Genesis 4

1Huan Ad'an cochqui ihuaya isihua, huan isihua conecuic huan quitlacatilti se oquichpil tlen quitocajti Ca'in. (Ca'in quinequi quiijtos Nijpixtoc.) Queja nopa quitocajti pampa Eva quiijto: "Ica itlapalehuil TOTECO nijpixtoc se tlacatl." 2Huan teipa Eva quitlacatilti seyoc oquichpil tlen quitocajtlali Abel. Huan quema nopa ome moscaltijque, Abel quinmocuitlahui borregojme, huan Ca'in miltequitqui. 3Huan se tonal Ca'in quihualiquili TOTECO se tlacajcahualistli tlen quipixcatoya. 4Huan Abel nojquiya quihualiquili TOTECO sequin borregojme tlen m'as tomahuaque huan tlen achtohui tlacatque. Huan quinmicti huan quimacac TOTECO. Huan TOTECO quicualitac Abel ica itlacajcahualis huan quiseli. 5Pero ica Ca'in huan itlacajcahualis ax quicualitac. Yeca Ca'in cualanqui miyac huan fiero tlachixtinenqui. 6Huajca TOTECO quiilhui Ca'in: "¿Para tlen ticualani huan fiero titlachixtinemi? 7¿Ax tijmati intla tijchihuas tlen cuali, nimitzselis huan tipaquis? Pero intla ax tijchihua tlen cuali, mitztlanis tlajtlacoli. Nopa tlajtlacoli eltoc queja se tecuani tlen mitzchiya mocalteno huan quinequi mitztlanis, pero monequi ta xijtlanis ya." 8Huan panoc se ome tonali huan Ca'in quinotztejqui iicni Abel huan quiilhui: --Ma tiyaca cuatitla. Huan quema ajsitoj cuatitla, Ca'in quitehuijqui iicni Abel huan quimicti. 9Huajca TOTECO quitlajtlani Ca'in: --¿Canque itztoc moicni Abel? Huan Ca'in quinanquili: --Ax nijmati na. Ax notequi para nijmocuitlahuis noicni. 10Huan TOTECO quiilhui: --¿Para tlen tijchijtoc ya ni? Tijmicti moicni huan ieso tijtoyajtoc ipan tlali. Huan ama eltoc queja ieso nechtlajtlan'ia chicahuac ma nimitztlatzacuilti. 11Huajca ama, ipampa tlen tijchijtoc, nimitztelchihuas. Ayoc huelis titequitis ipan tlali pampa tijnenpolojtoc ica ieso moicni. 12Huan yonque titlatojtocas, ayoc tleno tiqueliltis. Monequi san tinentinemis campa hueli ipan tlaltepactli huan ax cana tijpiyas para timochantlalis. 13Huajca Ca'in quinanquili TOTECO: --Nelchicahuac ni tlatzacuiltili huan ax huelis niquijiyohuis. 14Ama tinechtojtoca huejca tlen ni tlali huan ayoc huelis nimitznechcahuis ta. Nielis se ninejnenquetl campa hueli tlali huan ax huelis nimosiyajcahuas. Queja ni aqui hueli nechpantis, nechmictis. 15Pero TOTECO quinanquili: --¡Axtle! Intla acajya mitzmictis, nijtlatzacuiltis chicome huelta m'as para nijcuepilis. Huajca TOTECO quitlalili Ca'in se tlanextilijcayotl para nochi quiixmatisqu'iaj para yajaya huan ax quimictisqu'iaj. 16Huan Ca'in quistejqui campa ihuaya camatiyaya TOTECO huan yajqui itztoti ipan se tlali itoca Nod tlen mocahua imelac Ed'en para campa quisa tonati. 17Huan Ca'in ihuaya cochqui isihua, huan yajaya conecuic huan quitlacatilti se oquichpil tlen itoca Enoc. Teipa Ca'in quichijqui se altepetl huan quitocajti nopa altepetl Enoc queja itoca icone. 18Huan Enoc motlacachijqui huan elqui itata Irad. Huan teipa Irad moscalti huan elqui itata Mehujael. Huan teipa Mehujael motlacachijqui huan elqui itata Metusael. Huan Metusael moscalti huan elqui itata Lamec. 19Huan Lamec quinpixqui ome isihuajhua; se itoca Ada huan ne seyoc Zila. 20Huan Ada quitlacatilti Jabal. Huan Jabal motlacachijqui huan elqui inintata tlacame tlen mocajque ipan caltini tlen yoyomitl huan quinxinajchohuayayaj huan quiniscaltiyayaj tlapiyalime. 21Huan Jabal quipixqui se iicni tlen itoca Jubal. Huan Jubal moscalti huan quiyoliti tlapitzali huan nopa tlatzotzonali tlen itoca arpa. Huan yajaya elqui inintata tlacame tlen tlatzotzonaj. 22Huan Zila, nopa seyoc isihua Lamec, quitlacatilti se oquichpil tlen itoca Tubal Ca'in tlen elqui se teposchijquetl. Huan Tubal Ca'in quitejtzonqui nopa tepostli tlen itoca bronce huan tlen itoca hierro huan ica nopa tepostli quisencahuayaya miyac tlamantli. Huan Tubal Ca'in quipixqui se isihua icni tlen itoca Naama. 23Huan se tonal Lamec quinilhui iome sihuajhua Ada huan Zila: "Xijtlacaquilica cuali tlen nimechilhuis. Nijmicti se tlacatl pampa nechcoco. Huan elqui se telpocatl tlen nechmaquilijtoya. 24Intla se acajya quichihuilisqu'ia se tlenijqui Ca'in, quiselisqu'ia se tlatzacuiltilistli chicome huelta m'as chicahuac. Pero intla se acajya nechcuepilisqu'ia tlen nijchijtoc na, niLamec, monequisqu'ia quiselis se tlatzacuiltili tlen ax san chicome hueltas, nelpano m'as chicahuac." 25Huan Ad'an cochqui ihuaya isihua, huan isihua sampa conepixqui huan quitlacatilti seyoc oquichpil tlen quitocajti Set. (Set quinequi quiijtos Nechmacatoc.) Queja nopa quitocajti pampa quiijto: "Toteco Dios nechmacatoc seyoc conetl ipatlaca Abel tlen Ca'in quimicti." 26Huan quema Set motlacachijqui, quipixqui se icone tlen quitocajti En'os. Huajca ipan nopa tonali tlacame pejque quihueyichihuaj TOTECO san sejco.

will be added

X\