HEBREOS 8

1Tlen nochi tlen nimechilhuijtihualajtoc, ya ni tlen m'as ipati: Tohueyi totajtzi Jesucristo ya mosehuijtoc nepa elhuicac inejmatl Toteco Dios campa m'as onca tlatlepanitacayotl. 2Nopona Jesucristo tequiti queja tohueyi totajtzi tiopan calijtic nepa ipan elhuicac campa nelnel'ia eltoc Campa M'as Tlatzejtzeloltic. Nopa tiopamitl Toteco Dios iselti quichijqui. Ax tlachijchihuali ica ininma tlacame. 3Nochi huejhueyi totajtzitzi quipiyayayaj inintequi para quimacase Toteco Dios tlacajcahualistli huan inieso tlapiyalime. Huan Jesucristo nojquiya monequiyaya quimacas Toteco se tlacajcahualistli. 4Intla Jesucristo itztosqu'ia ipan tlaltepactli, ax elisqu'ia se totajtzi, pampa nica ya itztoque totajtzitzi tlen temacaj tlacajcahualistli queja quiijtohuaj itlanahuatilhua Mois'es. 5Pero tijmatij nopa israelita totajtzitzi nica ipan ni tlaltepactli tequitij ipan se tiopamitl tlen san quiixcopinaj nopa tiopamitl tlen nelnel'ia eltoc nepa elhuicac, o huelis tiquijtose para san se ecahuilotl tlen nopa tlen nelnel'ia. Pampa huejcajquiya quema Mois'es quichihuayaya nopa tiopamitl tlen cuetlaxtli, Toteco quicamahui huan quiilhui: "Xijpiya cuidado para tijchihuas senquistoc queja nopa tiopamitl nepa elhuicac tlen nimitznextili iixcopinca nepa ipan tepetl Sina'i." 6Huan ama Cristo tohueyi totajtzi tlen itztoc nepa elhuicac nojquiya quipiya se tequitl tlen m'as cuali que inijuanti tlen tlatequipanohuaj ipan ni tlaltepactli, pampa yajaya quisencajqui se tlajtolsencahuali ica Toteco Dios huan titlacame tlen achi m'as cuali. Huan nopa yancuic tlajtolsencahuali techtencahuil'ia miyac tlamantli tlen m'as cuali que nopa tlajtoli achtohuiya. 7Intla nopa achtohui tlajtolsencahuali ica Toteco huan tlacame eltosqu'ia senquistoc cuali, huajca ax monectosqu'ia seyoc. 8Pero Toteco Dios iselti quiitac para tlacame tlen quipixtoyaj nopa achtohui tlajtolsencahuali, ax hueliyayaj quichihuaj tlen quiijtohua, huan yajaya ax quipacti huan quiijto: "Ajsis se tonali quema nijchihuas se yancuic tlajtolsencahuali ica tlacame ipan tlali Israel huan ipan tlali Jud'a. 9Ax elis queja nopa achtohui tlajtolsencahuali tlen nijchijqui ininhuaya ininhuejcapan tatahua quema niquinmatilanqui huan niquintlayacancuili para ma quisaca ipan tlali Egipto. Pampa inijuanti ax quichijque tlen quiijto nopa achtohui tlajtolsencahuali huan yeca niquintlalcahui. 10Pero ya ni elis nopa yancuic tlajtolsencahuali tlen nijchihuas ica israelitame. Ajsis tonali quema nijtlalis notlanahuatilhua ipan inintlalnamiquilis para ma quimatica tlaque nijnequi ma quichihuaca. Quena, niquijcuilos ipan ininyolo para ma quitlepanitaca. Huan na nielis niininTeco huan inijuanti elise notlacajhua. 11Huan axaca monequisoc quiilhuis ihuampo o iicni para monequi quiixmatis Tohueyiteco, pampa nochi nechixmatise hasta tlen m'as huejhueyi huan hasta tlen m'as pilsiltzitzi. 12Na niquintlasojtlas huan niquintlapojpolhuis nopa tlaixpanoli tlen quichijtoque, huan ayoc quema niquilnamiquis inintlajtlacolhua." 13Quema Toteco camatqui tlen se tlajtolsencahuali tlen yancuic, quiijtosnequi quichijqui para nopa achtohui tlajtolsencahuali ma ayoc quipiya itequi. Huan tlen ayoc quipiya itequi sosolihuis huan teipa polihuis.

will be added

X\