Genesis 41

1Quema panotoya ome xihuitl, se tonal Fara'on quipixqui se temictli. Quitemijqui para ijcatoya iteno nopa atemitl Nilo, 2huan chicome huacaxme tlen yejyectzitzi huan tomahuaque quisayayaj ipan nopa atemitl huan tlacuajtinemiyayaj. 3Huan iniica quisque chicome huacaxme tlen fierojtique huan cocoxquetique. Quisque ipan nopa atemitl huan moquetzque iteno nechca nopa sequinoc. 4Teipa nopa huacaxme fierojtique huan cocoxquetique quincuajque nopa chicome huacaxme yejyectzitzi huan tomahuaque. Huan Fara'on isac. 5Teipa sampa cochqui huan quipixqui seyoc temictli. Quiitayaya chicome imacuayo trigo yejyectzitzi tlen temitoya ica iyol huan moscaltiyaya ipan san se tzontli. 6Huan iniica chamanqui seyoc chicome imacuayo trigo tlen huactoc huan pitzantzitzi tlen quitlatijtoya nopa huac ajacatl tlen huala campa quisa tonati. 7Huan nopa chicome imacuayo trigo tlen huactoc quincuajque nopa chicome imacuayo tlen tomahuac huan temitoc. Huan Fara'on isac huan momacac cuenta para eliyaya se temictli. 8Pero ica ijnaloc nelmocuesohuayaya huan tlanahuati ma hualaca nochi tetonalitani huan nochi tlalnamijca tlacame ipan tlali Egipto. Huan Fara'on quinpohuili itemic, pero niyon se tlen inijuanti ax huelqui quiilhui tlaque quinequiyaya quiijtos. 9Huajca nopa tlacatl tlen quipixqui itequi para quiyecos itlailis Fara'on quiilnamijqui Jos'e huan quiilhui Fara'on: --Ama niquilnamiqui tlen ax cuali nijchijtoc. 10Quema ticualanqui nohuaya huan ihuaya nopa tlayacanca panchijquetl, techtitlanqui tiome ipan nopa tlatzactli ipan ichaj nopa tlayacanquetl tlen nopa tlacame tlen mitzmocuitlahu'iaj. 11Huan se tlayohua nopa panchijquetl huan na, tijpixque sesen temictli. Huan sesen temictli quipixqui tlen quinequiyaya quiijtos. 12Huan nopano ipan nopa tlatzactli itztoya tohuaya se hebreo telpocatl tlen quitequipanojtoya nopa tlayacanquetl. Huan tijpohuilijque totemic huan nopa hebreo techilhui tlaque quiijtosnequi. 13Huan nochi panoc san queja techilhui. Na nimocuepqui sampa ipan notequi huan nopa seyoc quicuapilojque. 14Huajca Fara'on tlatitlanqui ma quinotzatij Jos'e huan nimantzi quiquixtijque tlen nopa tlatzactli. Huan Jos'e malti, huan motentzonxinqui, huan quipatlac iyoyo huan monexti iixtla Fara'on. 15Huan Fara'on quiilhui: --Nijpixqui se temictli huan axaca hueltoc quiixtoma, pero nijcactoc quema tijcaqui se temictli, hueli tiquixtoma. 16Huan Jos'e quinanquili: --Ax nihueli na, pero Toteco Dios, quena. Yajaya mitznextilis tlaque quinequi quiijtos motemic. 17Huan Fara'on quiilhui Jos'e: --Ipan notemic, niquitayaya para niijcatoya iteno nopa atemitl Nilo, 18huan ipan nopa atemitl quisque chicome huacaxme tomahuaque huan yejyectzitzi tlen tlacuajtinemiyayaj. 19Huan iniica quisque seyoc chicome huacaxme tlen fierojtique huan cocoxquetique. ¡Ax quema niquinitztoya huacaxme nelfierojtique ipan nochi tlali Egipto! 20Huan ni huacaxme cocoxquetique huan fierojtique quincuajque nopa achtohui huacaxme tlen tomahuaque. 21Pero yonque quincuajtoyaj, ax tomahuixque. Noja eliyayaj cocoxquetique queja achtohui. "Huan teipa niisac. 22Teipa nijtemijqui chicome imacuayo trigo yejyectzitzi huan tomahuaque tlen temitoya ica iyol huan moscaltiyayaj ipan san se tzontli. 23Huan iniica moscaltiyaya seyoc chicome imacuayo tlen tzocoyoltique, huan pitzantzitzi, huan huactoque ica nopa huac ajacatl tlen huala campa quisa tonati. 24Huan ni chicome imacuayo tlen pitzantzitzi quincuajque nopa chicome imacuayo tlen tomahuaque. Na niquinpohuili notemic nopa tlacame tlen tetonalitaj, pero niyon se ax huelqui nechilhuis tlaque quiijtosnequi." 25Huajca Jos'e quiilhui Fara'on: --Nopa ome temictli tlen tijpixqui, san se. Toteco Dios mitzyolmelajtoc tlen yajaya quichihuas. 26Nopa chicome huacaxme tlen yejyectzitzi quinequi quiijtos chicome xihuitl. Huan san se quiijtosnequi nopa chicome imacuayo trigo tlen yejyectzitzi. 27Huan nopa chicome huacaxme cocoxquetique huan fierojtique tlen quisque iniica nopa sequinoc, quinequi quiijtos seyoc chicome xihuitl. Huan san se quiijtosnequi nopa chicome imacuayo trigo tlen ax moscalti huan tlen quihuatzqui nopa huac ajacatl tlen huala campa quisa tonati. Quinequi quiijtos chicome xihuitl quema ax tleno oncas. 28Ya ni panos san queja nimitzilhuijtoc pampa Toteco Dios mitznextilijtoc tlen ya quichihuas. 29Hualas chicome xihuitl quema oncas tlahuel miyac pixquistli ipan nochi tlali Egipto. 30Huan teipa hualas chicome xihuitl tlen ax tleno oncas. Huan nopa mayantli ajsis campa hueli ipan nochi tlali Egipto hasta axaca quiilnamiquis nopa xihuitl tlen cuali. 31Elis nelhueyi nopa mayantli hasta ax nesis tlen achtohuiya oncac. 32Ta tijpixqui nopa temictli ompa pampa Toteco Dios motlalijtoc quichihuas ni tlamantli huan quichihuas nimantzi. 33"Huajca xijtemo se tlacatl tlen cuali iyolo huan tlen tlalnamiqui para tlayacanas ipan ni tlali Egipto. 34Huan ya ni xijchihua, totlanahuatijca. Xijnahuati ma quintlali gobernadores campa hueli ipan nochi ni tlali para ma quiajcocuise se coxtali tlen sesen macuili coxtali tlen quipixcase ipan tlali Egipto ipan nochi nopa chicome xihuitl quema tlahuel tlaoncas. 35Ma quisentilica nopa trigo ipan nochi altepetini ipan nopa chicome cuali xihuitl tlen huala huan ma quitlalica campa ta tijnahuatis, totlanahuatijca. Huan teipa oncas tlacualistli para nochi tlacame. 36Queja nopa, mocahuas ajcoctoc nopa trigo ipan totlal para tlacame ax apismiquise ipan nopa chicome xihuitl quema oncas mayantli." 37Huajca Fara'on huan itlapalehuijcahua quicualcajque tlen Jos'e quiijto, 38huan Fara'on quinilhui: --¿Canque tijpantise seyoc tlacatl queja ya ni tlen quipiya itonal Toteco Dios? 39Huan teipa Fara'on quiilhui Jos'e: --Axaca tlen m'as tlalnamiqui huan tlen m'as quimati que ta. San ta mitzmatiltijtoc Toteco Dios nochi ni tlamantli. 40Huajca momaco mocahuas nochi tlen noaxca huan nochi notlacajhua quineltocase tlen tiquinilhuis. San na nielis m'as hueyi que ta pampa na nihueyi tlanahuatijquetl. 41Xiquita, na nimitztlal'ia tigobernador ipan nochi ni tlali Egipto. Quema quiijto ya ni, 42Fara'on moquixtili ipan ima ianillo tlen quipixqui nopa sello tlen quinexti itequihuejcayo huan quitlalili imaco Jos'e. Teipa tlanahuati ma quiyoyontica ica lino yoyomitl tlen nelcuali huan ma quitlalilica iquechtla se costli tlen oro. 43Quichijqui nopa ompa tlanahuatijquetl huan quiilhui ma tlejco ipan iompa carro. Huan quinnahuati itlatequipanojcahua ma quiyacantiyaca huan chicahuac ma teyolmelahuase: "¡Ximotlancuaquetzaca! ¡Huala tlanahuatijquetl!" Queja nopa Fara'on quitlali Jos'e para ma tlanahuati ipan nochi nopa tlali Egipto. 44Huan teipa Fara'on quiilhui: --Na nimitzmaca motequihuejcayo huan niyon se ipan nochi Egipto huelis quiolinis imacpil intla ax tijmaca tlanahuatili. 45Huan Fara'on quitocajtlali Jos'e, Zafnat Panea, huan quisihuajti ihuaya Asenat, iichpoca Potifera nopa totajtzi ipan altepetl On. Huan campa hueli ipan tlali Egipto nochi quiixmatque Jos'e. 46Huan Jos'e quipiyayaya 30 xihuitl quema pejqui quitequipanohua Fara'on, nopa tlanahuatijquetl ipan tlali Egipto. Teipa Jos'e quinahuatijtejqui Fara'on huan pejqui yohui campa hueli ipan nochi tlali Egipto. 47Huan nopa tlali temacac miyac pixquistli ipan nopa chicome xihuitl quema tlahuel oncac, 48huan Jos'e quiajcojqui miyac trigo ipan nopa altepetini. Quicajtiyajqui ipan sese altepetl nopa trigo tlen quisentilijque ipan nopa pilaltepetzitzi nechca. 49Huan Jos'e quisentili miyac trigo queja imiyaca xali iteno hueyi atl. Nelmiyac eliyaya nopa trigo hasta ayoc quiijcuilo quesqui coxtali pampa ax hueliyaya quinpohuaj. 50Huan quema aya pehuayaya nopa xihuitl tlen mayantli, Jos'e quinpixqui ome iconehua ihuaya isihua, Asenat. 51Nopa achtohui quitocajti Manas'es. (Manas'es quinequi quiijtos Niquinilcajtoc.) Queja nopa quitocajti pampa quiijto: "Toteco Dios quichijtoc ma niquilcahua noteixmatcahua huan nochi tlen nitlaijiyohuijtoc." 52Huan iompa cone quitocajti Efra'in. (Efra'in quinequi quiijtos Temaca Itlajca.) Queja nopa quitocajti pampa quiijto: "Toteco Dios quichijtoc ma niquinpiya noconehua ipan ni tlali campa nitlaijiyohuijtoc." 53Huan tlanqui nopa chicome xihuitl quema tlahuel oncac pixquistli ipan tlali Egipto, 54huan pejqui nopa chicome xihuitl quema ax oncac pixquistli queja Jos'e quiijto. Huan oncac mayantli ipan nochi tlaltini nechca, pero ipan tlali Egipto oncayaya tlacualistli. 55Huan quema Egipto ehuani pejque mayanaj, yajque quitlajtlanitoj trigo Fara'on huan Fara'on quinilhui nochi egiptome: "Xiyaca xiquitatij Jos'e huan xijchihuaca tlen ya inmechilhuis." 56Huan quema nopa mayantli ajsic campa hueli ipan nochi nopa tlali, Jos'e quitlapo nochi nopa huejhueyi caltini campa quiajcocuiyaya trigo para quinnamaquiltis nopa egiptome pampa nopa mayantli eliyaya tlahuel chicahuac. 57Huan tlacame tlen ehuani tlen campa hueli tlaltini ajsiyayaj ipan tlali Egipto para quicohuase trigo ica Jos'e pampa ipan nochi nopa tlaltini, ax oncayaya tlaque quicuase.

will be added

X\