Genesis 42

1Quema Jacob quimatqui para oncayaya trigo ipan tlali Egipto, quinilhui itelpocahua: "¿Para tlen inmochiyaj se ica seyoc para inquiitase ajqueya techpalehuis? 2Nechilhuijtoque para ipan tlali Egipto onca trigo. Xiyaca nepa huan xijcohuatij para noja tiitztose." 3Huajca majtlactli tlen iicnihua Jos'e yajque tlali Egipto quicohuatij trigo. 4Pero Jacob ax quicahuili ma yohui Benjam'in, inelicni Jos'e pampa moilhui nohueli ipantisqu'ia se tlamantli tlen fiero. 5Huajca itelpocahua Israel yajque ininhuaya nochi sequinoc tlen yohuiyayaj tlacohuatij pampa campa hueli ipan nochi tlali Cana'an oncayaya mayantli. 6Huan Jos'e eliyaya gobernador ipan tlali Egipto huan yajaya tlen quinnamaquiltiyaya trigo nochi tlacame tlen ajsiyayaj tlen campa hueli tlaltini. Huan quema iicnihua Jos'e monextijque iixpa, motlancuaquetzque huan mopachojque tlalchi queja momatque tlatlepanitaj. 7Huan Jos'e quinixmatqui iicnihua quema quinitac, pero quichijqui queja ax quinixmatiyaya. Quincamahui ica cualantli huan quinilhui: --¿Canque inhualahuij? Huan quiilhuijque: --Tihualahuij tlali Cana'an para titlacohuaquij. 8Huan yonque Jos'e quinixmatqui iicnihua, inijuanti ax quiixmatque. 9Huan quiilnamijqui nopa temictli tlen quipixqui tlen iicnihua achtohuiya huan quinilhui: --Ax neli inhualahuij para intlacohuase. Inhualajtoque inquiitaquij quejatza eltoc totlal huan canica huelis intechtlanise. 10Huan inijuanti quinanquilijque: --¡Axtle, tate! Timotequipanojcahua tihualajtoque tijcohuaquij trigo. 11Nochi tojuanti tiiconehua san se tlacatl. Ticuajcualme. Ax quema tiyajtoque ipan se altepetl para tijtlachilise quejatza hueli tijtlanise. 12Huan Jos'e quiijto: --¡Ax neli! Inhualahuij inquiitaquij quejatza huan canica huelis intechtlanise ipan totlal. 13Pero inijuanti tlananquilijque: --Timotlatequipanojcahua tiitztoque 12 tiicnime ica san se tlacatl huan tiitztoque ipan tlali Cana'an. Toicni teipa ejquetl mocajqui ihuaya totata huan se ayoc aqui tohuaya. 14Pero Jos'e sampa quinilhui: --Temachtli imojuanti intlapijpiyani, 15pero ica ya ni tiquitase. Ica itequihuejcayo Fara'on, nitlanahuat'ia para ax hueli inquisase nica hasta ma huala imoicni teipa ejquetl. 16Ma yohui se tlen imojuanti para quicuiti. Nopa sequin mocahuase tzactoque. Tiquitase intla nel'ia tlen inquiijtojtoque. Intla axtle, huajca nijmatis melahuac intlapijpiyaj pampa inquinequij intechtlanise. 17Huan Jos'e quintzajqui nochi inijuanti para eyi tonali, 18pero ica ihualhuiptlatica quinilhui: --Na nijtlepanita Toteco Dios, huajca xijchihuaca ya ni huan nimechcahuilis initztose. 19Intla nel'ia incuajcualme, ma mocahua tzactoc san se tlen imojuanti. Huan sequinoc imojuanti xijhuicaca trigo para ma tlacuaca imofamilia. 20Pero monequi xinechhualiquilica imoicni teipa ejquetl para tiquitase intla inquiijtojtoque tlen melahuac. Pero intla axtle, huajca inmiquise. Huan inijuanti quicualcajque, 21pero moilhuiyayaj se ica seyoc: --Melahuac fiero tijchihuilijque toicni. Ax tijchihuilijque cuenta quema tlahuel mocuesohuayaya huan techtlajtlaniyaya ma tijtlasojtlaca. Huan yeca ama topani eltoc ni cuesoli. 22Huan Rub'en quinilhui: --Na nimechilhui para ax tleno xijchihuilica, pero ax innechcajque huan ama monequi titlaxtlahuase ipampa imiquilis. 23Pero ax quimatiyayaj intla Jos'e quimachiliyaya inintlajtol pampa Jos'e quinnojnotzayaya ica inintlajtol egiptome huan seyoc quinixtomiliyaya tlen quiijtohua. 24Huan Jos'e mohuejcatlali tlen iicnihua para ax huelis quiitase huan pejqui choca. Teipa moyoltlali huan mocuepqui campa itztoyaj para quincamahui. Huan quiiyocaquixti Sime'on huan iniixtla quinnahuati itequipanojcahua ma quiilpica. 25Teipa tlanahuati ma quintemitilica inincoxtalhua iicnihua huan ma quincuepilica sese inintomi ipan inincoxtal. Nojquiya tlanahuati ma quinmacaca tlacualistli para ipan ojtli. Huan itlatequipanojcahua queja nopa quichijque. 26Huan quintlamamaltijque ininburrojhua huan quistejque. 27Huan quema ajsitoj campa tonilisqu'iaj, se tlen inijuanti quitlapo icoxtal para quitlamacas iburro huan quiitac itomi eltoya icoxtal ijtic. 28Huajca quinilhui iicnihua: --¡Xiquitaca nechcuepilijque notomi! ¡Nica eltoc ipan nocoxtal! Huan nochi momajmatijque miyac, huan huihuipicayayaj huan moilhuiyayaj se ica seyoc: --¿Tlaque techchihuilijtoc Toteco Dios? 29Huan quema ajsitoj tlali Cana'an, quipohuilijque inintata, Jacob, nochi tlen quinpanotoya, quiilhuijque: 30--Nopa tlacatl tlen tlanahuat'ia ipan nopa tlali technojnotzqui ica cualantli huan techilhui para san tiyajtoyaj titlachijchiyatij ipan itlal para huelis tijtlanisqu'iaj. 31Pero tiquilhuijque para ticuali tlacame huan ax quema titlapijpixtoque. 32Tiquilhuijque para tieliyayaj 12 tiicnime tlen san se tlacatl, huan se ayoc itztoc tohuaya. Nojquiya tiquilhuijque para nopa teipa ejquetl mocajtoya mohuaya ta nica ipan Cana'an. 33Huajca yaja techilhui para monequi quiitas intla nel'ia ticuajcualme. Quiijto monequi se tlen tojuanti ma mocahua nopano huan para nopa sequinoc tojuanti ma tihualaca tijhualicaca trigo para tofamilias tlen mayanaj, 34pero quiijto teipa monequi tijhuiquilise toicni teipa ejquetl. Queja nopa quiijto para melahuac quimatis intla ticuali tlacame o san titlapijpiyani. Huan quiijto para queja nopa quimajcahuas toicni huan huelis titlacohuase ipan itlal ica cuali. 35Huan quema iicnihua Jos'e quiixcuepque inincoxtal, quiitaque para ipan sese inincoxtal oncayaya ininpilbolsa ica nopa tomi tlen quihuicatoyaj. Huajca inijuanti huan inintata momajmatijque. 36Huan Jacob quinilhui: --Innechquixtilise nochi noconehua. Jos'e ayoc aqui tohuaya, Sime'on nojquiya, huan ama innechquixtilise Benjam'in. Ax tleno quisa cuali para na. 37Huajca Rub'en quiilhui itata: --Xijcahua Benjam'in ma yohui. Huan nijmocuitlahuis huan nimitzcuepilis. Intla ax nimitzcuepilis, huelis tiquinmictis nochi ome noconehua. 38Pero Jacob quiilhui: --Nocone ax yas imohuaya. Iicni ya mijqui huan san ya mocahua. Intla ipantis tlen fiero ipan ojtli, innechchihuilise ma nihuehuejmiquis ica cuesoli.

will be added

X\