Jeremiah 22

1Teipa TOTECO nechilhui: "Xiya ipan ichaj nopa tlanahuatijquetl tlen ni tlali Jud'a tlen mosehu'ia ipan isiya David tlen huejcajquiya huan xiquilhuiti: 2'Xijtlacaquili itlajtol TOTECO, ta titlanahuatijquetl tlen tlali Jud'a tlen timosehuijtoc ipan isiya Tlanahuatijquetl David tlen huejcajquiya. Nojquiya ma quitlacaquilica nochi motlatequipanojcahua huan motlacajhua. 3TOTECO inmechilhu'ia: Xijchihuaca nica tlen xitlahuac huan tlen cuali. Xiquinmanahuica tlacame tlen tlaijiyohu'iaj ininmaco tlen quintlaijiyohuilt'iaj. Amo xiquincajcayahuaca niyon xiquintlaxtequilica nopa sejcoyoc ehuani, niyon tlen icnotzi o tlen cahual sihuame. Xiquinchihuilica tlen cuali. Huan ayoc xiquinmictica tlacame tlen ax tleno quichijtoque. 4Intla inquicahuase nochi nopa fiero tlamantli tlen inquichihuaj, na nijmanahuis ni tlali huan sampa niquintlalis tlanahuatiani tlen mosehuise ipan isiya Tlanahuatijquetl David. Huan imotlanahuatijcahua calaquise ipan ipuertas ni altepetl ipan carros huan ipan cahuayojme ininhuaya inintlapalehuijcahua huan oncas paquilistli para nochi tlacame. 5Pero intla imojuanti ax inquichihuilise cuenta notlajtol, huajca na nimotestigojquetza noselti huan niquijtohua para ni caltlanahuatili mocahuas xolejtoc. Queja nopa niimoTeco niquijtohua.' " 6Pampa TOTECO quej ni quiijtojtoc tlen ni caltlanahuatili: "Niquicnel'ia ni caltlanahuatili queja nopa yejyectzi tlali Galaad huan queja nopa yejyectzi cuatitlamitl tlen xoxohuic tlen tlali L'ibano. Pero nijtlamixolehuas huan nijcahuas queja huactoc tlali huan ayoc aca itztos ipani. 7Na niquinnotzas tlacame tlen tlaxolehuaj para ma hualaca ica inintepos huan ma quixolehuaca. Yajuanti quiquixtilise nochi nopa yejyectzitzi cuatetomitl tlen nopa caltlanahuatili huan quintlalise ipan tlitl para ma tlatlaca. 8"Huan miyac tlacame tlen miyac tlaltini panose ipan ni altepetl tlen xolejtoc huan moilhuise se ica seyoc: '¿Para tlen TOTECO quichijqui ya ni? ¿Para tlen quixolejqui ni hueyi altepetl?' 9Huan quinnanquilise quej ni: 'Quixolejqui ni altepetl pampa tlacame tlen itztoyaj nica quiilcajque ininTECO. Quiixpanoque nopa tlajtoli tlen TOTECO Dios quichijtoya ininhuaya huan quinhueyichijque huan quintequipanojque totiotzitzi tlen sequinoc tlaltini.' " 10Amo xichocaca ipampa nopa Tlanahuatijquetl Jos'ias tlen mijqui, niyon amo ximocuesoca ipampa ya. M'as cuali xichocaca ipampa nopa tlanahuatijquetl tlen quihuicase ipan seyoc tlali huan ayoc quema mocuepas sampa ipan itlal campa tlacatqui. 11Pampa TOTECO camatitoc tlen Tlanahuatijquetl Salum, icone Jos'ias tlen pejqui tlanahuat'ia ipan tlali Jud'a quema mijqui itata. Huan quej ni quiijto: "Salum ayoc quema mocuepas nica ipan itlal, 12pampa miquiti ipan seyoc tlali campa quihuicaque para tlatequipanoti san tlapic." 13"Fiero elis para Tlanahuatijquetl Joacim pampa quinfuerzajhui ma tequitica chicahuac nopa tlacame tlen quichijchihuiljque icaltlanahuatil, pero ax quintlaxtlahui. Yeca nijtlatzacuiltis. 14Yajaya quiijto: 'Nimochijchihuilis se hueyi caltlanahuatili tlen quipiyas miyac cuartos huan nijchijchihuilis miyac ventanas. Nopa tlapamitl nijchijchihuas ica tiocuahuitl huan nijpas ica chichiltic.' 15"Pero Tlanahuatijquetl Joacim, ax tielis se cuali tlanahuatijquetl pampa tijpiya tiocuahuitl tlen mitzyahualohua ipan se yejyectzi caltlanahuatili. Motata Jos'ias huejcajqui tlanahuati pampa yajaya quichijqui tlen cuali huan ax quinchicoicneli itlacajhua. Quichijqui tlen xitlahuac ipan nochi tlamantli huan yeca nijtiochijqui. 16Yajaya quinpalehui tlen teicneltzitzi tlen ax tleno quipixque huan quintlajtolsencajqui queja xitlahuac. Huan nochi tlen motata quichijqui, quisqui cuali. ¿Ax ya nopa tlen quinequi quiijtos para nechixmati? Queja nopa niDIOS niquijtohua. 17"Pero ta, san timoilhu'ia quejatza huelis timoaxcatis tlamantli tlen sequinoc iniaxca huan san titlacajcayahua. Tiquinmict'ia tlen ax tleno quichijtoque. Tiquintlaijiyohuilt'ia tlen teicneltzitzi. Huan titlanahuat'ia chicahuac huan ica miyac cualantli." 18Huan nojquiya TOTECO quiijto ya ni tlen nopa tlatzacuiltili tlen quititlaniliyaya ipan Joacim, icone Jos'ias, tlen pejqui tlanahuat'ia quema mijqui itata. Quiijto: "Ma axaca chocas ipampa Joacim quema miquis. Ifamilia ax quiijtos: '¡Ay, panotoc tlen fiero huan mijqui toicni!' Huan itlacajhua ma ax mocuesoca quema quiitase ya mijqui inintlanahuatijca. 19San quitlepanitase itlacayo queja elisqu'ia se burro. San quihuahuatatzase para quiquixtise calixpa tlen altepetl Jerusal'en. Huan quicahuatij campa quitepehuaj tlasoli huan cuitlatl." 20InJerusal'en ehuani, xichocaca pampa ayoc onca nochi nopa tlaltini tlen inmechpalehuiyayaj. Xiquintemoti ipan tlali L'ibano, huan xiquintzajtziliti chicahuac ipan tlali Bas'an o xiquintemoti campa atemitl Jord'an. Nel'ia nimechilhu'ia para ayoc inquinpantise pampa nochi ya mijque. Huan ax mocajqui niyon se para inmechpalehuis. 21Quema initztoyaj ica cuali na nimechyolmelajqui tlen imopantisqu'ia teipa, pero imojuanti innechnanquilijque: "¡Amo xitechcuatotoni!" Huan queja nopa inquichijtihualajtoque hasta quema pejqui altepetl Jerusal'en. Senquistoc ax inquinequij innechcaquise. 22Huan ama nochi imotlayacancahua ixpolihuise. Elis queja quinhuicas se hueyi ajacatl huan quinhuicase nochi imohuampoyohua ipan sequinoc tlaltini para tlatequipanotij san tlapic. Huan huajca quena, inmomacase cuenta tlen nochi imotlajtlacolhua huan tlahuel inmopinahuase. 23Ama nopa tlanahuatijquetl paqui pampa itztoc ipan se yejyectzi caltlanahuatili tlen tlachijchihuali ica nopa tiocuatini tlen onca ipan tlali L'ibano. Pero ax miyac tonali polihui para yajaya chocas huan tlaijiyohuis queja se sihuatl tlen ya ajsic hora para quitlacatiltis icone. 24Huan ta tiJecon'ias tlen tiicone Joacim tlen tlanahuatijquetl tlen tlali Jud'a, yonque tielisqu'ia nopa anillo ica nosello tlen nijhuica ipan noma nejmatl, nimitzquixtis. 25Huan nimitztemactilis ininmaco tlen tlahuel tiquinimacasi tlen mitztemohuaj para mitzmictise. Nimitztemactilis imaco nopa Tlanahuatijquetl Nabucodonosor tlen tlali Babilonia huan ininmaco nopa caldeos. 26Ta huan monana tlen mitztlacatilti, nimechquixtis tlen ni tlali huan nimechtitlanilis ipan se tlali tlen ax inquiixmatij huan nopano inmiquise. 27Huan yonque tlahuel inquinequise inmocuepase sampa ipan ni tlali campa intlacatque, ax quema inmocuepase. 28Pampa ni tlacatl Jecon'ias ayoc tleno ipati. Eltoc queja se plato tlen tlapantoc huan tlen axaca quinequi. Yeca ya huan iconehua niquinquixtis huan yase ipan seyoc tlaltini tlen mopant'iaj huejca para tlatequipanotij. 29¡Nochi tlacame ipan ni tlali, xijtlacaquilica itlajtol TOTECO! 30TOTECO quiijtohua: "Xiquijcuilo para ni Jecon'ias ax quinpixqui iconehua. Quitlamipolo nochi tonali ipan iyolis. Huan niyon se icone ax quema mosehuis ipan isiya David para tlanahuatis ipan tlali Jud'a."

will be added

X\