1 Huan Israel, tlen nojquiya itoca eliyaya Jacob, quisqui ipan ojtli ica nochi tlen quipiyayaya. Huan quema ajsito ipan Beerseba, quimacac se tlacajcahualistli Toteco Dios, yajaya tlen nojquiya iTeco itata, Isaac. 2 Huan nopa tlayohua Toteco quicamahui Israel ipan se temictli, huan quinotzqui ica itoca Jacob. Huan Jacob quinanquili: --Nica niitztoc, noTeco. 3 Huajca Toteco Dios quiilhui: --Na niDios nimoTeco. Na niiTeco motata. Amo ximajmahui para tiyas tlali Egipto pampa nopano nijchihuas para moteipa ixhuihua tlahuel momiyaquilise hasta mochihuase se altepetl ica tlahuel miyac tlacame ica san se inieso. 4 Na niyas mohuaya ipan Egipto huan teipa niquinquixtis moteipa ixhuihua nopano. Quema timiquis, motelpoca Jos'e itztos monechca. 5 Huan itelpocahua Jacob quitlalijque inintata, huan ininconehua huan ininsihuajhua ipan nopa cuacarros tlen Fara'on quintitlantoya huan yajque. Huan queja nopa Israel quistejqui tlen Beerseba. 6 Huan Jacob huan itelpocahua quinhuicaque ipan tlali Egipto inintlapiyalhua huan nochi tlen quipixtoyaj ipan tlali Cana'an. 7 Yajque nochi iconehua huan iixhuihua; tlacame huan sihuame. 8 Nica nimitzilhuis inintoca itelpocahua huan iteipa ixhuihua Israel o Jacob tlen yajque tlali Egipto. 9 Yajqui Rub'en iachtohui ejca cone Jacob. Yajque iconehua Rub'en: Hanoc, Fal'u, Hezr'on huan Carmi. 10 Yajque Sime'on huan iconehua: Jemuel, Jam'in, Ohad, Jaqu'in, Zohar huan Sa'ul tlen eliyaya icone se sihuatl cananea. 11 Yajque Lev'i huan iconehua tlen itoca eliyaya: Gers'on, Coat huan Merari. 12 Yajque Jud'a huan iconehua: Sela, Fares huan Zara. Pero iconehua tlen inintoca Er huan On'an ya mictoyaj ipan tlali Cana'an. Huan iconehua Fares elque: Hezr'on huan Hamul. 13 Yajque Isacar huan iconehua: Tola, F'ua, Job huan Simr'on. 14 Yajque Zabul'on huan iconehua tlen inintoca eliyayaj: Sered, El'on huan Jahleel. 15 Nochi ni tlacame tlen nimitzilhuijtoc nica elque iconehua Jacob ihuaya Lea huan yajque tlali Egipto ica Jacob. Huan nochi ni ininconehua tlacatque quema itztoyaj ipan tlali Aram. Nojquiya Jacob huan Lea quipixque se iniichpoca tlen itoca Dina. Ininconehua huan iniixhuihua Jacob huan Lea mochijque 33. 16 Nojquiya yajque tlali Egipto Gad huan iconehua: Zifi'on, Hagui, Ezb'on, Suni, Eri, Arodi huan Areli. 17 Yajque Aser huan iconehua: Imna, Is'ua, Is'ui, Ber'ia huan ininsihua icni tlen itoca Sera. Huan Ber'ia ya quinpixqui iconehua: Heber huan Malquiel. 18 Tlen nimitzilhuijtoc nica elque iconehua Jacob ica Zilpa huan yajque tlali Egipto ininhuaya. Zilpa elqui nopa tlatequipanojquetl tlen Lab'an quimacac iichpoca, Lea, huan teipa Lea quimacac ihuehue para ma eli isihua. Huan ininconehua huan iniixhuihua Jacob ihuaya Zilpa elque 16 tlacame ica nochi. 19 Huan nojquiya yajque tlen eltoyaj iconehua Raquel, isihua Jacob huan inintoca ininconehua elque: Jos'e huan Benjam'in. 20 Huan ipan Egipto Jos'e quinpixqui coneme ihuaya isihua Asena. Asena elqui iichpoca Potifera, tlen eliyaya se totajtzi nopano ipan altepetl On. Ininconehua elque: Manas'es huan Efra'in. 21 Huan iconehua Benjam'in elque: Bela, Bequer, Asbel, Gera, Naam'an, Ehi, Ros, Mupim, Hupim huan Ard. 22 Tlen nimitzilhuijtoc nica elque iconehua huan iixhuihua Raquel huan Jacob. Huan mochijque 14 tlacame para nochi. 23 Huan nojquiya yajque tlali Egipto Dan, icone Jacob, huan icone: Husim. 24 Huan nojquiya yajque Neftal'i huan iconehua: Jahzeel, Guni, Jeser huan Silem. 25 Huan inijuanti elque iconehua Bilha, nopa tlatequipanojquetl tlen Lab'an quimacac iichpoca, Raquel, huan teipa Raquel quimacac Jacob para ma eli isihua. Huan iconehua huan iixhuihua Jacob ica Bilha elque chicome para nochi. 26 Huan para nochi nopa tlacame tlen yajque Egipto ihuaya Jacob tlen nel'ia san se inieso elque 66, huan ax quinpojque inintelpocahua ininsihuajhua. 27 Huan ica nopa ome iconehua Jos'e tlen tlacatque ipan Egipto mochijque 70 tlacame ipan ifamilia Jacob quema ajsitoj nopano. 28 Huan Jacob quititlanqui Jud'a ma tlayacana para quiitati Jos'e huan quimatiltis ma quinamiquiqui ipan tlali Gos'en. Huan quema Jud'a ajsito campa Jos'e, 29 tlanahuati ma quicualtlalica icarro para yas quinamiquiti itata. Huan quema ajsito iixtla itata, quinajnahuajqui huan huejcajqui choca ipan iajcol. 30 Huan Israel quiilhui Jos'e: --Ama ya huelis nimiquis pampa nel'ia nimitzitztoc ica noixtiyol huan nimitzpanti noja tiyoltoc. 31 Huan Jos'e quinilhui iicnihua huan nochi ifamilia itata: --Niyas niquitati Fara'on para nijyolmelahuati para ya inajsitoque. Niquilhuis para noicnihua huan iteixmatcahua notata tlen itztoyaj ipan tlali Cana'an ya hualajtoque para mocahuase nohuaya. 32 Huan quinhualicatoque ininborregojhua, ininhuacaxhua huan nochi tlen quipiyaj pampa inintequi eli quinmocuitlahu'iaj borregojme huan quiniscalt'iaj tlapiyalime. Queja nopa niquilhuis. 33 Huajca quema nopa Fara'on inmechnotzas huan inmechtlajtlanis ipan tlaque intequitij, 34 xiquilhuica para nochipa inquiniscaltijtoque borregojme, san se queja imohuejcapan tatahua. Queja nopa inmechcahuilis inmocahuase ipan tlali Gos'en pampa egiptome quinijiyaj tlen quinmocuitlahu'iaj borregojme huan ax quinequij itztose ininhuaya.
