HEBREOS 1

1Huejcajquiya Toteco Dios quinnojnotzqui tohuejcapan tatahua miyac huelta ica itiocamanalojcahua. Quemantzi quinnojnotzqui itiocamanalojcahua ipan temictli, quemantzi ica tlanextili huan quemantzi itztoya nechca inijuanti quema quincamahuiyaya. 2Pero ama ipan ni itlamiya tonali Toteco technojnotztoc ica Icone tlen yajaya techtitlanili. Toteco Dios quitequimacac Icone ma quichijchihua nochi tlamantli tlen onca huan quiijtojtoc para nochi tlen onca eltoc iaxca. 3Itlatlanex Toteco Dios tlahu'ia ipan Icone pampa Icone itztoc san se ica ya. Quena, Jesucristo itztoc queja iixcopinca tlen technextil'ia quejatza itztoc Toteco Dios. Ica itlajtol, Icone Toteco quimajcuitoc nochi tlen onca ipan tlaltepactli huan elhuicactli campa eltoc, pampa itlajtol tlahuel quipiya chicahualistli. Yajaya mijqui para techpajpacas tlen totlajtlacolhua huan teipa yajqui elhuicac huan mosehuito inejmatl Toteco Dios campa m'as onca tlatlepanitacayotl. 4Ya ni technextil'ia para Icone Toteco itztoc m'as hueyi que nochi elhuicac ehuani, pampa Toteco quimacac Icone tequihuejcayotl tlen onpano m'as hueyi que nopa tlen ielhuicac ejcahua quipiyaj. 5Toteco Dios ax quema quiilhuijtoc se elhuicac ejquetl tlen quiilhui Icone. Quiijto: "Ta tiNocone. Ama nitlayolmelahua tlamiyacapa para na nimoTata." Huan ax quema quiijto tlen se elhuicac ejquetl: "Na nielis iTata huan yajaya elis Nocone." 6Huan sejcoyoc ipan iTlajtol Toteco ijcuilijtoc nopa tlen Toteco quiijto quema quiixnextis Icone tlen quipiya hueyi tlatlepanitacayotl ipan ni tlaltepactli. Quiijto: "Ma quihueyichihuaca nochi noelhuicac ejcahua." 7Pero tlen inintequi elhuicac ehuani, quiijtohua: "Toteco Dios quinchijqui ielhuicac ejcahua ma itztoca tonaltzitzi. Quena, quintequihu'ia queja tlayolmelahuani tlen itztoque queja tlilelemectli." 8Pero quema Itlajtol Toteco camati tlen Icone, quiijto: "Ta tiDios, titlanahuatis para nochipa huan ax quema tlamis motlanahuatilis. Titlatlajtolsencahuas senquistoc xitlahuac huan temachtli. 9Mitzpact'ia nochi tlen cuali huan tijcocol'ia nochi tlen ax cuali. Yeca Toteco Dios, yajaya tlen moTeco, mitztequitlalijtoc tiitlanahuatijca huan mitzmacatoc m'as paquilistli que nochi sequinoc." 10Nojquiya Toteco Dios quiilhui Icone: "NoTeco, ipan ipejya nochi tlen onca, ta tijchijchijqui itlatzinpehualtil tlaltepactli. Ta tijchijchijqui nochi hasta elhuicactli ica moma. 11Nochi inijuanti tlamise, pero ta, tiitztos para nochipa. Tlaltepactli huan elhuicactli sosolihuise queja sosolihui se yoyomitl. 12Tiquinmimilos queja elisqu'ia se tlaquemitl tlen sosoltic huan ya ajsic hora para tlantiyas. Pero ta, noTeco, tielis san se para nochipa. Ax quema tihuehuejtiyas, niyon ax quema tlamis monemilis." 13Huan Toteco Dios ax quema quiilhui se elhuicac ejquetl queja quiilhui Icone ipan ni tlajtoli: "Ximosehui nica nonejmatl campa onca m'as tlatlepanitacayotl, hasta nijchihuas para tiquinnahuatis nochi mocualancaitacahua." 14Ielhuicac ejcahua Toteco itztoque san tonaltzitzi tlen tlatequipanohuaj. Quena, Toteco quintitlantinemi para quinpalehuise huan quinmocuitlahuise nochi tlacame tlen Toteco quintlapejpenijtoc para quinmaquixtis tlen inintlajtlacolhua.

will be added

X\