Jeremiah 37

1Quema mijqui Joacim tlen elqui tlanahuatijquetl tlen tlali Jud'a, icone, tlen itoca Con'ias, quitoquilijtosqu'ia ipan itequi. Pero Tlanahuatijquetl Nabucodonosor tlen tlali Babilonia ax quinejqui Con'ias ma eli tlanahuatijquetl. Huajca yajaya quitlapejpeni Sedequ'ias, icone Jos'ias huan quitlali queja tlanahuatijquetl ipan tlali Jud'a. 2Pero Tlanahuatijquetl Sedequ'ias, itlayacancahua huan nopa tlacame tlen noja mocajtoyaj ipan nopa tlali, ax quitlacaquilijque itlajtol TOTECO tlen na, niJerem'ias, niinintiocamanalojca niquinmacac. 3Pero Tlanahuatijquetl Sedequ'ias quititlanqui Jucal, icone Selem'ias, huan nopa totajtzi Sofon'ias, icone Maas'ias, para nechilhuitij ma nimomaijto ininpampa yajuanti. 4Huan na, niJerem'ias, ninemiyaya campa hueli pampa noja aya nechtzacuayayaj. 5Huan ipan nopa tonali isoldados nopa Fara'on tlen itoca Hofra hualajque tlen tlali Egipto huan monextijque ica tlani tlen tlali Jud'a para quimanahuise altepetl Jerusal'en. Huan huajca nopa soldados tlen tlali Babilonia mijcuenijque ipan altepetl Jerusal'en huan yajque quintehuitoj nopa soldados tlen tlali Egipto. 6Huan TOTECO nechnojnotzqui na, niJerem'ias, huan nechilhui: 7"Na tlen niininTECO huan niininDIOS israelitame niquijtohua: Xijnanquili nopa tlanahuatijquetl tlen tlali Jud'a tlen hualajqui para nechtlajtlanis tlachque panos: ica ni tlajtoli: 'Nopa Fara'on huan isoldados tlen hualajtoque nica tlen Egipto para mitzpalehuise, cholose huan mocuepase ipan inintlal. 8Huan nopa Babilonia ehuani sampa hualase huan quiyahualoquij ni altepetl Jerusal'en huan moaxcatise huan quitlatise. 9Huajca amo ximocajcayahua, niyon amo xiquijto para nopa Babilonia ehuani ya mohuejcatlalijque tlen ta pampa ax queja nopa elis. 10Huan yonque tiquintzontlamiltisqu'ia nochi nopa soldados tlen tlali Babilonia huan san mocahuasqu'iaj se quesqui tlen cocojtoque, yajuanti motlalanasqu'iaj ica yolic para mitztlanise huan quitlatise ni altepetl.' Queja nopa xiquilhuiti." 11Huan quema nopa soldados tlen tlali Babilonia mohuejcatlalijque tlen altepetl Jerusal'en para quintehuise isoldados Fara'on, 12na, niJerem'ias, nijchijqui campeca para niquisas Jerusal'en huan niyas ipan tlali Benjam'in para niquitas nopa tlali tlen nijcojtoya. 13Pero quema niajsito ipan nopa puerta ipan nopa tepamitl tlen itoca Benjam'in, niquitac itztoya nopano se tlayacanquetl tlen soldados tlen itoca Ir'ias, tlen icone Selem'ias, iixhui Hanan'ias. Huan yajaya nechitzqui huan nechilhui: --Ta tiyas para timosejcotilis ininhuaya nopa Babilonia ehuani. 14Huajca na niquilhui: --¡Axtle! Na ax quema nimoilhuijtoc para nimosejcotilis ininhuaya nopa caldeos. Pero Ir'ias ax nechtlacaquili. Yajaya nechitzqui huan nechhuicac iniixpa nopa tlayacanani. 15Huan nopa tlayacanani tlahuel cualanque ica na. Yeca tlanahuatijque ma nechhuitequica miyac. Teipa nechtzajque ipan nopa tlatzactli ipan tlen achtohuiya eliyaya ichaj nopa tlajcuilojquetl Jonat'an, pero ama quitequihuiyayaj queja se tlatzactli. 16Huan nopano tlalijtic campa m'as fiero nechtlali ipan tlen eliyaya queja se caja huan nopano nechpixtoyaj para miyac tonali. 17Pero teipa, Tlanahuatijquetl Sedequ'ias tlanahuati ma nechquixtica ixtacatzi huan ma nechhuicaca ipan icaltlanahuatil. Huan yajaya nechtlajtlani: --¿Tijpiya se yancuic tlajtoli tlen TOTECO? Huan na niquilhui: --Quena, TOTECO quiijtohua para mitztemactilis imaco nopa tlanahuatijquetl tlen tlali Babilonia. 18Huan nojquiya na, niJerem'ias, nijtlajtlani Tlanahuatijquetl Sedequ'ias para tlen nechtzajqui, niquilhui: --¿Tlachque tlaixpanoli nijchijqui ica ta, o ica motlayacancahua, o ica nochi tlacame para tinechtzajqui? 19Huan, ¿canque itztoque nopa tiocamanalohuani tlen mitzilhuijque para nopa tlanahuatijquetl tlen Babilonia ax hualasqu'ia para inmechtehuis? 20Huajca Tlanahuatijquetl, xijtlacaquili tlen na nimitztlajtlanis: Xinechchihuili se hueyi favor, amo xinechtitlani sampa ipan nopa fiero tlatzactli tlen eltoc ipan ichaj nopa tlajcuilojquetl Jonat'an para ax nimiquis nopano. 21Huajca Tlanahuatijquetl Sedequ'ias tlanahuati ma nechhuicaca ipan nopa tlatzactli tlen eltoc calixpa tlen nopa caltlanahuatili, huan tlanahuati para mojmostla ma nechmacaca se pedazo pantzi tlen yancuic quicojtoque campa nopa panchihuani. Huan ijquiyampa quichijque hasta tlanqui nochi pantzi ipan nopa altepetl. Queja nopa nechpixtoyaj ipan nopa tlatzactli tlen eltoc calixpa tlen nopa caltlanahuatili.

will be added

X\