Isaiah 64

1¡Cuali elisqu'ia intla tijtlaposqu'ia nopa elhuicactli huan titemosqu'ia! ¡Nochi tepetini temachtli huihuipicasqu'iaj moixtla! 2Huan mohueyitilis hualasqu'ia queja se tlitl tlen tlahuel totonic. Quintlatisqu'ia nochi tepetini huan quinmolonaltisqu'ia nochi huejhueyi atemitl hasta huaquisqu'iaj. Moixtla ta huihuipicasqu'iaj nochi tlaltini, huan huajca nochi mocualancaitacahua mitzixmatisqu'iaj para nel'ia tihueyi. 3Huejcajquiya quema titemoc, tijchijqui huejhueyi tlamantli tlen temajmati tlen tojuanti ax tijchiyayayaj. Huan nochi tepetini mojmolinijque nelchicahuac. 4Pampa hasta quema pejqui ni tlaltepactli, ax quema tijcactoque, niyon ax quema tiquitztoque intla onca seyoc Dios iyoca tlen ta. San ta tlen timopannext'ia para tiquinpalehuis nochi tlen motemach'iaj ipan ta. 5Ta tiquinsel'ia nochi nopa tlacame tlen ica paquilistli quichihuaj tlen xitlahuac huan tlen quitoquil'iaj moojhui tlen tlatzejtzeloltic. Pero ta ticualanqui tohuaya pampa tojuanti ax titlatzejtzeloltique. Nochi tojuanti senquistoc titlajtlacolchihuani huan tijchijtihualajtoque tlajtlacoli ipan nochi toyolis. ¿Huelis noja momaquixtise tlacame queja tojuanti? 6Nochi tojuanti tlahuel tiijtlacajtoque ica tlajtlacoli. Huan nochi tlamantli tlen tojuanti tijchihuaj tlen timoilhu'iaj xitlahuac, nesi queja se yoyomitl tlen soquiyo huan fiero moixtla hasta tetlaijiyalt'ia. Nochi tojuanti tiitztoque queja xihuitl tlen pilinij huan huetzij. Huan nochi totlajtlacolhua techtehu'ia queja elisqu'ia se ajacatl tlen techhuica huejca. 7Pero ama axaca quitzajtzil'ia motoca, niyon axaca mitztlajtlan'ia tlapojpolhuili. Yeca ta timohuejcatlalijtoc tlen tojuanti huan techtemactilijtoc ipan tlajtlacoli. 8Pero TOTECO, ta tiitztoc tiTotata. Tojuanti tiitztoque queja soquitl huan ta se tichachapalchijquetl. Ta titechchijchijqui nochi tojuanti ica moma. 9TOTECO, ax tlahuel xicualani tohuaya, niyon amo xiquilnamicto totlajtlacolhua para nochipa. Xitechtlachili huan xiquilnamiqui para nochi tojuanti timotlacajhua huan timoaxcahua. 10Moaltepehua tlen tlatzejtzeloltic ama quintlamixolejtoque. Jerusal'en mocajtoc queja huactoc tlali. 11Nopa tiopamitl tlen yejyectzi huan tlatzejtzeloltic campa mitzhueyimatiyayaj tohuejcapan tatahua, quitlamitlatijque. Huan nochi nopa tlamantzitzi yejyectzitzi tlen tlahuel techpactiyaya, quinxolejtoque. 12Huan teipa tlen nochi ya ni, TOTECO, ¿noja ax tleno tijchihuas? ¿Titechtlahuelcahuas para nochipa huan tijsenhuiquilis titechtlaijiyohuiltis?

will be added

X\