Genesis 9

1Huan Toteco Dios quitiochijqui No'e huan iconehua ica ni tlajtoli: "Xiquinpiyaca miyac imoconehua huan xijtemitica ni tlaltepactli. 2Nochi tlapiyalime ipan tlaltepactli inmechimacasise. Inquipiyase tlanahuatili ica nochi totome ipan ajacatl, huan nochi tlapiyalime ipan tlali huan nochi tlen itztoque ipan hueyi atl. 3Huelis inquincuase nochi tlapiyalime pampa nimechmaca nochi tlen itztoque para imotlacualis queja nojquiya nimechmacatoc nochi xihuitl tlen xoxohuic. 4Pero onca se tlamantli tlen ax cuali para inquicuase. Amo xijcuaca nacatl ica ieso pampa iyolis se tlapiyali eltoc ipan ieso. 5Amo xitemicti. Intla se acajya quimictis se tlacatl, monequi miquis. Huan intla se tlapiyali quimictis se tlacatl, monequi miquis. Quena, monequi se tlacatl nechmacas cuenta tlaque quinchihuilijtoc sequinoc tlacame. 6"Intla acajya quimict'ia se tlacatl, monequi sequinoc quimictise nopa temictijquetl. Pampa Toteco Dios quichijchijtoc se tlacatl queja ya itlachiyalis. 7Pero imojuanti, xiquinpiyaca miyac imoconehua. Quena, ximomiyaquilica huan xijtemitica ni tlaltepactli, ica imoixhuihua huan imoteipa ixhuihua." 8Teipa Toteco Dios quinilhui No'e huan iconehua: 9"Ama nijcahua notlajtol ica imojuanti huan imoteipa ixhuihua, 10huan ica nochi totome, huan nochi tlapiyalime tlen itztoque ipan tlaltepactli huan ica nochi tlen quisque ipan cuacanahua imohuaya. 11Nijcahua notlajtol para ayoc quema niquinpolihuiltis sampa nochi tlacame huan nochi tlapiyalime ica miyac atl campa hueli. Ayoc quema oncas tlahuel miyac atl tlen momanas campa hueli ipan nochi tlaltepactli para quixolehuas. 12Ya ni elis nopa tlanextilijcayotl tlen nopa tlajtoli tlen nijchihua imohuaya huan ininhuaya nochi tlapiyalime para nochipa. Quinextis ayoc quema oncas tlahuel miyac atl hasta quinmictis nochi tlacame huan tlapiyalime. 13Nijtlalijtoc noacosamalo ipan mixtli huan eltos queja se tlanextilijcayotl tlen nopa tlen nijtencahuil'ia ni tlaltepactli. 14Huan quema nijchihuas ma huala mixtli ipan tlaltepactli, noacosamalo monextis ipan nopa mixtli, 15huan huajca niquilnamiquis notlajtol tlen nijcajqui imohuaya huan ininhuaya nochi tlamantli tlapiyalime. Ayoc quema oncas tlahuel miyac atl campa hueli hasta quinpolos nochi tlamantli tlen itztoque. 16Pampa quema nopa acosamalotl monextis ipan mixtli, niquitas huan niquilnamiquis nopa tlajtoli tlen na, niimoTeco Dios, nijchijtoc para nochipa imohuaya huan ininhuaya nochi tlacame huan nochi tlapiyalime tlen itztoque ipan ni tlaltepactli. 17Ni acosamalotl elis nopa tlanextilijcayotl tlen nopa tlajtoli tlen nijcajtoc ininhuaya nochi tlacame huan tlapiyalime ipan tlaltepactli." Queja nopa Toteco Dios quiilhui No'e. 18Iconehua No'e tlen ihuaya quisque ipan cuacanahua elque Sem, Cam huan Jafet. Huan Cam elqui itata Cana'an. 19Tlen ni ieyi telpocahua No'e quisque nochi tlacame tlen teipa momoyajque campa hueli ipan tlaltepactli para quitemitise. 20Huan No'e tlen momatqui miltequiti, quitojqui se xocomeca mili. 21Huan teipa se tonal quiic miyac xocomeca atl huan ihuintic. Huan huetzqui xolotl icalijtic ipan ichaj tlen tlasencahuali ica yoyomitl. 22Huan quema Cam, tlen eliyaya itata Cana'an, quiitac para itata huetztoya xolotl, yajqui quinpohuilito iicnihua. 23Huajca Sem huan Jafet quicuique se yoyomitl huan quitlalijque iniajcolpa huan icanejnentiyajque para ax quiitase inintata xolotl. Huan quema calajque ipan icalijtic, tlachixtiyajque seyoc lado para ax quiitase No'e huan quitzajque No'e ica nopa yoyomitl. 24Huan quema No'e isac huan ayoc ihuintitoya, quimatqui tlen Cam, icone teipa ejquetl, quichijtoya huan quimatqui para ax quitlepanitztoya. 25Huajca quiijto: "¡Toteco Dios ma quitelchihua Cana'an! ¡Ma elis inintlatequipanojca sequinoc, huan axaca ma quitlepanitas!" 26Huan No'e nojquiya quiijto: "Ma tijhueyitlalica TOTECO tlen Sem quihueyimati. Huan Cana'an ma elis itlatequipanojca Sem." Huan nojquiya quiijto: 27"Toteco Dios m'as ma quihueyili itlal Jafet. Huan iteipa ixhuihua Jafet ma itztoca ininhuaya iteipa ixhuihua Sem. Huan Cana'an ma eli inintlatequipanojca." 28Huan quema tlanqui nopa miyac atl, No'e noja itztoya seyoc 350 xihuitl, 29huan mijqui quema quipiyayaya 950 xihuitl.

will be added

X\