Jeremiah 39

1Ipan metztli majtlactli ipan toisraelita calendario quema Sedequ'ias yahuiyaya para chicnahui xihuitl tlanahuatis ipan tlali Jud'a, Nabucodonosor tlanahuatijquetl tlen tlali Babilonia huan isoldados hualajque ipan altepetl Jerusal'en huan sampa quiyahualojque para quitehuise. 2Huan ome xihuitl huan tlajco teipa quema Tlanahuatijquetl Sedequ'ias yahuiyaya para majtlactli huan se xihuitl ipan itequi, ipan 9 itequi nopa metztli nahui ipan toisraelita calendario, quicojcoyonijque nopa tepamitl tlen nopa altepetl huan calajque, huan queja nopa huetzqui nopa altepetl. 3Huan nochi nopa tlayacanani tlen soldados tlen tlali Babilonia, calajque ipan nopa altepetl huan mosehuijque campa nopa puerta tlen eltoc tlatlajco. Huan ya ni inintoca nopa tlayacanani: Nergal Sarezer, Samgar Nebo, nopa hueyi tequihue Sarsequ'in huan nopa seyoc Nergal Sarezer tlen eliyaya iachtohui tlayacanca nopa tlanahuatijquetl. 4Huan quema Tlanahuatijquetl Sedequ'ias huan isoldados quiitaque para ya huetzqui nopa altepetl, yajuanti quisque ica tlayohua ipan ipuertajyo nopa tepamitl tlen eltoc iica nopa xochimili, huan cholojque. Yajque ipan nopa ojtli tlen pano ipan nopa tlamayamitl tlen eltoc nechca atemitl Jord'an. 5Pero nopa soldados tlen tlali Babilonia quitepotztocaque Tlanahuatijquetl Sedequ'ias huan quiitzquitoj ipan tlamayamitl Jeric'o. Huan quihuicaque ipan altepetl Ribla ipan tlali Hamat campa itztoya Nabucodonosor, nopa tlanahuatijquetl tlen tlali Babilonia, huan nopano quitlajtolsencajqui huan quiijto tlachque elis itlatzacuiltil. 6Huan nopa tlanahuatijquetl tlen tlali Babilonia, nopano quiquetzqui Sedequ'ias para ma quintlachilijto iconehua quema quinquechtzontequise ihuaya nochi nopa tlayacanani tlen tlali Jud'a. 7Teipa quiixtiyolquixti Sedequ'ias huan quiilpi ica cadenas huan quihuicac ipan tlali Babilonia. 8Huan nopa soldados tlen tlali Babilonia quitlatijque nopa caltlanahuatili huan nochi caltini tlen oncayaya ipan altepetl Jerusal'en huan quihuelonijque nopa tepamitl tlen quiyahualojtoya. 9Huajca Nabuzarad'an, nopa hueyi tlayacanquetl tlen soldados, quinhuicac ipan tlali Babilonia nochi nopa tlacame tlen noja mocajtoyaj ipan nopa altepetl huan nochi tlen motemactilijtoyaj ica yajuanti. 10Pero ipan nochi tlali Jud'a san quincajqui se quesqui tlacame huan inijuanti itztoyaj tlen m'as teicneltzitzi huan tlen ax tleno quipiyayayaj. Huan quinmacac tlali huan xocomeca miltini ma quitequihuica. 11- 12Huan Tlanahuatijquetl Nabucodonosor, quinahuatijtoya Nabuzarad'an, nopa hueyi tlayacanquetl tlen soldados ma nechtemo na, niJerem'ias. Quiilhuijtoya: "Xijtemo Jerem'ias huan xijpiya miyac cuidado para ax ipantis tlen fiero. Xijmocuitlahui cuali huan xijmaca nochi tlen mitztlajtlanis." 13Huajca Nabuzarad'an nopa hueyi tlayacanquetl tlen soldados, huan Nabusazb'an tlen inintlayacanca nopa tlacame tlen quincaparojtoque, huan Nergal Sarezer tlen quiconsejomacayaya nopa tlanahuatijquetl huan nochi nopa tlayacanani mocualtlalijque para quichihuase senquistoc queja quinnahuati nopa tlanahuatijquetl. 14Huan quintitlanque miyac soldados para ma nechquixtica ipan nopa tlatzactli huan nechtemactilijque imaco Gedal'ias, icone Ahicam, tlen icone Saf'an, para ma nechhuica nochaj. Huan queja nopa na niitztoya tlatlajco noisraelita tlacajhua tlen noja mocajtoyaj ipan nopa tlali. 15Pero quema na, niJerem'ias, noja niitztoya ipan tlatzactli, huan quema aya hualayayaj nopa soldados tlen tlali Babilonia, TOTECO nechnojnotzqui huan nechilhui: 16"Xitlatitlani para quej ni ma quiilhuitij Ebed Melec tlen ehua Etiop'ia. Ma quiilhuitij: 'Quej ni na niquijtohua, nimoTECO, Tlen niquinyacana Noelhuicac Ejcahua Ma Tlatlanitij huan na tlen niininTeco israelitame: Na nijchihuas nochi tlen niquijtojtoc nijchihuilis ni altepetl. Nijchihuilis tlen fiero huan ax tlen cuali. Nijxolehuas moixpa, 17pero ta nimitzmanahuis. Ax timiquis ininmaco nopa tlacame tlen tiquinimacasi. NimoTECO niquijtohua. 18Na nijmanahuis moyolis huan nimitzmaquixtis. Huan ya ni elis queja motlaxtlahuil pampa timotemachi ipan na. Queja nopa nimoTECO niquijtohua.' "

will be added

X\