Quema nijnotza notlatequipanojca, yajaya ax nechnanquil'ia huan ax huala yonque nijsenhuiquil'ia nijnotza. 17Nosihua quiijiya noijiyo. Noicnihua ax quinequij nechitase. 18Hasta tlen coneme nojquiya nechcualancaitaj. Quema nimoquetza inijuanti nechtlaijilhu'iaj. 19Tlen eliyayaj nocualhuampoyohua ama nechijiyaj. Huan nochi tlen tlahuel niquinicnel'ia moicancueptoque ica na. 20San niomitl nimocajtoc. Nechca huala nopa tonal para nimiquis. 21"Innohuampoyohua, xinechtlasojtlaca pampa yajaya Toteco Dios tlen nechmacatoc. 22¿Para tlen intechtoquilijtinemij queja Toteco Dios quichihua? ¿Ax inquiitaj para tlahuel nitlaijiyohu'ia? 23"Cuali elisqu'ia para se acajya quiijcuilosqu'ia nochi notlajtol para axaca quiilcahuasqu'ia. 24Quitejtequisqu'ia sesen tlajtoli ipan se hueyi tetl ica se cincel huan quiixtemitisqu'ia ica plomo para ax ixpolihuis para nochipa. 25"Na nijmati para itztoc noTlamanahuijca, huan ipan itlamiya tonali yajaya moquetzas ipan ni tlaltepactli. 26Huan yonque palanis ni notlacayo, teipa ica notlacayo niquitas Toteco. 27Huan nopampa na noselti niquitas. Quena, niquitas ica na noixtiyol. Ica nochi noyolo nijnequisqu'ia nimantzi ma ajsi nopa tonali. 28"¿Quejatza inmotemacaj para innechtlaijiyohuiltijtinemise? Inquichihuaj queja elisqu'ia inquimatij para elqui notlajtlacol, pero ax neli. 29Huajca nimechilhu'ia, xijpiyaca cuidado pampa imoseltitzitzi inmotemohuil'iaj tlatzacuiltili ica tlen inquichihuaj. Huan se tonali inquimatise para temachtli Toteco Dios tetlajtolsencahua."

will be added

X\