1 "Ax huejcahua iyolis niyon se tlacatl. Temitoc sesen tonali tlen iyolis ica tlaijiyohuilistli. 2 Titlacame tiitztoque queja se xochitl tlen cahuani se tlalochtli huan teipa pilini. O tiitztoque queja iecahuil se mixtli tlen san pano huan nimantzi ixpolihui. 3 "Toteco Dios, ¿para tlen tijtlatzquiltijtoc moixtiyol ipan na para tinechtlajtlanis cuenta? 4 Axaca huelis quipantis tlen tlapajpactic ipan se tlacatl queja na tlen nitlacatqui ica tlajtlacoli. 5 Toteco, ta tiquixtlalijtoc quesqui tonali sesen titlacame tiitztose huan nelcototzi toyolis. Quena, ta tiquixtlalijtoc quesqui metztli sesen tojuanti tiitztose huan axaca hueli quitlalilis niyon se tonali m'as. 6 Huajca xitechcahuili nochi titlacame se quentzi tonali para ma timosiyajcahuaca. Xiquijcueni mohueyi cualancayo se tlalochtli para ma caxani. Tiitztoque queja titlatequipanohuani. Xitechcahuili ma tijtlamiltica nopa tequitl tlen titechmacac ma tijchihuaca. 7 "Quema tlacame quitzontequij se cuahuitl, noja onca pajtli para chamanis huan sampa quipiyas imacuayohua tlen selic. 8 Huan yonque inelhuayohua nopa cuahuitl huehuejtiyasqu'iaj tlatzintla tlali huan icuatzonyo palanisqu'ia, 9 quema quiajsisqu'ia atl, sampa chamanisqu'ia. Quena, quema inelhuayohua moxoxohuilisqu'iaj, yancuic ixhuatos. 10 "Pero quema se tlacatl miqui, ayoc onca chicahualistli ipani. San tlami tlaijiyotilana huan ayoc itztoc. 11 Queja apoctli tlejco tlen hueyi atl huan ax mocuepa, huan queja se atemitl tlahuaqui huan san polihui, 12 queja nopa nojquiya tlami se tlacatl tlen miqui. Ayoc motlalanas hasta quema ayoc oncas elhuicactli, niyon ayoc isas. 13 "Toteco, cuali elisqu'ia intla tinechtlatisqu'ia ipan nopa hueyi ostotl campa itztoque mijcatzitzi huan tinechilcahuasqu'ia hasta tlamisqu'ia mohueyi cualancayo. Pero xiquixtlali se tonal quema sampa tinechilnamiquis. 14 Intla se tlacatl miquis, ¿sampa moyolcuis? Intla quena, nel'ia nechpactisqu'ia miyac. Huan mojmostla ipan noyolis nimochiyas hasta ta tinechmajcahuasqu'ia tlen ni tlaijiyohuilistli huan tinechcahuilisqu'ia ma nimiqui. 15 Intla ta tinechnotzasqu'ia, na niyasqu'ia. Huan ta tinechselisqu'ia ica miyac tlaicnelijcayotl pampa tinechchijchijqui ica moma. 16 Huan ta tijpohuasqu'ia sesen huelta canque nijtlali noicxi, huan ax tijpohuasqu'ia notlajtlacolhua. 17 Tijtlatisqu'ia nochi notlaixpanolhua ipan se coxtali. Huan tiquixpolosqu'ia nochi notlajtlacolhua. 18 "Ta tijtlamilt'ia tlen quichiya se tlacatl queja tepetini huelonij huan mochihuaj cuechtic huan nopa tetini tepehuij tlen se tepexitl. 19 "Tijtlamilt'ia nochi tlen quichiyaj tlacame queja miyac atl quichihua nopa tetini ma mocuepaca xali, huan miyac atl tlen huetzi quichihua ma mohuahuatatza miyac tlali. 20 Nochipa tiquintlani tlacame huan teipa san ixpolijtehuaj. Tiquinchihua tlacame ma huehuejtiyaca huan ma ixcuijcuilichihuica huan teipa miquij. 21 Huan quema mictoc se tlacatl, ayoc quema quimatis intla iconehua moscaltise huan quiselise tlatlepanitacayotl o pinahualistli. 22 Yajaya san quimachil'ia tlacuajcualocayotl ipan itlacayo huan mocuesohua ica nopa tlaijiyohuilistli."
