Isaiah 15

1Ya ni nopa tlajtoli tlen nijseli tlen tlachque ipantis tlali Moab: Ipan se yohuali quixolehuase altepetl Ar huan altepetl Kir huan mocahuas tlasosolijtoc ipan nopa tlali Moab. 2Nopa moabita tlacame ipan altepetl Dib'on yase inintiopa ica miyac cuesoli para mochoquilitij ipampa tlen ipantis altepetl Nebo huan Medeba. Nojquiya moximase huan quihuatanise inintentzo para quinextise tlahuel mocuesohuaj. 3Moquentise ininyoyo tlen cuesoli huan nejnentiyase ipan calles. Inincalpani huan ipan lugares campa mosentil'iaj tlacame caquistis tlen tlahuel chocase. 4Tzajtzise chicahuac nopa tlacame tlen altepetl Hesb'on huan Eleale hasta caquistis huejca ipan altepetl Jahaza. Huan nopa tlatehuiani tlen m'as motemacaj tlen tlali Moab chocase ica majmajtli. 5Ipan noyolo nichoca ipampa tlali Moab. Nochi itlacajhua cholohuaj hasta altepetl Zoar huan Eglat. Huan ixtlejcoj ipan altepetl Luhit huan chocatiyohuij. Caquisti choquistli hasta ipan nopa ojtli tlen ajsi ipan altepetl Horonaim. 6Onca tlaijiyohuilistli hasta huactoc nopa atemitl Nimrim. Atentli campa quipixqui xihuitl tlen xoxohuic, ama nochi san mocahua queja tlatlatoc. 7Nopa tlacame tlen cholohuaj quihuicaj nochi ininricojyo tlen huelij huan apanoj nopa atemitl campa onca nopa 'alamo cuatini. 8Nochi Moab ehuani chocaj tlen altepetl Eglaim hasta Beer Elim. 9Nopa atemitl tlen Dim'on eltoc chichiltic ica estli. Huan ax san nopa tlatzacuiltilistli quiselis Dim'on. Elis queja TOTECO quintitlanis leones para ma quincuaca nochi nopa tlacame tlen quinequiyayaj cholojtehuase huan nojquiya yajuanti tlen mocajtoque nopano huan noja yoltoque.

will be added

X\