Job 10

1"Ya nicuesijqui niitztoc. Yeca nijnequi xinechcahuilica para nicamatis. Niitztoc ipan tlacuajcualocayotl huan ipan hueyi cuesoli. 2Huan niquilhuisqu'ia Toteco Dios: 'Amo xinechtlatzacuilti san pampa tijnequi. M'as cuali xinechilhui para tlen tinechtlatzacuilt'ia. 3¿Huelis tiquita cuali para tinechtlaijiyohuiltis huan tinechcualancaitas na tlen tinechchijchijqui ica moma? ¿Para tlen tiquinpaquilismaca fiero tlacame huan tiquinpalehu'ia ma quisaca cuali? 4¿Huelis tiquita tlamantli san queja tojuanti titlacame tiquitaj? 5¿Huelis moyolis nojquiya ax huejcahua queja toyolis? 6¿Huelis yeca tijtemohua tlaixpanoli huan tlajtlacoli yonque tijmati ax tleno nijchijtoc? 7¿Huelis tinechtlatzacuilt'ia quema ax tleno nijchijtoc pampa tijmati para axaca hueli nechmanahuis momaco? 8" 'Ta tinechchijchijqui ica moma, pero ama timoyolpatlatoc huan tinechtzontlamilt'ia. 9Xiquilnamiqui para ta tinechchijchijqui ica soquitl, huan ¿ama sampa techchihuas ma nimocuepas tlaltejpoctli? 10Tlen ipejya noyolis ta tiitztoya nopona tinechcualchijchihuayaya iijtico nonana. 11Ta tinechpijqui ica nocuetlaxo huan ica nonacayo. Tiquinmotzquilti noomiyohua huan notlalohua. 12Ta tinechmacac yolistli huan tlahuel tinechicnelijtoc. Pampa ta tinechmocuitlahuijtoc, yeca niyoltoc. 13" 'Pero nijmati para nochipa ta tinechtlachilijtoc ixtacatzi para tiquitas intla nitlajtlacolchihuas, 14para huelis tinechtlatzacuiltis huan ax tinechtlapojpolhuis notlajtlacolhua. 15Huan teicnelti na intla nitlajtlacolchijtoc. Huan intla ax tleno nijchijtoc, ax tleno ipati. ¡Ax tinechpalehu'ia! San tlahuel nimopinahualtijtoc huan nitlaijiyohuijtoc. 16Huan intla nijchihuasqu'ia campeca para nimotlalanas, ta tihuitonisqu'ia ipan na queja se hueyi tecuani huan tinechnextilis mohueyi chicahualis para tinechcocos. 17Eltoc queja ajachica tiquinhualica m'as testigos para tinechteilhuis huan para m'as tinechnextilis mohueyi cualancayo. Eltoc queja tinechtitlanil'ia m'as soldados ajachica para tinechtlaijiyohuiltis. 18" '¿Huajca para tlen tinechquixti iijtico nonana? M'as cuali nimictosqu'ia quema san niontlacatqui huan axaca nechitztosqu'ia. 19Queja nopa ax quema niitztosqu'ia, niyon ax nijpanosqu'ia ni tlaijiyohuilistli. M'as cuali san nionpanotosqu'ia tlen iijti nonana hasta campa nechtlalpachojtosqu'iaj. 20Ama san pilquentzi tonali mocahua para noja niitztos, huajca xinechtlalcahui para nimoyoltlalis se quentzi. 21Nimantzi niyas ipan nopa tlali tlen miquistli campa onca tzintlayohuilotl huan ayoc quema nimocuepas. 22Ipan nopa tlali onca se tzintlayohuilotl tlen m'as yayahuic huan axaca quimati tlaque quichihuas. Nopona tlen inijuanti quiitaj para tlatlanextli eltoc senquistoc tlayohuilotl nojquiya.' "

will be added

X\