GÁLATAS 4

1Ximoilhuica tlen ni huicaltili tlen nimechilhuis. Ma tijtlalica para se tlacatl tlen tlapijpixtoc miquis huan quicajtehuas miyac tlamantli para ipilcone. Pero yonque nel'ia nochi iaxca nopa ipilcone, yajaya mocahua queja se tlatequipanojquetl pampa noja pilsiltzi. 2Huan mojmostla monequi quinneltoquilis tlen quimocuitlahu'iaj hasta moscaltis huan quiaxitis nopa xihuitl tlen quiijto itata para quiselis nochi tlen iaxca. 3Quej nopa nojquiya eltoya ica tojuanti quema aya hualayaya Cristo. Tiitztoyaj queja tipilconetzitzi huan titlatequipanohuani tlen tijtoquiliyayaj inintlalnamiquilis ajacame tlen itztoque ipan ni tlaltepactli. 4Pero quema ajsic hora tlen Toteco Dios quiixtlalijtoya, quititlanqui Icone tlen quitlacatilti se israelita sihuatl tlen quintlepanitac itlanahuatilhua Mois'es. 5Toteco quititlanqui Icone para techcohuas para tiiaxcahua huan para techmalacanis tlen itlanahuatil Mois'es, para Toteco ma techseli queja tiiconehua. 6Huajca ama nochi tojuanti timochijtoque tiiconehua Toteco, huan yeca Toteco techmacatoc Itonal Icone ipan toyolo. Huan ama tiquijtohuaj: "Pap'a", quema tijnotzaj Toteco Dios pampa tlahuel tiquicnel'iaj. 7Huajca ayoc tiitztoque queja titlatequipanohuani. Ama tiiconehua. Huan pampa tiiconehua, nojquiya tijselise nochi tlen Toteco quicualtlalijtoc para quinmacas iconehua. Huan tijselise nochi tlen Cristo techchihuilijtoc. 8Achtohuiya quema aya inquiixmatiyayaj Toteco, imojuanti tlen ax inisraelitame inquintequipanohuayayaj totiotzitzi tlen tlacame quinchijtoque tlen ax neli Dios. 9Pero ama ya inquiixmatij Toteco o m'as xitlahuac tiquijtose, Toteco inmechixmati, huajca ¿para tlen inquinequij inquicajtehuase Toteco para sampa inquitequipanose itlanahuatilhua Mois'es tlen ayoc quipiyaj chicahualistli? Ax tleno ipati itlanahuatilhua Mois'es para techmaquixtis huan ayoc quipiya tequihuejcayotl. 10Ama inquichihuaj campeca para inquitoquilise nopa tlanahuatili pampa inilhuichihuaj quema yancuic metztli, huan quema sesen tlamantli ipohual, huan quema yancuic xihuitl, huan quema onca israelita ilhuitl, pampa inmoilhu'iaj queja nopa inquipactise Toteco. 11Nel'ia chicahuac nitequititoc para nimechmachtis tlen melahuac, huan ama nimomajmat'ia miyac pampa huelis notequi ica imojuanti elqui san tlapic. 12Noicnihua, nimechtlajtlan'ia chicahuac para xijcajtehuaca itlanahuatilhua Mois'es queja na nijchijtoc. Na nimochijtoc queja imojuanti tlen ax inisraelitame initztoyaj huan ninemi iyoca tlen nopa miyac tlanahuatili. Nochipa innechchihuilijtoque san tlen cuali. 13Inquimatij quema achtohui niyajqui nimechilhuito itlajtol Toteco, eltoya pampa nimococohuayaya. 14Pero yonque nitlaijiyohuiyaya ica se cocolistli tlen fiero, ax innechijixque huan ax innechhuejcamajcajque, pero innechselijque queja inquiselisqu'iaj se ielhuicac ejca Toteco. Quena, queja inquiselisqu'iaj Cristo Jes'us, innechselijque. 15¿Canque yajqui nopa paquilistli tlen inquipixque quema nimechcamahuito achtohuiya? Nel'ia intla inhueltosqu'iaj, inmoquixtilijtosqu'iaj imoixtiyol huan innechmacatosqu'iaj para nimochicajtosqu'ia. 16Pero ama, huelis nimochijtoc niimocualancaitaca pampa nimechilhu'ia tlen melahuac. 17Nopa tlacame tlen tlamacht'iaj nopa tlamachtilistli tlen ax xitlahuac mochihuaj queja imohuampoyohua, pero ax quichihuaj pampa quinequij inmechchihuilise tlen cuali huan tlen inmechpalehuis. Inijuanti san quinequij inmechiyocatlalise tlen na para xiquintoquilica huan xijtlacaquilica inintlamachtil. 18Cuali intla sequinoc quinequij elise imohuampoyohua yonque niitztoc imohuaya o axtle, intla nelnel'ia quinequij inmechchihuilise tlen cuali. 19Innopilconehua tlen nimechicnel'ia. Sampa nitlaijiyohu'ia ica imojuanti queja se sihuatl tlen quitlacatilt'ia icone. Huan nitlaijiyohuis hasta nopa tonal quema imonemilis nesis queja iyolis Cristo. 20Nel'ia tlahuel nijnequi niitztosqu'ia imohuaya para nimechcamahuis ica yamanic, pero ama nel'ia nimocuesohua huan ax nijmati tlaque nimechilhuis. 21Xinechilhuica ya ni, imojuanti tlen inquinequij inquitoquilise nochi tlen quiijtohuaj itlanahuatil Mois'es. ¿Nel'ia inquimachil'iaj tlen quiijtohuaj nopa tlanahuatili? ¡Huelis axtle! 22Itlajtol Toteco techilhu'ia para Abraham quinpixqui ome ioquichpilhua. Se ioquichpil quipixqui ica inelsihua huan ne seyoc quipixqui ica se itlatequipanojca tlen quicojtoya. 23Nopa sihua tlatequipanojquetl quipixqui cuali itlacayo huan yeca nimantzi conepixqui. Pero inelsihua Abraham eltoya tenantzi huan ax hueliyaya conepiya. Pero teipa, yonque ya nanatzi tlacatqui icone ica ichicahualis Toteco pampa Toteco quitencahuilijtoya Abraham para tlacatisqu'ia. 24Ni ome sihuame quinext'ia nopa ome tlajtolsencahuali tlen Toteco quisencajtoc ica tlacame. Nopa sihua tlatequipanojquetl tlen itoca Agar quinext'ia nopa tlajtolsencahuali tlen Toteco quichijqui ica israelitame ipan tepetl Sina'i quema quinmacac itlanahuatil Mois'es huan nochi mochijque tlatequipanohuani para quintoquilise nopa tlanahuatili. 25Quena, Agar itequipanojca Abraham quinext'ia israelitame tlen huejcajquiya itztoyaj ipan tepetl Sina'i ipan tlali Arabia huan nopa israelitame tlen ama itztoque ipan nopa hueyi altepetl Jerusal'en nicani ipan ni tlaltepactli. Nochi ni tlacame quintoquil'iaj itlanahuatil Mois'es huan itztoque queja tlatequipanohuani tlen ilpitoque ipan nochi nopa tlanahuatili. 26Pero tojuanti tlen tijneltocaj Cristo tiehuani ipan nopa yancuic Jerusal'en tlen temos tlen elhuicac. Huan Sara inelsihua Abraham tlen ax elqui tlatequipanojquetl, itztoc tonana tojuanti tlen ax tiquintoquil'iaj itlanahuatil Mois'es. 27Huan ijcuilijtoc ipan Itlajtol Toteco quejatza ichicahualis hueli quipatla iyolis se tlen ax hueli conepiya. Quiijtohua: "Ta tisihuatl, xipaqui. Yonque ax tiquinpiya coneme, xijpiya paquilistli. Pampa yonque ama ax tiquinpiya moconehua, teipa tiquinpiyas m'as moconehua queja sequinoc sihuame." 28Huajca ama noicnihua, tiitztoque queja Isaac tlen Toteco quitencahuili Abraham para tlacatisqu'ia yonque isihua ax huelqui conepiya. Huan na huan imojuanti tiiconehua Toteco pampa ya quitencajqui techchihuasqu'ia tiiconehua intla tijneltocasqu'iaj Jesucristo. 29Huan queja huejcajquiya icone Agar, nopa tlatequipanojquetl, quitlaijiyohuilti nopa oquichpil Isaac tlen Itonal Toteco quitlacatilti, ama nojquiya inijuanti tlen quinequij ma tijtoquilica itlanahuatil Mois'es techtlaijiyohuilt'iaj tojuanti tlen Itonal Toteco techtlacatilti. 30Pero Itlajtol Toteco techilhu'ia queja Toteco quiilhui Abraham huejcajquiya: "Xijtotoca Agar, nopa sihua tlatequipanojquetl ihuaya ioquichpil, pampa ioquichpil nopa sihuatl tlen mitztequipanohua ax huelis quiselis tlen tijcajtehuas. San quiselis mocone Isaac tlen Sara mosihua quitlacatilti." 31Huajca noicnihua, ax tiitztoque queja tiiconehua nopa sihua tlatequipanojquetl tlen eliyaya iaxca iteco. Tojuanti tiiconehua Sara yajaya tlen nel'ia eltoya isihua Abraham huan eltoya majcajtoc.

will be added

X\