Habakkuk 1

1Ya ni nopa tlajtoli tlen TOTECO nechnextili na niHabacuc, nitiocamanalojquetl. 2"TOTECO, ¿hasta quema tlamis nimitztzajtzilis xinechpalehuiqui huan ax tinechtlacaquilis? ¿Hasta quema tlamis nimitztzajtzilis para ayoc ma mosisinijca tlacame, huan axaca hualas para techmaquixtis? 3¿Para tlen tijchihua ma niquita tlajtlacoli huan tlen ax xitlahuac mojmostla? Campa hueli nechyahualohuaj tlacame tlen tlaxolehuaj huan tlen temajmat'iaj. Mojmostla mosencualanijtoque huan motehu'iaj. 4Huan yeca nopa tlanahuatili ayoc quichihuaj inintequi huan nopa tequitini ayoc tetlajtolsencahuaj xitlahuac queja tlanahuat'iaj. Tlacame tlen fiero ininnemilis momiyaquilijtoque hasta quionpano ininmiyaca tlen cuajcualme huan yeca tlayacanani ayoc quichihuaj tlen xitlahuac. San tlacajcayahuaj ipampa se tlaxtlahuili." 5"Xiquintlachilica nopa sequinoc tlaltini tlen inmechyahualohuaj huan ximomajmatica pampa nijchihuas se tlamantli ipan ni tonali pero ax inquineltocase yonque se inmechpohuilis para panotoc. 6Quena, na niquintlalanas nopa caldeos tlen itztoque ipan se tlali tlen tlacame tlen fiero ininnemilis huan tlen mosisin'iaj. Yajuanti quinpact'ia nentinemise campa hueli ipan nochi tlaltepactli para moaxcatise caltini huan tlaltini tlen sequinoc iniaxca. 7Yajuanti tlahuel mahuililme huan temajmat'iaj. Quichihuaj san tlen quinequij huan axaca hueli quintlacahualt'ia. 8Inincahuayos motlalohuaj m'as chicahuac huan ax queja nopa tecuanime tlen inintoca leopardos. Tlacame tlen nopano ehuani achi m'as mosisin'iaj que nopa lobos tlen nemij ica tlayohua. Nopa tlacame tlen tlejcotoque cahuajtipa hualahuij nelchicahuac tlen se tlali tlen huejca. Temotihuetzij nelchicahuac queja se cuajtli para quiitzquis se piyo huan nimantzi quistehuas para quicuati. 9"Nochi yajuanti hualahuij para tlatehuise. Campa hueli yohuij nochi temajmat'iaj. Quinitzquitihualahuij tlacame queja imiyaca xali para quinhuicase quintequipanoltitij. 10"Quinpinajt'iaj tlanahuatiani huan quinpinahualt'iaj tlayacanani. Quinhuetzquil'iaj nochi altepetini tlen moyahualojtoque ica tepamitl tlen tilahuac para quinmanahuisqu'ia. Huan san quimontonohuaj tlali iica nopa tepamitl huan ipan tlejcoj para calaquise ipan nopa altepetl huan quinitzquise itlacajhua. 11Teipa panoj huan yohuij queja elisqu'ia se ajcomalacatl, pampa senquistoc tlaxolehuaj. Quihuicaj miyac tlajtlacoli pampa san quiitaj ininchicahualis queja elisqu'ia ininteco." 12"¡TOTECO, hasta huejcajquiya ta tiitztoya huan nochipa tiitztoc! ¡Ta tinoTeco Dios tlen tiTlatzejtzeloltic! Ax timiquise. Melahuac ta tiquinpalehuijtoc nopa caldeos para techtlatzacuiltise huan techxitlahuase ininpampa nopa huejhueyi tlajtlacoli tlen tijchijtoque. Pero ta, tiTOTECO, tlen titemachtli huan titechmanahuis. 13Ta senquistoc titlapajpactic huan ax tijnequi tiquitas tlen ax cuali. Ta ax tijnequi tiquitas tlajtlacoli. Huajca ¿para tlen san tiquintlachilijtoc quema fiero tlacame techtlaijiyohuilt'iaj? ¿Para tlen ax tleno tijchihua quema nopa ax cuajcualme quintzontlamilt'iaj tlen m'as cuajcualme que yajuanti? 14"¿Para tlen techitaj queja tielisqu'iaj timichime tlen itztoque ipan hueyi atl para tlacame ma quinitzquica huan ma quinmictica? Tijcahuil'ia tlen hueli techmictis. Titechchihuilijtoc queja cohuame tlen ax quipiyaj inintlanahuatijca para quinmanahuis. 15Tlali Babilonia ehuani quinquixt'iaj nochi tlacame ica ininteposchijcol huan quinsentil'iaj nochi ipan ininmatla. Huan ica ya nopa tlahuel mopaquilismacaj. 16Teipa quihueyichihuaj ininmatla huan quitlatil'iaj copali. Moilhu'iaj para ica ininmatla moricojchijtoque huan cuali tlacuajtoque. 17"¿Tijcahuilis para queja nopa ma quichihuaca para nochipa? ¿Tiquincahuilis ma quisenhuiquilica quintzontlamiltise tlaltini ehuani campa hueli ica nochi inincualancayo?

will be added

X\