Jeremiah 46

1TOTECO nechnojnotzqui na, niJerem'ias, huan nechmacac itlajtol para nopa tlaltini campa tlacame tlen ax israelitame. 2Ya ni nopa tlajtoli tlen TOTECO nechmacac na, niJerem'ias, para tlali Egipto ipan nopa xihuitl quema Joacim, icone Jos'ias, yahuiyaya para nahui xihuitl tlanahuatis ipan tlali Jud'a. Elqui ipan nopa tonali quema oncac tlatehuijcayotl ipan Carquemis, nechca atemitl Jord'an. Huan ipan tlatehuijcayotl Nabucodonosor, tlanahuatijquetl tlen Babilonia, quintehuijqui nopa Fara'on tlen itoca Necao tlen elqui tlanahuatijquetl tlen tlali Egipto. Huan Nabucodonosor quitzontlamilti ya huan isoldados. 3Huan TOTECO nechilhui para quej ni ma niquinilhui Egipto ehuani: "Ximotlalilica imoteposhua huan xiyaca ipan nopa tlatehuijcayotl. 4Xiquintlalilica siya imocahuayos huan ximocualtlalica para intlejcose ininpani. Ximotlalilica imotepostzontzajca huan xijtentica imomachetes. Huan ximotlalilica se tepostli para inmotzacuase ipan imoyolixco. 5¡Xiquitaca! Nopa soldados tlen tlali Egipto cholohuaj ica majmajtli. Hasta nopa soldados tlen tlahuel motemacaj nojquiya motlalohuaj, niyon ax moicancuepaj. Campa hueli onca majmajtli. 6Pero axaca momanahuis yonque tlahuel hueli motlalohua o yonque tlahuel motemaca. Pampa nepa ica norte nechca atemitl 'Eufrates, motepotlamise huan huetzise. 7"¿Ajqueya yajuanti ne soldados tlen tlahuel tetique? Motlalanaj queja atemitl Nilo quema tlatemi huan quitemit'iaj nochi nopa tlali. 8Ya nopa, nopa soldados tlen tlali Egipto. Yajuanti motlepanitaj pampa moilhu'iaj quitemitise ne tlali queja atl huan quintzontlamiltise nochi inincualancaitacahua. 9Huajca ma hualaca nopa cahuayos, cuacarros huan nopa tlatehuiani tlen tlahuel tetique tlen tlali Egipto. Ma hualaca nochi nopa tlacame tlen tlali Etiop'ia huan Libia tlen tlahuel huelij quitequihu'iaj machete huan cuahuitoli. 10Pampa ni tonali eltoc noaxca na niDIOS Tlen Niquinyacana Noelhuicac Ejcahua Ma Tlatlanitij. Ama ni tonali niquinmacuepas nocualancaitacahua. Nopa machete quinmictis tlacame hasta ayoc hueli m'as. Eltos queja ihuintis ica inieso. Pampa ama na nijselis se tlacajcahualistli ama. Oncas se hueyi miquistli nepa ipan nopa tlali tlen mocahua ica norte, nechca atemitl 'Eufrates. 11"Senquistoc inmechtlantoque huan inmechcocojtoque, intlacame tlen tlali Egipto. Xiyaca ipan tlali Galaad xijtemotij nopa pajtli tlen b'alsamo. Pero yonque inquitequihuise tlahuel miyac pajtli, ax inmochicahuase. 12Nochi tlaltini quicactoque tlen imopinahualis. Ipan nochi ni tlali caquisti choquistli huan tzajtzilistli pampa ya inmechtlanque. Imosoldados tlen tlahuel tetique motepotlam'iaj se ica seyoc huan san sejco huetzij." 13Huan quema nopa Nabucodonosor, tlanahuatijquetl tlen tlali Babilonia hualajqui para quitehuis tlali Egipto, TOTECO nechnojnotzqui na, niJerem'ias, huan nechilhui: 14"¡Xitlayolmelahua chicahuac ipan tlali Egipto! Xitepohuilica tlen ininpantis ipan altepetini Migdol, Menfis huan ipan Tafnes. Quej ni xiquinilhui: 'Ximocualtlalica para intlatehuise pampa yajaya tlen huala ica nopa machete tlen tetzontlamilt'ia quinmictis nochi tlacame tlen itztoque yahualtic Egipto.' 15¿Para tlen cholo ica majmajtli mototiotzi, Apis, tlen tiquijtohuayaya para tlahuel tetic queja se toro? Cholo pampa niDIOS nijmajcahua iniixpa icualancaitacahua. 16Tlahuel miyac tlacame huetzise. Huan huajca nopa israelitame tlen tlali Jud'a ehuani quiijtose: '¡Xihuala, ma timocuepaca ipan tlali Jud'a campa titlacatque! ¡Ma timochololtica tlen ni miquistli!' 17"Xijpatlaca itoca nopa Fara'on tlen itoca Hofra huan xijtocaxtica: 'Nopa tlacatl tlen tlajtoli hueyi, pero ax quipiya chicahualistli.' 18"Na niTlanahuatijquetl huan niDIOS Tlen Niquinyacana Noelhuicac Ejcahua Ma Tlatlanitij nimechilhu'ia para temachtli hualas ipan tlali Egipto, se tlen tlahuel huejcapantic queja tepetl Tabor o queja tepetl Carmelo tlen eltoc nechca hueyi atl. Queja nopa elis imocualancaitaca tlen huala. 19Xijcualtlalica imotlamantzitzi huan ximocualchijchihuaca para inyase ipan seyoc tlali, nochi imojuanti tlen inehuaj ipan tlali Egipto. Pampa quitlamixolehuase altepetl Menfis hasta mocahuas cactoc queja huactoc tlali huan ax mocahuas niyon se tlacatl. 20Egipto nel'ia eliyaya yejyectzi queja se becerra, pero cholos quema hualas nopa tetzontlamiltijquetl tlen ehua ipan nopa tlali tlen mopant'ia ica norte. 21Hasta nopa isoldados tlen sequinoc tlaltini tlen Egipto quintlaxtlahu'ia para tlatehuise, nojquiya cholose ica majmajtli queja becerros tlen tomahuaque. Tlahuel motlalose pampa ama eli se tonali tlen majmajtli para tlali Egipto, huan se tonali tlen tlatzacuiltili. 22Quema calaquiquij inincualancaitacahua para quintzontlamiltiquij ica hachas nopa Egipto ehuani cholose ixtacatzi queja se cohuatl tlen mohuahuatatza. Hualase tlahuel miyac soldados hasta axaca huelis quinpohuas. 23Huan yajuanti quinhuejhuelose nopa egiptome queja tlacame tlen quitzontequij cuatini ipan cuatitlamitl. Quipiyaj ininmiyaca queja chapoltzitzi. 24Quinpinahualtise nopa Egipto ehuani huan quintemactilise ininmaco nopa tlacame tlen hualahuij ica norte huan ax huelis momanahuise." 25TOTECO Tlen Quinyacana Ielhuicac Ejcahua Ma Tlatlanitij huan yajaya tlen ininTeco israelitame, quiijtohua: "Na nijtlatzacuiltis Am'on, nopa tlaixcopincayotl tlen inindios nopa tlacame tlen altepetl Tebas huan nochi nopa sequinoc totiotzitzi ipan tlali Egipto. Nojquiya niquintlatzacuiltis Fara'on huan nochi itlayacancahua huan nopa tlacame tlen motemach'iaj ipan ya. 26Na niquintemactilis imaco Nabucodonosor, tlanahuatijquetl tlen tlali Babilonia huan ininmaco isoldados. Pero teipa quema ya panotos miyac tonali, Egipto sampa temis ica tlacame queja achtohuiya. Queja nopa niDIOS niquijtohua. 27"Pero imojuanti innoisraelita tlacajhua amo ximajmahuica. Ximosemacaca, pampa yonque ama inmopant'iaj huejca, na nimechmanahuis. Sampa nimechhualicas imojuanti huan imoconehua ipan imotlal huan inquipiyase tlasehuilistli huan ax tleno inmechtemajmatis. 28Amo ximajmahui innoisraelita tlatequipanojcahua, pampa na niitztoc imohuaya. Na niquintzontlamiltis tlen ehuani nochi nopa tlaltini campa nimechtitlani, pero imojuanti ax nimechtzontlamiltis. San nimitztlatzacuiltis queja quinamiqui ipampa tlen inquichijtoque pampa ax hueli nimechcahuas san quiaja."

will be added

X\