Job 12

1Huan Job quiilhui Zofar: 2"Temachtli imojuanti inquimatij nochi. Huan quema inmiquise, ayoc itztos niyon se tlacatl tlen tlalnamiqui. 3Pero na nijpiya tlalnamiquistli nojquiya. Imojuanti ax m'as incuajcualme que na. ┬┐Ajqueya ax quimati nochi tlen intechilhuijtihualajtoque? 4Achtohuiya nimomaijtoyaya ica Toteco Dios huan yajaya nechmacayaya tlen nijtlajtlaniyaya. Pero ama nochi nocalnechcahua san nechhuetzquil'iaj. Yonque na se nitlacatl tlen nixitlahuac, ama nochi techpinajt'iaj. 5Tlacame tlen nochi quipiyaj quinpinajt'iaj tlacame tlen tlaijiyohu'iaj. Ax quinequij quinitase tlen motepotlam'iaj. 6Toteco quincahua tlaxtequini ica tlasehuilistli, huan tlen quicualancamacaj itztoque ica temachili. Nochi tlen inijuanti quipiyaj Toteco quitlalijtoc ininmaco. 7"Nochi quimatij para TOTECO quichijchijqui nochi tlamantli. Xiquintlajtlani nopa tlapiyalime tlen m'as huihuitique huan inijuanti mitzilhuise. Inijuanti quimatij para melahuac TOTECO quinchijchijqui. Xiquintlajtlani nopa totome tlen patlantinemij. Inijuanti quimatij. 8Nojquiya mitznextilis ni tlaltepactli o nopa michime tlen itztoque ipan hueyi atl. 9Nochi quimatij para TOTECO quinchijchijtoc. 10Ininyolis nochi tlacame huan nochi tlamantli yoltoque eltoc imaco TOTECO. Yajaya huelis quinquixtilis iniijiyo quema ya quinequi. 11Queja tocamac quimachil'ia iajhuiyaca sesen tlamantli tlacualistli, totlacaquilis hueli quicaqui huan quiyecohua catl'ia tlajtoli eltoc cuali. 12Huan huehuentzitzi quipiyaj tlalnamiquistli huan quimachil'iaj miyac tlamantli. 13"Pero san yajaya Toteco Dios quipiya nopa tlalnamiquistli huan chicahualistli tlen nel'ia melahuac. San yajaya hueli techconsejomaca tlen quinamiqui. San yajaya quimachil'ia nochi tlamantli. 14"Tlen Toteco Dios quixolehua, axaca hueli quicualtlalis sampa. Huan intla yajaya quitzacuas se tlacatl, axaca huelis quimajcahuas. 15Quema Toteco quichihua ma ax huetzi atl, huajca nochi huaqui huan mocahua queja se huactoc tlali. Huan quema yajaya quichihua ma huetzi atl chicahuac, nochi tlatemi huan tlahueloni. 16"Yajaya quipiya nochi chicahualistli huan tlalnamiquistli. Quipiya tlanahuatili ica nochi tlen tlacajcayahuaj huan nochi tlen sequinoc quincajcayajtoque. 17Toteco quinhuihuitil'ia jueces. Quichihua tlen teconsejomacayayaj ma quichihuaca tlamantli tlen ax quinamiqui queja para quinmalacanise tlatequipanohuani para ma yaca malacantoque. 18Yajaya quinquixt'ia inintlanahuatil tlanahuatiani huan quichihua ma quinhuicaca ilpitoque ica lazos ipan inintzinquechtla para ma tlatequipanotij. 19Toteco quinquixti inintequi totajtzitzi huan quichijqui ma quinhuicaca para tlatequipanotij san tlapic. Quinmajcahua nopa tlacame tlen tlahuel chicahuaque. 20Yajaya quinchihua ma ayoc camatica tlen tlalnamiquij. Quincuil'ia inintlalnamiquilis nopa huejhueyi tlacame para ayoc teconsejomacase. 21Yajaya quinpinahualt'ia tlanahuatiani. Quinquixtil'ia inintepos inijuanti tlen quipixque chicahualistli. 22"Yajaya quitlamilt'ia tzintlayohuilotl huan miquistli ica itlahuil. 23Toteco Dios quinchihua sequin tlaltini ma mochihuaca tlahuel chicahuaque, huan Toteco Dios quintzontlamilt'ia nopa tlaltini tlen quinequi. Quinhueyil'ia sequin tlaltini, huan sequin quinxolehua huan quintlahuelcahua. 24Yajaya quinquixtil'ia inintlalnamiquilis tlanahuatiani ipan tlaltepactli huan quinchihua ma mocuapolojtinemica ipan se huactoc tlali campa ax onca ojtli. 25Quinchihua ma nejnemica ipan tzintlayohuilotl campa ax onca niyon se tlahuili. Quinchihua ma mocuapoloca queja ihuintini.

will be added

X\