Job 13

1"Xiquita, nochi tlen imojuanti inquiijtohuaj ya niquitztoc ica noixtiyol, huan ya nijcactoc ica nonacas. Nochi ya nopa nijmachil'ia. 2Nochi tlen inquimatij, na nojquiya nijmati. Amo ximoilhuica se nihuihui tlacatl. Ax m'as inquimatij que na. 3Pero na tlahuel nijnequisqu'ia nicamatis ihuaya Toteco Tlen Quipiya Nochi Chicahualistli. Nijnequi niquixnextis nochi ni tlamantli para nimomanahuis. 4Pero imojuanti san innechtlaijilhu'iaj ica istlacaticayotl. Initztoque queja intepajtiani tlen ax hueli inquichicahuaj niyon se tlacatl. 5Cuali elisqu'ia intla ax tleno inquiijtosqu'iaj huan queja nopa nel'ia innesisqu'iaj intlalnamiquij. 6Ama xinechtlacaquilica se quentzi. Xijchihuilica cuenta tlen niquijtos para nimomanahuis. 7"¿Inquisenhuiquilise incamatise queja inquipiyaj itequihuejcayo Toteco Dios? Yajaya ax inmechilhuijtoc niyon se tlajtoli. Nochi tlen inquiijtohuaj san istlacaticayotl huan tlacajcayahuali. 8¿Huelis Toteco Dios quinequi inistlacatise huan para queja nopa inmonajnanquilise ipan ya itoca? Monequi axaca inquichicoicnelise huan tiquicnelis m'as tlen sequinoc, niyon yaja Toteco, niyon na. 9Xijpiyaca miyac cuidado para Toteco ma ax quipantis nochi tlen inquichihuaj. ¿Huelis inmoilhu'iaj inhuelise inquicajcayahuase Toteco queja intlacajcayahuaj? 10¡Axtle! Yajaya inmechtlatzacuiltis chicahuac intla inquichicoicnel'iaj ya huan ax inquichihuaj san tlen xitlahuac. 11¿Ax inmechmajmat'ia ihuextilis Toteco Dios? ¿Para tlen ax inquiimacasij? 12Nochi nopa tlajtoli tlen innechilhuijtoque ax tleno ipati. Eltoc queja tlaltejpoctli. Huan nochi tlen inmoilhu'iaj para ica inquimanahuise eltoc queja se soqui comitl. 13"Huajca ayoc ximolinica. Xinechcahuilica ma nicamati na. Ya nimocualtlalijtoc para niquijiyohuis tlen hueli tlaijiyohuilistli tlen hualas teipa. 14Nicamatis yonque na nijmati ica notlajtol Toteco huelis nechmictis. 15Pero yonque Toteco Dios nechmictisqu'ia, noja nimotemachisqu'ia ipan ya huan nimomanahuisqu'ia iixpa. 16Huan ya ni huelis nechpalehuis para nijnextis ax tleno nijchijtoc, pampa se tlacatl tlen ax cuali ax monechcahuis iixpa Toteco Dios. 17"Xijtlacaquilica cuali nochi tlen niquijtos. Quena, xinechtlacaquilica. 18Xiquitaca, na nimocualtlalijtoc ica tlaque nimomanahuis pampa nijmati para huelis nijnextilis para ax tleno nijchijtoc. 19¿Ajqueya hueli nechteilhuis ica se tlamantli tlen ax cuali tlen nijchijtoc? Intla imojuanti innechnextilisqu'iaj para melahuac nijchijtoc tlen ax cuali, ayoc sampa nimomanahuisqu'ia hasta nimiquis. 20"Toteco Dios, chicahuac nimitztlajtlan'ia para ayoc xinechchihuilis ni ome tlamantli para huelis nicamatis mohuaya: 21Ayoc m'as xinechtlaijiyohuilti. Huan nojquiya amo xinechmajmati quema niitztoc moixpa huan nijmachil'ia mohueyi chicahualis. 22Huajca xinechnotza huan xinechtlajtlani, huan na nimitznanquilis. O intla tijnequi, na nimitzcamahuis achtohui huan ta tinechnanquilis. 23¿Se favor, san xinechilhui tlaque tlamantli tlen ax cuali nijchijtoc? Xinechnextili notlaixpanolhua huan notlajtlacolhua. 24¿Para tlen timohuejcatlal'ia tlen na? ¿Para tlen tinechita queja nielisqu'ia nimocualancaitaca? 25¿Tijtlaijiyohuiltisqu'ia se xihuitl tlen huetzqui tlen se cuahuitl huan quipatlanalt'ia ajacatl? ¿Tijtojtocasqu'ia itlasolo trigo tlen quihuica ajacatl huan ax tleno ipati? Huajca ¿para tlen tinechtojtoca na tlen ax tleno nopati? 26"Eltoc queja tiquijcuilojtoc miyac fiero tlamantli para ica tinechteilhuisqu'ia. Eltoc queja tinechilnamiquilt'ia tlen nochi notlajtlacolhua tlen nijchijqui quema nieliyaya nitelpocatl. 27Eltoc queja tijcuapitztlatoc noicxihua ipan cuahuitl para ax nicholosqu'ia. Tinechtlachilijtinemi campa ninejnemi. Tijtlalijtoc sellos tlatzintla noicxihua para campa hueli ninemis nijsellojhuis nopa tlali huan tijmatis para naja. 28Na nieltoc queja se cuahuitl tlen huetztoc huan m'as palani mojmostla. Niitztoc queja se yoyomitl tlen cuatzipime ya quitlamicuajtoque.

will be added

X\