Genesis 49

1Huan Jacob quinnotzqui itelpocahua huan quinilhui: "Ximonechcahuica campa na huan nimechilhuis tlen inmechpanos teipa. 2Noconehua, ximonechcahuica huan xinechcaquica. Na niJacob huan innoconehua. Xinechtlacaquilica niimotata, Israel. 3Ta Rub'en, tinoachtohui cone. Tieliyaya tinochicahualis huan quema titlacatqui eltoya queja nopa achtohui iselca nofuerza. Tijpiyas miyac chicahualistli huan tlatlepanitacayotl. 4Pero ayoc tielis tlen m'as tihueyi, pampa tiitztoc queja atl tlen tehuahuatatza. Queja nopa eltoc pampa tinechpinahualti quema timotejqui ipan notlapech ihuaya notlatequipanojca. 5Sime'on huan Lev'i nel'ia inicnime pampa san se imonemilis. Imomachetes inquitequihu'iaj san para tlatehuilistli. 6¡Ax quema nijnequi nijcaquis imotlajtol, niyon ax quema nimosentilis imohuaya! Pampa quema incualaniyayaj, intemictijque, huan san pampa inquinejque, inquinmetzpostejque torojme. 7¡Tlatelchihualtic, quena, tlatelchihualtic imocualancayo, pampa innelfierojtique huan ax intetlasojtlaj! ¡Nimechsemanas huan initztose campa hueli ipan nochi tlali Israel! 8Ta tiJud'a, moicnihua mitzpaquilismacase. Huan tiquinitzquis mocualancaitacahua ininquechtla huan tiquintlanis. Hasta moicnihua motlancuaquetzase para mitztlepanitase. 9Ta tiJud'a, tielis queja icone se tecuani tlen mocuepa pactoc ipampa nopa tlapiyali tlen quimictijtoc. Tielis queja se le'on tlen mopachohua huan moteca tlalchi, huan quichiya tlaque quiitzquis. Tielis queja se sihua le'on tlen nel'ia quipiya fuerza. Axaca mitzcuesolmacas. 10Axaca huelis quiquixtilis nopa tlanahuatili tlen moteipa ixhuihua quipiyase. Niyon quinquixtilis nopa tepos cuatopili tlen quipiyase para ica tetlatzacuiltise. Quipiyase tlanahuatili para nochipa. Huan teipa hualas moteipa ixhui tlen temacas tlasehuilistli. Yajaya tlen nel'ia iaxca nopa tepos cuatopili huan nopa tlanahuatili para tlanahuatis. Huan tlacame ipan nochi tlaltini campa hueli quichihuase tlen yajaya quinilhu'ia. 11Elis nelrico huan campa hueli oncas xocomeca mili tlen iaxca. Quiilpis iburro ipan tlen hueli xocomeca macuayotl tlen quinequis, huan intla quinequi, quiilpis ipilconeburrojtzi ipan nopa xocomeca cuamayitl tlen m'as cuali. Quipiyas miyac xocomeca atl hasta nesis queja huelis ica quichicuenis iyoyo. Quena, hasta mocahuas quipiyas iayo xocomecatl tlen temacas nochi imil. 12Iixtiyol elis m'as yayahuic que xocomeca atl, huan itlancochhua m'as chipahuac que lechi. 13Ta tiZabul'on, moteipa ixhuihua itztose iteno hueyi atl, huan nopano ajsise miyac barcos. Motlal ajsis hasta tlali Sid'on. 14Ta tiIsacar, moteipa ixhuihua elise tejtetique queja se tlapiyali tlen quimati tlamama etic. Mosiyajcahuase campa quintzacuaj borregojme. 15Quema quiitase quejatza nel'ia cuali imotlal para ipan inmosehuise huan quejatza nel'ia yejyectzi, huajca motlancuaquetzase huan mocuitlapantise para tlamamase. Huan niyon ax molinise moteipa ixhuihua quema quinchihuase ma tlatequipanoca san tlapic. 16Ta tiDan, ta huan moixhuihua intetlajtolsencahuase queja quinamiqui pampa inelise se hueyi familia ipan tlali Israel. 17Moteipa ixhuihua elise queja se cohuatl tlen itztoc ojtipa, huan quintzacan'ia inincotztla cahuayojme huan quincuamajcahua tlen tlejcotoque ipan cahuayojme. 18¡TOTECO! Nijchiya para tinechmanahuis. 19Ta tiGad, miyac soldados hualase huan quintehuise moteipa ixhuihua, pero teipa quintojtocatiyase. 20Ta tiAser, moteipa ixhuihua quipiyase tlacualistli tlen cuali. Quena, temacase tlacualistli tlen ajhuiyac queja tlen quicuaj huejhueyi tlanahuatiani. 21Ta tiNeftal'i, moteipa ixhuihua elise queja se masatl tlen nemi campa quinequi huan tlen quintlacatilt'ia yejyectzitzi pilconemasatzitzi. 22Ta tiJos'e, moteipa ixhuihua elise queja se cuali cuahuitl tlen quitoctoque campa ameli. Temaca miyac itlajca huan imacuayohua moscalt'ia miyac hasta quionpano nopa tepamitl tlen tilahuac. 23Tlacame quincualancaitase moteipa ixhuihua, huan quinmajcahuilise cuatlamintli huan nochipa quinmacase cuesoli. 24Pero moteipa ixhuihua quiquetzase inincuahuitol xitlahuac, huan ax huihuipicase ininma quema quitequihuise pampa elise tejtetique. Quena, tlatlanise pampa noTeco Dios, yajaya tlen quipiya nochi chicahualistli quinpalehuis. Yajaya quinmocuitlahuis pampa yajaya totlamocuitlahuijca tiisraelitame. Yajaya nopa Hueyi Tetl tlen techmanahuijtoc miyac huelta. 25Quena, ma inmechpalehuis ininTeco mohuejcapan tatahua. Ma inmechtiochihua ta huan imoteipa ixhuihua yajaya Toteco Tlen Quipiya Nochi Chicahualistli. Ma quintiochihuas moteipa ixhuihua ica miyac tlatiochihualistli queja atl tlen huala tlen huejcapa ipan elhuicac, huan tlen huala huejcatla ipan hueyi atl huan quichihuas ma moscaltis imomilhua. Ma mitztiochihuas ta huan moteipa ixhuihua huan imosihuajhua. Ma inmechmacas miyac imoconehua tlen moscaltise ica cuali. Ma tlahuel momiyaquilica imotlapiyalhua. 26Quena, Jos'e, Toteco ma mitztiochihua, yajaya tlen noTeco na, nimotata. Ni tlatiochihuali momiyaquilis hasta ajsis ipan nopa tlachiquili tlen huejcahuase para nochipa. Nochi ya ni elis nopa tlatiochihualistli tlen ta tijpiyas, Jos'e, pampa Toteco mitziyocatlali tlen moicnihua para tielis tiinintlanahuatijca. 27Ta tiBenjam'in, moteipa ixhuihua tlatlanise queja se tepechichi. Ica ijnaloc quicuase tlen quimictijtoque, huan hasta tiotlac quipiyase tlen mocajtoc para temajmacase." 28Ya ni nopa 12 itelpocahua Israel huan nopa tlatiochihuali tlen inintata quinmacac. Quinilhui tlen quinamiqui para sesen quiselis pampa Toteco quinextili tlen panos ica ininteipa ixhuihua sese inijuanti. 29Nojquiya Jacob quinmacac itelpocahua ni tlanahuatili: "San quentzi polihui para nimiquis. Xinechtlalpachoca ihuaya nohuejcapan tatahua ipan nopa tlacacahuaya tlen eltoc ipan itlal Efr'on nopa heteo. 30Quena, xinechtlalitij nopano ipan tlali Cana'an ipan nopa tlacacahuaya ipan nopa mila tlen itoca Macpela, iixtla Mamre. Nopa tlen Abraham quicohuili Efr'on para ipan ma quintlalpachoca nochi iteixmatcahua. 31Nopano quintoctoque Abraham ihuaya isihua, Sara, huan Isaac huan isihua, Rebeca, huan nopano nijtlalpacho Lea. 32Nopa tlali huan nopa tlacacahuaya tlen eltoc nopano quincohuili nopa heteo tlacame." 33Huan quema Jacob tlanqui quinnahuat'ia itelpocahua, motejqui ipan itlapech huan mijqui.

will be added

X\