Genesis 29

1Jacob sampa quiitzqui iojhui huan yajqui ipan se tlali nechca campa quisa tonati. 2Huan nopano ipan potrero quiitac se ameli huan nechca mosentiliyayaj borregojme ipan eyi pamitl pampa nopa tlapiyalime momatque atlij ipan nopa ameli. Huan quitzactoyaj nopa ameli ica se tetl tlen nelhueyi. 3Huan momajtoyaj nopa tlamocuitlahuiani ma mochiyase hasta quema ya mosentilijtose nochi nopa borregojme tlen sesen inijuanti iaxcahua huan san sejco quiijcueniyayaj nopa hueyi tetl. Teipa quinamacayayaj ininborregojhua huan teipa san sejco sampa quitzacuayayaj ica nopa hueyi tetl. 4Huajca Jacob quintlajtlani nopa tlamocuitlahuiani: --¿Canque imochaj, nohuampoyohua? Huan inijuanti tlananquilijque: --Tihualahuij altepetl Har'an. 5Huajca quinilhui: --¿Inquiixmatij Lab'an iixhui Nacor? Huan quiilhuijque: --Quena, tiquixmatij. 6Huan Jacob quinilhui: --¿San cuali itztoc? Huan nopa tlamocuitlahuiani quiijtojque: --Quena, itztoc cuali. Xiquita, ne huala iichpoca, Raquel, ihuaya iborregojhua. 7Huajca Jacob quiijto: --Noja cualca para inquintzacuase borregojme. ¿Para tlen ax inquinamacaj huan inquinhuicaj sampa ma tlacuajcuatij? 8Pero nopa tlamocuitlahuiani quiijtojque: --Ax hueli tijchihuaj. Monequi tijchiyase ma hualaca nochi borregojme huan tlamocuitlahuiani para sentic tiquijcuenise ni tetl tlen ica quitzacuaj ni ameli para tiquinamacase toborregojhua. 9Huan quema Jacob noja camatiyaya ininhuaya, ajsico Raquel ihuaya iborregojhua itata pampa eltoya itequi para quinmocuitlahuis. 10Huan nimantzi quema Jacob quiitac Raquel, iichpoca itlayi Lab'an, ica iborregojhua, yajqui huan iselti quiijcueni nopa tetl tlen ica quitzactoyaj nopa ameli. Huan quinamacac iborregojhua. 11Teipa quitlajpalo huan quitzoponi huan pejqui choca chicahuac. 12Huan Jacob quipohuili para yajaya eliyaya icone Rebeca tlen iicni Lab'an. Huajca Raquel motlalojtiyajqui huan quipohuilito itata. 13Huan quema Lab'an quicajqui tlen Raquel quipohuili, para Jacob eliyaya icone isihua icni, motlalojtejqui para quiseliti. Huan quinajnahuajqui, huan quitzoponi huan quihuicac ichaj. Teipa Jacob quipohuili para tlen hualajqui. 14Huan Lab'an quiilhui: "Melahuac ta huan na san se toeso." Huan Jacob mocajqui ihuaya Lab'an se metztli. 15Teipa Lab'an quiilhui: --Ax hueli tinechtequipanos san tlapic san pampa nimoteixmatca. Xinechilhui quesqui tijnequi ma nimitztlaxtlahui. 16Huan Lab'an quinpiyayaya ome iichpocahua. Nopa achtohui ejquetl itoca Lea huan nopa teipa ejquetl, Raquel. 17Huan iixtiyolhua Lea ax quipiyayaya miyac fuerza, pero Raquel eliyaya senquistoc yejyectzi. 18Huan Jacob quiixtocayaya Raquel huan huajca quinanquili: --Nimitztequipanos chicome xihuitl intla tinechmacas Raquel para elis nosihua. 19Huajca Lab'an tlananquili: --Cualtitoc, m'as cuali nimitzmacas ta, huan ax se tlen ax niquixmati. Huajca ximocahua nohuaya huan nimitzmacas. 20Huan queja nopa Jacob tequitqui chicome xihuitl para Raquel, pero ya ax quimatqui intla nelmiyac tonali pampa tlahuel quiicneliyaya. 21Huan quema tlanqui nopa chicome xihuitl, Jacob quiilhui Lab'an: --Xinechmaca nosihua para ma nimosihuajti ihuaya pampa ya tlanqui nopa tonali tlen ica nimocajqui mohuaya para nitequitis. 22Huajca Lab'an quinnotzqui nochi tlen itztoyaj nopano para ma hualaca ipan nopa ilhuitl tlen nenamictili. 23Pero ica tlayohua Lab'an quicuic Lea huan quihuiquili Jacob. Queja nopa quimacac Lea para elis isihua huan Jacob cochqui ihuaya. 24Nojquiya Lab'an quimacac Lea se sihua tlatequipanojquetl tlen itoca Zilpa para ma quipalehui. 25Huan quema tlanesqui, Jacob momacac cuenta para cochtoya ihuaya Lea. Huajca yajqui quiilhuito Lab'an: --¿Tlaque tinechchihuilijtoc? ¿Ax nimitztequipano para Raquel? Huajca ¿para tlen tinechcajcayajtoc? 26Huan Lab'an quiilhui: --Nica ax timomajtoque para monamictis nopa teipa ejquetl intla aya monamict'ia nopa achtohui ejquetl. 27Xicaxiti se samano ihuaya Lea, huan teipa nojquiya timitzmacase Raquel intla timotemacas titequitis nohuaya seyoc chicome xihuitl. 28Huan Jacob motemacac. Huan quema tlanqui se samano inenamictilis ihuaya Lea, Lab'an quimactili Raquel para isihua. 29Lab'an nojquiya quimacac Raquel se sihua tlatequipanojquetl tlen itoca Bilha para ma quipalehui. 30Huan Jacob mosejcotili ihuaya Raquel huan m'as quiicneli que Lea, yonque monequiyaya quitequipanos Lab'an seyoc chicome xihuitl ipampa ya. 31Huan quema TOTECO quiitac para Jacob ax quiicneliyaya Lea, quichijqui ma conepiya, pero Raquel quichijqui ma ax conepiya. 32Huan Lea conecuic huan quipixqui se icone tlen quitocajti Rub'en. (Rub'en quinequi quiijtos Quiitac Nocuesol.) Queja nopa quitocajti pampa quiijto: "TOTECO quiitac quejatza tlahuel nimocuesohuayaya huan nechmacatoc se conetl, yeca ama nohuehue nechnequis." 33Teipa Lea quipixqui seyoc icone tlen quitocajti Sime'on. (Sime'on quinequi quiijtos Se Tlen Tlacaqui.) Queja nopa quitocajti pampa Lea quiijto: "TOTECO quicactoc para ax nechicnel'ia huan yeca nechmacac seyoc nocone." 34Huan seyoc huelta Lea quipixqui seyoc icone huan quitocajti Lev'i. (Lev'i quinequi quiijtos Motlatzquilijtoc.) Queja nopa quitocajti pampa quiijto: "Ama nohuehue itztos m'as nohuaya pampa ya nijmacatoc eyi oquichpilme." 35Huan Lea quipixqui seyoc icone tlen quitocajti Jud'a. (Jud'a quinequi quiijtos Nijpaquilismacas.) Queja nopa quitocajti pampa quiijto: "Ni huelta, quena, nijpaquilismacas TOTECO." Teipa ayoc conepixqui.

will be added

X\