HEBREOS 4

1Huan ama ipan ni tonali Toteco noja technotza ma ticalaquica ipan itlasiyajcahualis. Huajca ma timomocuitlahuise para ax tiquiyocacahuase niyon se tlajtoli tlen Toteco techtencahuilijtoc para quejatza hueli timosiyajcahuase ipan ya. 2Pampa Toteco nojquiya techilhuijtoc tojuanti nopa cuali tlajtoli para huelis timosehuise san se queja huejcajquiya quinilhui nopa israelitame. Pero nopa cuali tlajtoli tlen Toteco quinilhui huejcajquiya ax quinpalehui, pampa ax quineltocaque. 3Pampa san tojuanti tlen nel'ia tijneltocaj Toteco huelis ticalaquise campa onca nopa tlasiyajcahualistli. Toteco Dios camati tlen inijuanti tlen ax quineltocaque huan quiijto: "Quema nicualanqui ininhuaya, nimotestigojquetzqui para ax calaquise campa onca nopa tlasiyajcahualistli tlen nitemaca." Huajca inijuanti ax calajque campa Toteco quinequiyaya ma calaquica yonque Toteco quitlamilti itequi hasta quema quichijchijqui tlaltepactli huan quinchiyayaya para inijuanti ma mosiyajcahuaca ihuaya. 4Pampa ijcuilijtoc ipan Itlajtol Toteco tlen Toteco quichijqui ipan nopa chicompa tonali, quiijtohua: "Toteco Dios mosehui ipan nopa chicompa tonali pampa ya quitlamiltijtoya nochi itequi." 5Pero ipan sejcoyoc nojquiya techpohuil'ia tlen nopa israelitame tlen ax calajque campa Toteco quinequiyaya, pampa Toteco Dios quiijto: "Ax calaquise campa nitemaca tlasiyajcahualistli." 6Huajca Toteco ax quincahuili nopa tlacame ma calaquica pampa ax quineltocaque yonque Toteco quinilhuijtoya icual tlajtol. Pero noja polihui para sequin tlacame ma calaquica huan mosehuise ihuaya. 7Yeca Toteco Dios quiixtlalijtoc seyoc tonal para ma calaquica campa onca tlasiyajcahualistli, pampa Toteco quiijto: "Ama ni tonal." Huan teipa quema ya panotoya miyac xihuitl, David tlayolmelajqui tlen Toteco quiijto huejcajquiya, huan quiijto: "Ama ni tonal, intla Toteco inmechnotzas ximosehuica ihuaya, xijtlacaquilica. Amo ximoyoltetilica, niyon amo xijtlahuelcahuaca itlajtol." 8Pero ax camati tlen tlali Cana'an, pampa intla Josu'e hueltosqu'ia quinmacatosqu'ia tohuejcapan tatahua tlasiyajcahualistli nopona, Toteco teipa ayoc quiijtosqu'ia para ama eltoc nopa tonal para tlacame ma calaquica ipan itlasiyajcahualis. 9Huajca noja mocahua se tlasiyajcahualistli para itlacajhua Toteco ipan ma calaquise. 10Huan aqui hueli calaquis campa Toteco temaca tlasehuilistli, mosiyajcahuas tlen nochi itequi san se queja Toteco mosiyajcajqui quema quitlamilti itequi para quichijchijqui tlaltepactli. 11Huajca ma tijchihuaca campeca para ticalaquise campa timosiyajcahuase ihuaya Toteco. Ma ax timochihuaca queja nopa israelitame tlen huetzque pampa ax quitlepanitaque Toteco huejcajquiya. 12Pampa Itlajtol Toteco yoltoc huan quipiya tlahuel miyac chicahualistli. M'as tlatequi que se machete tlen oncac tlatentili. Itlajtol Toteco calaqui hasta ipan tealma huan tetonal huan hasta campa m'as teyolijtic. Huan quipannext'ia intla cuali o ax cuali tlen timoyolilhu'iaj huan quipannext'ia tlen tijnequij tijchihuase. 13Ax tleno tlen Toteco quichijtoc huelis motlatis iixtla para ma ax quiita, pampa iixtla ya nempa nesi nochi tlen tijchihuaj huan tlen timoyolilhu'iaj. Huan se tonal monequi timoquetzase iixtla para tijmacase cuenta tlen nochi tlen tijchijtoque. 14Yeca tojuanti tijpiyaj se tohueyi totajtzi tlen ya ajsito ipan elhuicac, yajaya Jes'us, Icone Toteco. Huajca nochipa ma timotemachica ipan ya queja tiquijtojtoque tlamiyacapa para tijchihuaj. 15Nopa tohueyi totajtzi techtlasojtla quema ax tijpiyaj fuerza para tijchihuase tlen xitlahuac, pampa nochi tlamantli tlajtlacoli nojquiya quiyoltilanqui Jes'us queja tojuanti techyoltilana mojmostla, pero yajaya ax quema tlajtlacolchijqui. 16Huajca ma timonechcahuica ica tlatemachili campa mosehuijtoc Toteco tlen nochi quinahuat'ia. Huan ma ax timajmahuica tijtlajtlanise itlapalehuil, pampa temachtli techtlasojtlas huan techpalehuis ipan tlen hueli tlalochtli quema m'as monequi pampa hueyi iyolo ica tojuanti.

will be added

X\