1 Inmonajnanquil'iaj huan inmotehu'iaj se ica seyoc, pero ¿para tlen queja nopa? ¿Ica tlachque pehua? Inquichihuaj queja nopa, pampa ipan inmotlalnamiquilis inquinequij miyac tlamantli tlen ax cuali. 2 Inquinequij tlen sequinoc quipiyaj huan quema ax inhuelij inquicuij, huajca inquinmict'iaj. Intlaijixtocaj pampa sequinoc tlapijpiyaj huan yeca pehua inquinnajnanquil'iaj huan inmotehu'iaj se ica seyoc. Pero ax inquipiyaj nopa tlen inquinequij pampa ax inquitlajtlanijtoque Toteco ma inmechmaca. 3 Huan quemantzi, yonque inquitlajtlan'iaj Toteco ma inmechmaca se tlamantli, yajaya ax inmechmaca pampa inquitlajtlan'iaj ica se imoyolo tlen ax cuali, huan san inquinequij inquinempolose tlen inquitlajtlan'iaj. San inquinequij inquitequihuise ica tlen inmechpactisqu'ia. 4 Imojuanti ya inquicajtejtoque Toteco queja se tlacatl tlen quicahua isihua para momecatis. ¿Ax inquimatij, intla inmohuampochihuase ica tlen eltoc ipan ni tlaltepactli, huajca inmochihuase inincualancaitacahua Toteco? Sampa nimechilhuis, aqui hueli tlen quinequi mohuampochihuas ica ni tlaltepactli, mochihua icualancaitaca Toteco. 5 ¿Inmoilhu'iaj ax tleno quinequi quiijtos campa Itlajtol Toteco quiijtohua: "Itonal Toteco tlen Toteco quitlalijtoc para ma mocahua ipan toyolo techtlasmati huan quinequi ma ax tiquicnelica seyoc, san Toteco"? 6 Huan Toteco pampa hueyi iyolo ica tojuanti, ajachica techpalehu'ia ma ax tihuetzica. Huajca Itlajtol Toteco quiijtohua: "Toteco quincocol'ia tlen mohueyimatij, pero quipiya hueyi iyolo ica yajuanti tlen moicnochihuaj iixpa." 7 Huajca ximoicnochihua iixpa Toteco. Ximoquetzaca queja intemachme iixpa Axcualtlacatl huan amo xijchihuaca tlen quinequi xijchihuaca, huan yajaya inmechtlalcahuis. 8 Ximonechcahuica campa Toteco huan yajaya inmechnechcahuis. Cuali xijmachilica para intlajtlacolchihuani huan xijcahuaca imotlajtlacol. Inquipiyaj ome imoxayac pampa nojquiya inquiicnel'iaj ni tlaltepactli, huajca ximoyolpajpacaca. 9 Ximocuesoca miyac huan xichocaca ica tlen inquichihuaj. Inpaquiyayaj ipan inmotlajtlacolhua, pero ama ma mocuepa imotlahuetzquilis ica choquistli. Huan inmopaquilis ma mocuepa cuesoli ipampa nopa tlajtlacoli tlen inquichijtoque. 10 Ximoicnochihua iixpa Toteco huan yajaya inmechhueyitlalis. 11 Noicnihua, amo ximotlaijilhuica se ica seyoc. Se acajya tlen quitlaijilhu'ia iicni ipan Cristo huan quiijtohua ax cuali, quitlaijilhu'ia itlanahuatil Toteco tlen techilhu'ia ma timoicnelica, huan quiijtohua nopa tlanahuatili ax cuali. Pero ax totequi para tijtlajtolsencahuase nopa tlanahuatili, huan tiquijtose intla cuali o ax cuali. Tojuanti totequi para ma tijneltocaca tlen nopa tlanahuatili technahuat'ia. 12 Itztoc san setzi tlen techmaca nopa tlanahuatili, yajaya Toteco Dios, huan san yajaya quipiya tequihuejcayotl para tetlajtolsencahuas. San ya hueli temaquixtis o tetzontlamiltis. Pero imojuanti, ax inquipiyaj tequihuejcayotl para inquintlajtolsencahuase sequinoc. 13 Xijtlacaquilica noicnihua. Sequin imojuanti inquiijtohuaj: "Ama o mostla tiyase campa nopa altepetl huan timocahuase nepa se xihuitl. Tijpantise se tequitl huan tijtlanise cuali tomi." 14 Ax cuali incamatij queja nopa. Ax inquimatij niyon quentzi tlachque inmopantis mostla. Imoyolis san huejcahuas se tlalochtli. Eltoc queja se ayahuitl tlen nesi se tlalochtli ica ijnaloc huan nimantzi sampa quema tijtlachilis, ayoc nesi. 15 Huajca achi cuali inquiijtosqu'iaj: "Intla Toteco quinequi, huajca tiitztose huan titequitise, o tijchihuase ni tlamantli o nopa tlamantli." 16 Pero ama, incamatij queja tlen nel'ia mohueyimatij, huan ya nopa ax cuali. 17 Huan xiquilnamiquica, intla se acajya quimati tlen xitlahuac para quichihuas, pero ax quichihua, yajaya tlajtlacolchihua.
