1 Nel'ia teicneltique nopa tlacame tlen yohuij tlali Egipto para quitemose tlapalehuili huan motemach'iaj ipan nopa cahuayos huan carros tlen nopano. Temachtli TOTECO quintlatzacuiltis pampa ax motemach'iaj ipan yajaya tlen Tlatzejtzeloltic tlen itztoc ininhuaya israelitame, niyon ax quitemohuaj para ma quinpalehui. 2 Pero TOTECO ica ihueyi tlalnamiquilis quititlanis huejhueyi tlaohuijcayotl huan ax moyolcuepas. Motlalanas para quintlatzacuiltis israelitame ipampa nochi tlamantli tlen ax cuali tlen quichijtoque huan nojquiya quintlatzacuiltis nopa sequinoc tlali ehuani tlen ininhuaya mopalehu'iaj. 3 Pampa nopa egiptome san tlacame huan ax yajuanti dioses. Inincahuayos san nacatl tlen ax tleno ipati. Nopa cahuayos ax neli tonaltzitzi tlen quipiyaj chicahualistli. Huajca quema TOTECO quitlalanas ima iniixtla, nochi yajuanti huetzise. Huetzise tlen quitemohuayayaj tlapalehuili huan tlen tepalehuisqu'iaj. Nochi ome huetzise san sejco. 4 Pero TOTECO nechilhuijtoc ya ni: "Quema se le'on yonque noja conetzi quitzontlamilt'ia se borrego, ax momajmat'ia yonque quitzajtzil'ia nopa tlamocuitlahuijquetl. Huan quisenhuiquil'ia quintzontlamilt'ia nopa borregojme. Queja nopa nojquiya elis quema na niimoTECO Tlen Niquinyacana Noelhuicac Ejcahua Ma Tlatlanitij nihualas para niquinmanahuis notlacajhua ipan Jerusal'en. Axaca huelis nechquetzas. 5 Na nipatlantinemis itzonpa altepetl Jerusal'en queja se tototl patlantinemi yahualtic itepasol. Teipa nitemos ipan nopa altepetl huan nijmocuitlahuis, nijmanahuis, nijmaquixtis huan nijchololtis." 6 Yeca inisraelitame, yonque tlahuel inmosisin'iaj huan fiero imoyolo, xihualaca huan ximocuepaca ica TOTECO. 7 Ajsis se tonali quema sese imojuanti inquinmajcahuase imoteteyohua tlen plata o oro tlen imojuanti intlajtlacolchijca tlacame inquinmachijchijtoque. 8 Huan tlacame quintzontlamiltise nochi nopa Asiria ehuani. Pero ax miquise ica machete tlen quitequihu'iaj tlacame, pero elis TOTECO tlen quinmictis. Huan nopa asirios ax quimatise tlachque quichihuase. Tlahuel momajmatise huan cholojtehuase. Huan quinhuicase nopa telpocame asirios tlen tlahuel quipiyaj chicahualistli para tlatequipanotij san tlapic. 9 Huan hasta nopa tlayacanca soldados tlen m'as quipiyaj tlanahuatili huihuipicase ica majmajtli huan cholojtehuase. Huan soldados quicajtehuase ininbanderas para cholose. Queja nopa quiijtohua TOTECO yajaya tlen quipiyas itli lementoc ipan itlaixpa ipan Jerusal'en huan ihorno para ipan tetlatzacuiltis.
