Jeremiah 52

1Sedequ'ias quipiyayaya 21 xihuitl quema pejqui tlanahuat'ia ipan altepetl Jerusal'en huan tlanahuati majtlactli huan se xihuitl. Inana itoca eliyaya Hamutal huan eliyaya iichpoca Jerem'ias tlen ehua altepetl Libna. 2Pero Sedequ'ias quichijqui tlen ax cuali iixpa TOTECO queja nojquiya quichijtoya Joacim tlen achtohuiya eliyaya tlanahuatijquetl. 3Huan TOTECO tlahuel cualanqui ica nopa tlacame tlen altepetl Jerusal'en huan tlali Jud'a huan quinquixti tlen iixpa. Quichijqui para nopa tlanahuatijquetl tlen Babilonia ma quinquixti tlen inintlal huan ma quinhuica ipan tlali Babilonia. Huan teipa Tlanahuatijquetl Sedequ'ias mosisini ica nopa tlanahuatijquetl tlen tlali Babilonia. 4Huan ipan 15 itequi nopa metztli majtlactli ipan tocalendario israelita quema Sedequ'ias yahuiyaya para chicnahui xihuitl para tlanahuatis, Nabucodonosor, tlanahuatijquetl tlen tlali Babilonia, yajqui ica nochi isoldados ipan altepetl Jerusal'en huan quiyahualotoj nopa altepetl huan quitemitijque tlamontomitl tlen tlali hasta itzonpac nopa tepamitl para hueli calaquisqu'iaj ipan nopa altepetl. 5Huan quiyahualo Jerusal'en para ome xihuitl hasta Sedequ'ias yahuiyaya para majtlactli huan se xihuitl tlanahuatis. 6Huan ipan 9 itequi nopa metztli nahui tlen nopa xihuitl, senquistoc tlanqui nochi tlacualistli ipan nopa altepetl huan oncac se hueyi mayantli. 7Huajca nopa tlacame tlen calijtic ipan altepetl Jerusal'en quicoyonijque nopa tepamitl. Huan ica tlayohua cholojque nochi nopa israelita soldados huan panoque ipan nopa puerta tlen eltoya tlatlajco nopa ome tepamitl nechca nopa xochimili tlen iaxca nopa tlanahuatijquetl. Huan quisque tlen nopa altepetl yonque yahualtic itztoyaj nopa caldeos. Huan motlalojtejque para quipanose nopa miltini para ajsisqu'iaj ipan nopa tlamayamitl nechca atemitl Jord'an. 8Pero nopa caldeo soldados quitepotztocaque Tlanahuatijquetl Sedequ'ias huan quiitzquitoj ipan se tlamayamitl nechca altepetl Jeric'o, pampa nochi isoldados ya quitlahuelcajtoyaj. 9Huan quihuicaque Sedequ'ias ipan altepetl Ribla ipan tlali Hamat campa itztoya Nabucodonosor, tlanahuatijquetl tlen tlali Babilonia. Huan nopano quitlajtolsencajqui huan quiijto tlachque elis itlatzacuiltil. 10Huan nopano ipan altepetl Ribla, Nabucodonosor quichijqui para Sedequ'ias ma quintlachilijto iconehua quema quinquechtzontequiyayaj. Huan nojquiya iixpa quinquechtzontejque nochi nopa tlayacanani tlen tlali Jud'a. 11Teipa Nabucodonosor tlanahuati ma quiixtiyolquixtica Sedequ'ias. Huan teipa quiilpijque ica tepos cadena huan quihuicaque ipan tlali Babilonia. Huan nopano quitzajque hasta mijqui. 12Huan ipan 10 itequi nopa metztli macuili ipan nopa calendario israelita, quema Nabucodonosor yahuiyaya para majtlactli huan chicnahui xihuitl para tlanahuatis ipan tlali Babilonia, Nabuzarad'an, nopa hueyi tlayacanquetl tlen soldados hualajqui ipan altepetl Jerusal'en. 13Huan quitlati itiopa TOTECO huan nopa caltlanahuatili huan nochi huejhueyi caltini. 14Huan nopa Nabuzarad'an quinnahuati nopa caldeo soldados tlen hualayayaj ihuaya ma quihuelonica nochi nopa tepamitl tlen quiyahualo altepetl Jerusal'en. 15Teipa Nabuzarad'an quinhuicac ipan tlali Babilonia sequin nopa tlacame tlen teicneltzitzi, huan nochi tlen momanahuijque tlen nopa tlatehuijcayotl. Nojquiya quinhuicac nochi tlen motemactilijtoyaj ica nopa tlanahuatijquetl tlen tlali Babilonia huan nochi nopa tlacame tlen quimatiyayaj quichihuase tlen hueli tequitl. 16Pero sequin nopa tlacame tlen m'as teicneltzitzi quincajqui para ma quichihuaca xocomeca miltini huan ma quipoxahuaca nopa tlali. 17Huan nopa soldados tlen tlali Babilonia quitlapanque nopa ome huejhueyi tlaquetzali tlen bronce tlen eltoya campa ipuertajyo nopa tiopamitl. Huan nojquiya quitlapanque nopa piletas tlen bronce campa quitecayayaj atl huan nopa huacaxme tlen bronce tlen eltoyaj queja inintlaquetzalhua huan nochi quihuicaque ipan tlali Babilonia. 18Nojquiya quihuicaque nochi nopa chachapali tlen bronce, huan nopa palas tlen ica quiijcueniyayaj cuanextli ipan nopa tlaixpamitl; huan nochi cucharas, huejhueyi tazas huan nopa huitzcucharas huan nochi tlamantli tlen bronce tlen quitequihuiyayaj ipan tiopamitl quema quimacayayaj tlacajcahualistli. 19Huan nojquiya quihuicaque nopa tlixictli, tlahuil quetzali huan nopa tazas huan platos tlen senquistoc oro huan plata. 20Nopa bronce tlen nopa ome huejhueyi tlaquetzali tlen Salom'on quichijqui, huan nopa piletas huan nopa huacaxme tlen eliyayaj tlatzintla elque tlahuel etique hasta axaca huelqui quinyejyecohua ietica. 21Sesen tlaquetzali quipiyayaya 9 metros huan 45 cent'imetros ihuejcapanca. Huan inintomajca eliyaya 6 metros huan 30 cent'imetros. Nopa tlaquetzali eliyayaj cacahuatique huan inintilajca quipiyayayaj 8 cent'imetros. 22Huan inintzonatipa nopa tlaquetzali quiiyocatlalijtoyaj pano 2 metros. Huan ipan nopa lugar quinixcopintoyaj miyac granadas. 23Oncayaya 96 granadas ipan sesen lado huan seyoc 100 granadas quiyahualojtoyaj nopano huejcapa. 24Huan nopa hueyi tlayacanquetl tlen soldados quihuicac Sera'ias tlen eliyaya nopa hueyi totajtzi huan Sofon'ias, nopa totajtzi tlen eliyaya itlapalehuijca, huan eyi tlacame tlen quimocuitlahuiyayaj nopa tiopamitl. 25Huan tlen nopa tlacame tlen noja motlatiyayaj ipan nopa altepetl, quinhuicac se hueyi tlayacanquetl tlen soldados, huan chicome tlacame tlen quitlalnamictiyayaj nopa tlanahuatijquetl. Huan quinhuicac nojquiya nopa tlayacanca tlajcuilojquetl tlen quinnahuatiyaya nopa soldados tlen tlali Jud'a huan 60 huejhueyi tlacame tlen motlatijtoyaj ipan Jerusal'en. 26Huan Nabuzarad'an, nopa hueyi tlayacanquetl tlen soldados, quinhuicac nochi yajuanti ipan altepetl Ribla iixpa nopa tlanahuatijquetl tlen tlali Babilonia. 27Huan nopano, nopa tlanahuatijquetl tlanahuati ma quinhuitequica huan ma quinmictica. Huan queja nopa, quintlamiquixtijque nochi Jud'a ehuani tlen inintlal. 28Huan nopa tlacame tlen tlali Jud'a tlen quinhuicaque ipan tlali Babilonia quema Nabucodonosor yahuiyaya para chicome xihuitl para tlanahuatis, elque para nochi: 3 mil 23 tlacame. 29Huan quema yahuiyaya para majtlactli huan chicueyi xihuitl ipan itlanahuatil Nabucodonosor, Nabuzarad'an quinhuicac 832 tlacame tlen altepetl Jerusal'en. 30Huan quema yahuiyaya para 23 xihuitl ipan itlanahuatil Nabucodonosor, Nabuzarad'an, nopa hueyi tlayacanquetl tlen soldados quinhuicac 745 tlacame. Huajca para nochi tlen quinhuicaque ipan tlali Babilonia elque 4 mil 600 tlacame tlen tlali Jud'a huan altepetl Jerusal'en. 31Teipa quema Joaqu'in, tlanahuatijquetl tlen tlali Jud'a, quihuicayaya 37 xihuitl para quihuicatoyaj ipan tlali Babilonia, pejqui tlanahuat'ia ipan tlali Babilonia, Evil Merodac. Huan ipan 25 itequi nopa metztli majtlactli huan ome ipan calendario israelita, Evil Merodac quitlasojtlac Joaqu'in huan quiquixti ipan nopa tlatzactli. 32Huan quichihuili tlen cuali huan quichijqui ihuampo huan m'as quipacti tlen nochi nopa sequinoc tlanahuatiani tlen itztoyaj ihuaya ipan tlali Babilonia. 33Nojquiya quimacac se yoyomitl tlen yancuic queja quinamiqui para se tlanahuatijquetl. Huan Joaqu'in tlacuayaya mojmostla ihuaya nopa tlanahuatijquetl ipan imesa. 34Huan nojquiya mojmostla quimacayaya nochi tlen itechmonequi. Huan queja nopa quichihuili nochipa hasta quema mijqui.

will be added

X\