Genesis 12

1TOTECO ya quiilhuijtoya Abram: "Xijcajtehua motlal, huan moteixmatcahua huan ichaj motata. Huan xiya hasta se tlali tlen nimitznextilis. 2Huan nimitzmacas miyac moixhuihua, huan niquinmiyaquilis moteipa ixhuihua hasta elise tlahuel miyac tlacame ipan inintlal. Nimitztiochihuas huan nijchihuas para campa hueli nochi ma mitzixmatise. Huan tielis se tlatiochihualistli para sequinoc. 3Niquintiochihuas inijuanti tlen mitztiochihuase. Huan inijuanti tlen mitztelchihuase, niquintelchihuas. Huan niquintiochihuas nochi tlacame ipan tlaltepactli ipan ta." 4Huajca Abram quisqui queja TOTECO quinahuatijtoya huan quipiyayaya 75 xihuitl quema quisqui altepetl Har'an para yas tlali Cana'an. 5Huan quihuicac isihua Sarai huan imachcone Lot. Nojquiya Abram quihuicac nochi nopa miyac tlamantli huan tlapiyalime tlen quinpiyayaya huan nochi itlatequipanojcahua tlen hualajtoyaj ihuaya tlen altepetl Har'an pampa quincojtoya para iaxcahua. 6Huan quema inijuanti ajsitoj tlali Cana'an, Abram quipanoc nopa tlali hasta ajsitoj campa eltoc nopa hueyi ahua cuahuitl tlen itoca More nechca altepetl Siquem. Ipan nopa tonali itztoyaj cananeos ipan nopa tlali. 7Huan nopano TOTECO monexti ica Abram huan quiilhui: "Ni tlali niquinmacas moteipa ixhuihua." Huajca Abram quichijqui se tlaixpamitl nopano para TOTECO tlen monextijtoya ihuaya. 8Teipa yajqui itztoti campa tepeco tlatlajco altepetl Betel huan campa quisa tonati huan nopano quiquetzqui ichaj tlen yoyomitl. Altepetl Betel mocahuayaya ica iarraves para campa temo tonati. Huan altepetl Hai mocajqui ica inejmatl para campa quisa tonati. Huan nopano Abram quichijqui seyoc tlaixpamitl huan quihueyichijqui TOTECO. 9Teipa sampa pejqui nejnemi hasta nopa tlali tlen itoca Neguev. 10Ipan nopa tonali ax oncayaya tlacualistli ipan nopa tlali pampa ax tlaahuetztoya. Huajca Abram yajqui para itztoti ipan tlali Egipto para se ome xihuitl, pampa nel'ia ax tleno oncayaya para quicuase campa itztoyaj. 11Huan quema ajsitiyohuiyayaj Egipto, Abram quiilhui isihua Sarai: "Xiquita, cuali nijmati para nel'ia tiyejyectzi, 12huan quema nopa egiptome mitzitase, quiijtose: 'Ni sihuatl, ya isihua ni tlacatl. Huajca ma tijmictica huan nopa sihuatl elis toaxca.' 13Yeca para ma ax tleno nopantis, xiquijtos para tinoicni. Queja nopa techselise ica yejyectzi mopampa ta, huan ax nimiquis." 14Huajca queja nopa mocajque huan quema ajsitoj tlali Egipto, nopa egiptome quiitaque para Sarai eliyaya nelyejyectzi. 15Huan nojquiya quiitaque nopa huejhueyi tlacame tlen itztoyaj ichaj nopa hueyi Tlanahuatijquetl Fara'on huan quiilhuitoj nopa tlanahuatijquetl para nopa sihuatl eliyaya nelyejyectzi. Huajca Fara'on quinnahuati ma quihuicaca ichaj para quicualtlalis para teipa elis isihua. 16Huan pampa quiixtocac Sarai, Fara'on quiseli Abram ica cuali. Huan Fara'on quimacac Abram borregojme, huacaxme, burrojme, camellos huan tlatequipanohuani tlen tlacame huan sihuame para ma elise iaxcahua. 17Pero TOTECO quitlatzacuilti nopa Fara'on ininhuaya nochi tlen itztoyaj ipan ichaj ica cocolistli tlen m'as fiero pampa Sarai itztoya ipan ichaj. 18Yeca nopa Fara'on quinotzqui Abram iixtla huan quiajhuac. Quiilhui: "¿Para tlen techchihuilijtoc ni tlamantli? ¿Para tlen ax techilhui para ni sihuatl eliyaya mosihua? 19Ta tiquijto para ya moicni huan yeca nimocuili para nosihua. Xiquita, nica itztoc. ¡Xijhuica huan ya xiya!" 20Huajca nopa Fara'on quinnahuati itlacajhua ma quicahuilica Abram ma quisa ipan nopa tlali ihuaya isihua huan ica nochi tlen quipixtoya.

will be added

X\