HEBREOS 10

1Itlanahuatilhua Mois'es huan nochi tlen huejcajquiya quinnahuatijque tlacame ma quichihuaca elqui san queja se ecahuilotl tlen technescayotiliyaya nopa miyac cuali tlamantli tlen teipa nel'ia melahuac hualasqu'ia ica Cristo. Pero nopa miyac tlanahuatili ax temacac tlen melahuac. Huan yonque tlacame quimacayayaj Toteco tlacajcahualistli sesen xihuitl, nopa tlacajcahualistli ax huelqui quinchihua xitlahuaque iixpa Toteco. 2Intla quinchijtosqu'ia nopa tlacame xitlahuaque huan nel'ia quinyolpajpactosqu'ia iixpa, ax monectosqu'ia para ajachica quimacase Toteco m'as tlacajcahualistli, pampa ayoc quimachilijtosqu'iaj para noja quihuicaj tlajtlacoli iixpa. 3¡Pero axtle! Pampa quema inijuanti quihualicayayaj tlacajcahualistli sesen xihuitl, nopa tlacajcahualistli quinilnamiquiltiyaya tlen inintlajtlacolhua. 4Pampa inieso torojme huan chivojme ax hueli nel'ia tetlajtlacolquixtil'ia. 5Yeca Cristo, quema hualajqui ipan tlaltepactli, quiilhui Toteco Dios: "Nopa tlacajcahualistli huan inieso tlapiyalime ax elqui tlen nel'ia tijnequiyaya, huajca tijsencajqui notlacayo para nitlacatis queja se tlacatl huan nimitzmacas nopa tlacajcahualistli tlen melahuac quinamiqui. 6Pampa yonque tlacame quinmictiyayaj tlapiyalime huan quintlatiyayaj nejmaxtique moixtla, huan mitzmacayayaj sequinoc tlamantli tlacajcahualistli por inintlajtlacolhua, ax tijcualitac. 7Huajca na niquijtohua: 'Nica niitztoc noTeco. Nijchihuas nochi mopaquilis pampa queja nopa ijcuilijtoc ipan nopa Amatlapohuali para ma nijchihua.' " 8Achtohui Cristo quiijto para Toteco ax quipact'ia tlacajcahualistli, huan inieso tlapiyalime, huan tlapiyalime tlen quintlatiyayaj nejmaxtique ipan tlaixpamitl ipampa inintlajtlacolhua yonque nochi ya nopa eltoya senquistoc tlen quiijtojque itlanahuatilhua Mois'es para tlacame ma quimacaca Toteco. 9Huajca teipa Cristo quiilhui Toteco Dios: "Nica niitztoc noTeco. Nihualajtoc para nijchihuas tlen mopaquilis." Huajca ica ni quinext'ia para quitlamilt'ia nopa achtohui tlajtolsencahuali huan quipehualt'ia seyoc tlen m'as cuali. 10Huan ipaquilis Toteco elqui para Cristo ma techtlatzejtzelolchihua para nochipa quema san se huelta motemactili huan mijqui ipan cuamapeli. 11Nochi nopa totajtzitzi tlen itlanahuatilhua Mois'es mojmostla quinmictiyayaj tlapiyalime huan quimacayayaj Toteco queja tlacajcahualistli. Pero nopa tlacajcahualistli ax quema huelqui tetlajtlacolquixt'ia. 12Pero Cristo motemacac para miquis san se huelta por totlajtlacolhua para nochipa, huan teipa yajaya mosehui inejmatl Toteco Dios campa m'as onca tlatlepanitacayotl. 13Nopona Cristo quichiya hasta Toteco Dios quimacas nochi icualancaitacahua para ma quinnahuati. 14Pampa ica setzi tlacajcahualistli tlen temactili, techchijqui tixitlahuaque iixpa Toteco nochi tojuanti tlen techiyocacajtoya para tiiaxcahua. 15Tijmatij para melahuac ya ni, pampa Itonal Toteco techilhui san se ipan Itlajtol Toteco campa quiijtohua: 16"Ya ni nopa yancuic tlajtolsencahuali tlen nijchihuas ica israelitame. Nijtlalis notlanahuatil ipan ininyolo para ma quimatica tlaque nijnequi ma quichihuaca. Quena, niquijcuilos ipan inintlalnamiquilis para ma quitlepanitaca." 17Huan nojquiya Toteco quiijto: "Ayoc quema niquilnamiquis inintlajtlacolhua huan inintlaixpanolhua." Queja nopa quiijtohua Itlajtol Toteco. 18Huajca pampa Toteco ya techtlapojpolhuijtoc nochi totlajtlacolhua huan quinilcajtoc para nochipa, ayoc monequi tijmacase tlacajcahualistli para ma techtlapojpolhui. 19Huajca ama noicnihua, nochi tojuanti huelis ticalaquise ica temachili nopona Campa M'as Tlatzejtzeloltic ipan elhuicac campa itztoc Toteco Dios, pampa Jes'us quitoyajqui ieso topampa tojuanti. 20Quena, quema Jes'us temactili itlacayo huan mijqui, quitlapo nopa cortina tlen quitzacuayaya Campa M'as Tlatzejtzeloltic ipan nopa hueyi tiopamitl huan techtlapohuili se ojtli tlen yancuic huan tlen temaca yolistli. 21Huan pampa tijpiyaj tohueyi totajtzi, Jesucristo, tlen quipiya tlanahuatili ica nochi itlacajhua huan techpalehu'ia iixpa Toteco, 22ma timonechcahuica campa Toteco Dios ica toyolo tlen xitlahuac iixpa. Ma tijmatica para temachtli techselis, pampa eltoc queja Toteco quiijtzelojtoc toyolo tlen elqui fiero ica ieso Cristo para ma tielica titlapajpactique iixpa. Nojquiya quipajpactoc totlacayohua ica atl tlen senquistoc cuali. 23Huajca ma ax caxanis totlaneltoquilis, pero ma tijneltocaca para temachtli tijselise nochi nopa tlatiochihualistli tlen tiquinilhuijtoque sequinoc para tijchiyaj tijselise, pampa Toteco temachtli techmacas nochi tlen techtencahuilijtoc. 24Ma tijtemoca quejatza timosemacase se ica seyoc para m'as timoicnelise huan tijchihuase tlen cuali. 25Ximomocuitlahuica para ax inquicahuase inmosentilise ininhuaya sequinoc tlaneltocani. Amo xijchihuaca queja sequinoc tlen ayoc mosentil'iaj. Quinamiqui ximosentilica huan ximosemacaca achi m'as ama pampa ya inquiitaj monechcahu'ia para sampa hualas Jesucristo. 26Intla se tlacatl tlajtlacolchihuas ica ipaquilis quema ya quiixmajtoc tlen melahuac, ayoc oncas seyoc tlacajcahualistli tlen huelis quimacas Toteco ipampa itlajtlacolhua. 27Quena, intla quihuejcamajcahuas itlacajcahualis Cristo, san hueli quichiyas se temajmatili para Toteco quitlajtolsencahuas huan quitlatzacuiltis ipan nopa hueyi tlitl tlen quintzontlamiltis icualancaitacahua Toteco. 28Huejcajquiya quema se tlacatl quiixpano se itlanahuatil Mois'es huan ome o eyi tlacame quiitaque huan quiteilhuijque, huajca nopa tequihuejme quimacaque tlanahuatili para ma quimictica, niyon ma ax quitlasojtlaca. 29Pero ama se tlacatl tlen quihuejcamajcahuas Icone Toteco, monequi ma quiseli se tlatzacuiltili tlen noja m'as hueyi. Quena, Toteco tlahuel quitlatzacuiltis tlen moilhuis ax tleno ipati tlen Cristo quichijqui quema quitoyajqui ieso para techtlapajpacchihuas tlen totlajtlacolhua huan para quipehualtis nopa yancuic tlajtolsencahuali ica Toteco. Nopa tlacame chicahuac quitlaijilhu'iaj Itonal Toteco tlen technextil'ia quejatza Toteco quipiya hueyi iyolo ica tojuanti. 30Tojuanti tijmatij para Toteco Dios quiijto: "Na tlen nechnamiqui nitecuepilis tlen ax cuali quichijtoque huan quena, niquintlaxtlahuis." Huan nojquiya ijcuilijtoc ipan Itlajtol Toteco campa quiijtohua: "Toteco quintlajtolsencahuas itlacajhua." 31¡Nel'ia temajmati elis para tlen huetzis imaco Toteco tlen yoltoc para ma quitlatzacuilti! 32Pero xiquilnamiquica nopa yejyectzi tonali quema inquicajque itlajtol Toteco. Yonque sequinoc inmechtlaijiyohuiltiyayaj, imojuanti inmocajque intemachme ipan Toteco. 33Quemantzi tlacame inmechpinahualtiyayaj huan inmechmaquiliyayaj tlamiyacapa. Huan quemantzi inmechhuicaque para xijtlachilica quema chicahuac quintlaijiyohuiltiyayaj sequinoc imoicnihua. 34Quena, nojquiya intlaijiyohuijque ica nopa tlaneltocani tlen quintzactoyaj. Huan quema tlacame inmechquixtiliyayaj tlamantli tlen imoaxca, inpaquiyayaj pampa inquimatiyayaj para nepa elhuicac inmechchiyayaya miyac tlatiochihualistli tlen m'as cuali huan tlen m'as ipati. 35Huajca xijsenhuiquilica ximotemachica ipan Toteco yonque intlaijiyohu'iaj, pampa yajaya inmechmacas se hueyi tlaxtlahuili nepa elhuicac. 36Pero ama, monequi xijpiyaca imoyolo huan xiquijiyohuica nochi tlen inmechpanotihuala, huan quema ya inquichijtose nochi ipaquilis Toteco, yajaya temachtli inmechmacas nochi tlen inmechtencahuilijtoc. 37Pampa Itlajtol Toteco quiijtohua: "Ica se quentzi tonali hualas yajaya tlen quiijto tlajcuiloli para hualasqu'ia. Yajaya, ax huejcahuas. 38Se tlen itztoc xitlahuac iixpa Toteco, itztos para nochipa pampa quineltoca. Pero intla se moicancuepas, ax nipaquis ihuaya." 39Pero tojuanti ax tiitztoque ininhuaya tlen moicancuepaj huan quicahuaj Toteco huan mocuapolose. ¡Axtle! Tojuanti tiitztoque ininhuaya tlen quineltocaj Toteco para ma quinmaquixtilis inialma.

will be added

X\