Genesis 37

1Jacob mocajqui para itztos ipan tlali Cana'an campa itztoya itata quema aya miquiyaya. 2Huan ya ni tlen panoc ica Jacob huan iconehua. Quema Jos'e, icone Israel, eliyaya se telpocatl tlen quipiyayaya 16 xihuitl, quinmocuitlahuiyaya borregojme ininhuaya itepotz icnihua tlen eliyayaj ininconehua Bilha huan Zilpa, ne sequinoc isihuajhua itata. Huan teipa Jos'e quiilhuico itata nochi tlen ax cuali quichihuayayaj iicnihua. 3Huan Israel m'as quiicneli Jos'e que ne sequinoc itelpocahua pampa tlacatqui quema eliyaya nelhuehuentzi. Huan yeca quichihuili se iyoyo tlen huehueyac huan tlahuel yejyectzi. 4Pero quema iicnihua quiitaque para inintata m'as quiicneliyaya Jos'e que inijuanti, pejque quicualancaitaj huan niyon quentzi ax quinequiyayaj quiitase. 5Se tonal Jos'e quipixqui se temictli huan quinpohuili iicnihua, pero ya nopa quichijqui m'as ma quicualancaitaca. 6Huan ya ni tlen quinilhui: --Xijtlacaquilica huan nimechpohuilis nopa temictli tlen nijpixqui. 7Nijtemijqui para nochi tojuanti tiitztoyaj mila, tijsentiliyayaj tlamontomitl tlen trigo tzontli. Huan nimantzi tlen na nijsentilijtoya motlalanqui huan moquetzqui xitlahuac huan tlen inquisentilijtoyaj nechyahualojque huan queja motlancuaquetzque para nechtlepanitase. 8Huajca iicnihua quiilhuijque: --¿Tijnequi tiquijtos para tielis tihueyi tlanahuatijquetl huan titechnahuatis? Huajca m'as quicualancaitaque ipampa itemic huan tlen quinpohuilijtoya. 9Teipa Jos'e quipixqui seyoc temictli huan nojquiya quinpohuili iicnihua. Quinilhui: --Xijtlacaquilica, nijpixqui seyoc temictli huan niquitayaya para tonati huan metztli huan 11 sitlalime nechhueyitlepanitayayaj. 10Huan Jos'e nojquiya quipohuili ni temictli itata huan iicnihua; huan itata quiajhuac huan quiilhui: --¿Tlaque tiquijtosnequi ica ni temictli tlen tijpixqui? ¿Timoilhu'ia para monana, moicnihua huan na monequis timitzhueyitlepanitase? 11Huan iicnihua quicualancaitaque, pero itata miyac moilhuiyaya tlen ni tlamantli. 12Se tonal iicnihua Jos'e quinhuicaque iborregojhua inintata para quitemojtiyase sacatl huan ajsitoj nechca altepetl Siquem. 13Huan ipan ichaj inintata quiilhui Jos'e: --Xiquita, moicnihua quintlacuajcualt'iaj noborregojhua nechca Siquem. Nijnequi xiya xiquinitati. Huan Jos'e quinanquili: --¡Cualtitoc! 14Huajca itata quiilhui: --Xiquitati quejatza itztoque moicnihua huan nopa borregojme. Huan teipa xihuala xinechyolmelahuaqui. Huajca queja nopa, Israel quititlanqui Jos'e ma yohui campa nopa tlamayamitl nechca Hebr'on. Huan quema Jos'e ajsito Siquem, 15quintemohuayaya iicnihua campa hueli. Huan quipanti se tlacatl huan quitlajtlani: --¿Tlaque tijtemojtinemi? 16Huan Jos'e tlananquili: --Na niquintemojtinemi noicnihua. ¿Huelis tinechilhuis canque quinmocuitlahu'iaj ininborregojhua? 17Huan nopa tlacatl quiijto: --Ya mijcuenijtejque nica. Nijcajqui quiijtohuaj para yohuij Dot'an. Huajca Jos'e quintemojtiyajqui huan quinpanti ipan Dot'an. 18Huan inijuanti quihuejcaitaque, huan quema aya onajsiyaya, quisencajque quejatza quimictise. 19Quiijtojque: --¡Xiquitaca ne huala tlen tlatemiqui! 20Xihualaca, ma tijmictica huan tijcalaquise ipan se tlen ni ostome campa achtohui eltoya atl huan tiquijtose para se tecuani quicuajqui. Huan tiquitase tlaque panos ica itemic. 21Pero quema Rub'en quicajqui ni tlamantli, quinejqui quimanahuis Jos'e tlen ne sequinoc iicnihua. Huajca quiijto: --Ma ax tijmictica, 22huan tijtoyahuase estli. San ma tijmajcahuase ipan ne tlacoyoctli tlen eltoc ipan ni huactoc tlali, pero ax tleno tijchihuilise. Rub'en quiijto ya ni pampa quinequiyaya para teipa quimanahuisqu'ia Jos'e huan quihuicasqu'ia campa itata. 23Pero quema Jos'e ajsito campa itztoyaj iicnihua, inijuanti quiquixtilijque iyoyo tlen nelyejyectzi tlen moquentijtoya. 24Huan quiitzquijque huan quimajcajque ipan nopa tlacoyoctli tlen ax quipiyayaya atl pampa huactoya. 25Teipa quema mosehuijque para tlacuase, quinitaque sequin ismaelitame tlen hualayayaj Galaad ica inincamellos tlen quimamayayaj tlacualpajtli huan tlaajhuiyacayotl tlen b'alsamo huan mirra, huan yohuiyayaj para tlali Egipto. 26Huajca Jud'a quinilhui iicnihua: --¿Tlaque tijtlanise intla tijmictise toicni huan tijtlatise imiquilis? 27M'as cuali ma tiquinnamaquiltica ne ismaelitame huan ma ax tijmictica pampa yajaya toicni. Huan iicnihua quicualcajque tlen quinilhui. 28Huajca teipa quema nopa tlanamacani tlen tlali Madi'an ehuani panoque nopano, iicnihua Jos'e quiquixtijque ipan tlacoyoctli huan quinnamaquiltijque ica 20 plata tomi. Huan nopa tlanamacani tlen eliyaya iteipa ixhuihua Ismael quihuicaque para tlali Egipto. 29Huan teipa Rub'en mocuepqui campa ameli huan ax quipanti Jos'e osto ijtic, huajca quitzayanqui iyoyo pampa neltlahuel mocuesohuayaya. 30Teipa mocuepqui campa itztoyaj iicnihua huan quinilhui: --¡Nopa telpocatl ayoc aqui! ¿Tlaque huelis nijchihuas? 31Huan nopa icnime quicuique iyoyo Jos'e huan quipolojque ieso se chivo tlen quimictijque, 32huan quihuiquilijque inintata huan quiilhuijque: "Tijpantijque ni yoyomitl. Xiquita intla iyoyo mocone o axtle." 33Huan quema Jacob quiixmatqui, quiijto: "¡Quena, yajaya nopa iyoyo nocone! Se tecuani quicocototzqui huan quicuajqui." 34Huajca Jacob quitzayanqui iyoyo huan moyoyonti ica yoyomitl tlen cuesoli huan chocac para miyac tonali pampa mijqui icone. 35Huan nochi iconehua quicajcahualtiyayaj para quiyoltlalise, pero ax huelqui moyoltlal'ia. Tlahuel chocayaya ipampa icone huan quiijtohuayaya: "Nimocuesos ipampa nocone hasta quema nimiquis." 36Huan ipan tlali Egipto nopa madianitame tlacame quinamacaque Jos'e ica se tlacatl tlen itoca Potifar tlen quipixtoya se hueyi tequitl ihuaya nopa hueyi tlanahuatijquetl Fara'on nopano. Yajaya elqui tlayacanquetl tlen nopa tlacame tlen quimocuitlahuiyaya iyolis Fara'on.

will be added

X\