Genesis 44

1Teipa Jos'e quiilhui itlayacanca tlatequipanojca: --Xijtemiti inincoxtal ni tlacame ica nochi trigo tlen hueli quihuicase huan xijtlali sese inintomi ipan icamac inincoxtal. 2Nojquiya xijtlali nocaxi tlen plata ipan icoxtal iniicni tlen teipa ejquetl, ihuaya nopa tomi tlen tlaxtlajqui para trigo. Huan nopa tlatequipanojquetl quichijqui queja Jos'e quinahuatijtoya. 3Huan quema san ontlatlanesqui, Jos'e quincahuili iicnihua ma yaca ihuaya ininburrojhua. 4Pero aya huejca yajtoyaj tlen nopa altepetl quema Jos'e quiilhui itlatequipanojca: --Xiya xiquintoquili nopa tlacame huan quema tiquinajsiti, xiquinilhui: '¿Para tlen inquicueptoque tlen cuali ica tlen ax cuali? ¿Para tlen inquiixtectoque nopa caxitl tlen plata 5tlen noteco quitequihu'ia para ipan atlis huan para quiitas tlen panos teipa? ¡Inquichijtoque tlen fiero!' 6Huan quema nopa tlatequipanojquetl quinajsito, quinilhui nochi ya ni. 7Huan nopa icnime quiilhuijque: --¿Para tlen tinechcamahu'ia queja nopa? ¡Ax quema tijchihuasqu'iaj nopa tlamantli! 8Xiquita sampa tijhualicaque tlen tlali Cana'an nopa tomi tlen eltoya ipan tocoxtal. ¿Quejatza tiquixtequise oro o plata tlen ichaj moteco? 9¡Ma miqui aqui hueli tlen tojuanti tlen tijpantilis nopa caxitl huan nochi tojuanti timitztequipanose san tlapic! 10Huajca nopa tlatequipanojquetl quiijto: --Cualtitoc tlen inquiijtohuaj, pero san yajaya tlen quipiya nopa caxitl techtequipanos san tlapic. Nopa sequin ax quipiyase tlajtlacoli. 11Huan sesen tlen inijuanti nimantzi quitemohui icoxtal huan quitlapo. 12Huan nopa tlatequipanojquetl quitemo ipan sesen coxtali. Pejqui ica tlen achtohui ejquetl hasta nopa teipa ejquetl huan quipanti nopa caxitl ipan Benjam'in icoxtal. 13Huajca quitzayanque ininyoyo ica hueyi cuesoli. Huan teipa quintlamamaltijque ininburrojhua huan mocuepque ipan nopa altepetl. 14Huan quema Jud'a huan iicnihua ajsitoj ichaj Jos'e, ya noja itztoya nopano. Huan motlancuaquetzque iixtla huan mopachojque tlalchi, 15huan Jos'e quinilhui: --¿Tlaque inquichijtoque? ¿Ax inquimatij para se tlacatl queja na quimati tlen quichihuaj sequinoc? 16Huan Jud'a quiijto: --¿Tlaque huelis timitznanquilise? ¿Quejatza huelis tijnextise para ax tijchijtoque? Toteco Dios techpantijtoc titlajtlacolchijtoque. Huajca nica tiitztoque huan timitztequipanose san tlapic ihuaya tlen quipixtoya nopa caxitl. 17Pero Jos'e quiijto: --Axtle, ax queja nopa. San ya ne tlen quipiyayaya nopa caxitl nechtequipanos san tlapic. Huan ne sequinoc imojuanti huelis inmocuepase ica cuali hasta ichaj imotata. 18Huajca Jud'a monechcahui campa Jos'e huan quiilhui: --Na nimitztlajtlan'ia, noteco, para xinechcahuili nimitzilhuis se tlamantli tlen axaca quimati. Xijchihua se favor, amo xicualani nohuaya pampa tieltoc queja Fara'on. 19Achtohui ta titechtlajtlani intla tijpiyayayaj totata huan tlen seyoc totlaca icni. 20Huan timitzilhuijque para tijpiyaj totata tlen huehuentzi huan tijpiyaj se toicni tlen neltelpocatl tlen tlacatqui quema totata eliyaya nelhuehuentzi. Huan timitzilhuijque para totata quiicnel'ia miyac. San ya mocahua tlen inana. Nopa seyoc iicni ya mijqui. 21Huajca titechtlajtlani ma tijhualicaca pampa tijnequiyaya tiquixmatis. 22Huan timitzilhuijque nopa telpocatl ax hueli quicajtehua itata. Intla quicajtehuasqu'ia, itata miquisqu'ia. 23Pero ta titechilhui intla ya ax hualayaya tohuaya, ayoc titechselisqu'ia. 24"Huajca quema timocuepque campa totata, tijpohuilijque nochi tlen titechilhuijtoya. 25Huan teipa totata techilhui ma tihualaca tijcohuaquij se quentzi trigo. 26Pero tiquilhuijque para ax hueli tihualase hasta toicni teipa ejquetl hualas tohuaya. Intla ax tohuaya huala, ax huelis timitzitase. 27Huan totata techilhui: 'Inquimatij nosihua nechmacac ome noconehua. 28Huan se tlen nopa ome quisqui huan nimoilhu'ia se tecuani quicuajqui pampa hasta ama ayoc niquitztoc. 29Intla inquihuicaj huejca ni seyoc nocone huan intla ipantis se tlamantli tlen fiero, innechchihualtise ma nihuehuejmiqui ica cuesoli.' 30"Yeca intla toicni ax mocuepas tohuaya, 31totata tlen ya nelhuehuentzi nimantzi miquis ica cuesoli pampa ax quiitas. Huan tijhuicase tlajtlacoli ipampa imiquilis. 32Na niquilhui notata para ma quicahua nomaco huan nijmocuitlahuisqu'ia. Nojquiya niquilhui para intla ax nijcuepilis, huajca nijhuicas tlajtlacoli iixtla para nochipa. 33Yeca nimitztlajtlan'ia, xinechcahuili ma nimocahuas nimitztequipanos na huan ax ya. Xijcahuili ma mocuepa ihuaya iicnihua. 34¿Pampa quejatza huelis nimocuepas huan niquitas notata, intla noicni ax yohui nohuaya? Ax nijnequi niquitas quejatza tlaijiyohuis notata."

will be added

X\