Ezekiel 22

1TOTECO sampa nechcamahui huan nechilhui: 2"Tlacatl, xiquintlajtolsencahua altepetl Jerusal'en ehuani huan xiquinilhui tlen ininpantis pampa yajuanti tlahuel temict'iaj. Xiquinteilhui ipampa nochi nopa fiero tlamantli tlen quichijtoque. 3Xiquinilhui para quej ni na, niDIOS Tlen Nijpiya Nochi Tlanahuatili, niquijtohua: 'InJerusal'en ehuani inmomict'iaj huan inquinchijchihuaj totiotzitzi huan tlaixcopincayome para ica inmoijtlacose noixpa. Ya monechcahuijtoc nopa tonali para inquiselise imotlaxtlahuil huan ax huelis incholose. 4Inquihuicaj miyac tlajtlacoli pampa tlahuel intemictijtoque huan inmoijtlacojtoque noixpa ica nopa totiotzitzi tlen inquinchijchijtoque. Yeca ama ya ajsic hora para inquiselise tlatzacuiltili huan para intlamise. Nijchihuas para nochi tlali huan altepetini ma inmechpinajtica huan ma inmechtlaijilhuica imojuanti huan imoaltepe. 5Nochi tlacame tlen itztoque huejca o nechca inmechixmatise ipampa nochi nopa tlamantli tlen ax cuali tlen inquichihuayayaj huan inmechpinajtise ica nochi tlamantli tlen ax cuali tlen inquichijtoque. 6" 'Nochi nopa tlayacanani tlen tlali Israel tlen itztoque ipan Jerusal'en tlahuel quinpact'ia temictise ica nochi ininchicahualis. 7Nopano tlacame ax quintlepanitaj inintatahua, niyon ininnanahua. Tlen fiero quinchihuil'iaj sequinoc tlaltini ehuani huan ax quincahuil'iaj coneme tlen icnotzitzi huan cahual sihuame ma quipiyaca tlen ica panose. 8Ax quitlepanitaj notiopa huan nopa tlamantzitzi tlen tlaijiyocatlalilme para na, niyon ax quitlepanitaj nopa tonali para mosiyajcahuase. 9Miyac tlacame quinteilhu'iaj sequinoc ica istlacayotl huan quintitlanij para ma quinmictica yonque ax tleno quichijtoque. Yohuij ipan nochi nopa ilhuitl tlen quichihuaj ipan tepetini para quinhueyichihuase totiotzitzi huan tlaixcopincayome huan nopano ica inintlacayo quichihuaj miyac tlamantli tlen fiero. 10Miyac tlacame tlen altepetl Jerusal'en quinsihuacuil'iaj inintatahua huan miyac quinechcahu'iaj ininsihua quema esotemoj. 11Itztoque miyac tlen momecat'iaj ica ininsihuajhua ininhuampoyohua. Sequin cochij ininhuaya ininyex huan hasta sequin tlen hueli quichihuaj ihuaya iniicni. 12Sequin quisel'iaj tomi para quimictise se acajya. Sequin tlainamaj itlapanca o seyoc tlamantli para tetlanejt'iaj tomi. Quincajcayahuaj inincalnechcahua para quitlanise miyac tomi. Jerusal'en ehuani ax nechilnamiquij na, niyon ax quinilnamiquij notlanahuatilhua. Queja nopa na, niDIOS Tlen M'as Nijpiya Tlanahuatili, niquijtohua. 13" 'Pero na nel'ia nicualani pampa inJerusal'en ehuani tlahuel intetlaijiyohuilt'iaj para inquitlanise m'as tomi. Huan inquitoyajtoque miyac estli ipan calles. 14Huan quema na nipehuas nimechtlatzacuiltis, ax huelis inmotlalise nohuaya. Na, niDIOS, niquijtohua tlen nijchihuas huan temachtli nijchihuas nochi tlen nimechilhu'ia. 15Huajca nimechtitlanis inJerusal'en ehuani ipan campa hueli tlaltini, huan queja nopa nimechquixtilis nochi tlamantli tlen ax cuali. 16Huan quema axaca ipan nochi tlali ipan tlaltepactli inmechtlepanitase huan tlahuel inmopinahualtise, huajca inquimachilise para na niDIOS.' " 17Teipa TOTECO sampa nechcamahui huan nechilhui: 18"Tlacatl, nopa israelitame ax tleno ininpati noixtla. Itztoque queja itetejtzo tlen quisas ipan se tepostli queja bronce, esta~no, hierro huan plomo huan mocahuas tlatzintla quema quimolon'iaj nopa tepostli ipan se horno. 19Yeca na, niDIOS Tlen M'as Nijpiya Tlanahuatili, niquijtohua: Xiquinilhui Jerusal'en ehuani para mochijtoque queja tlasoli tlen monequi quiquixtise tlen tepostli, huan huajca niquinhualicas notlacajhua tlen tlatlajco altepetl Jerusal'en para niquinmolonis. 20Queja quiatil'iaj huan quimolon'iaj tepostli ipan se horno tlen tlahuel totonic para quisas itlasolo, queja nopa niquintlatzacuiltis notlacajhua ica nochi nocualancayo huan quisas tlen ax cuali ipan yajuanti. 21Xiquinilhui israelitame: Nimechsejcotilis tlatlajco nopa altepetl huan queja se acajya quiilpitzas se tlitl, na nimechtlaijiyohuiltis ica miyac cualantli huan nopa hueyi tlitl inmechajsis huan nimechtlaijiyohuiltis. 22Huan quema intlaijiyohuise, quisas tlen ax cuali tlen imojuanti queja quisa itlasolo plata quema atiya ipan se horno. Huan quema ya nimechtlatzacuiltijtoc pampa miyac nicualani imohuaya, inquimachilise para na niDIOS." 23Huan TOTECO sampa nechcamahui huan nechilhui: 24"Tlacatl, xiquinilhui israelitame tlachque niquijtohua tlen quejatza eltos nopa tlali ipan tlali Israel. Xiquijto: 'Ipan nopa tonali quema nimechtlatzacuiltis ica nohueyi cualancayo, nopa tlali elis queja se tlali campa axaca tlamejtoc huan san oncas cuatitlamitl. O elis queja se huactoc tlali campa ax quema huetzi atl. 25Nopa imotiocamanalojcahua quisencahuaj san sejco ajqueya quicajcayahuase para quiichtequilise itomi. Itztoque queja le'on tecuani tlen quitemojtinemij se tlapiyali para quitzontlamiltise. Nopa tiocamanalohuani quincuil'iaj tlen ipati tlen eliyaya iniaxcahua miyac tlacame. Quinmict'iaj tlen ax tleno quichijtoque huan quichihuaj ma elica cahualme miyac sihuame. 26Nochi imototajtzitzi quiixpanotoque notlanahuatilhua huan quiijtlacojtoque nochi tlamantzitzi tlen tlatzejtzeloltique pampa eltoyaj tlaijiyocatlalili para na. Yajuanti ax quimatij catl'ia tlamantli tlatzejtzeloltic huan catl'ia tlamantli ijtlacajtoc. Ax quinnextil'iaj notlacajhua catl'ia tlamantli tlapajpactic noixpa para huelis motequihuise para nechhueyimatise huan catl'ia tlamantli ax tlapajpactic. Ax quichihuil'iaj cuenta nopa tonali tlen na nimechmacatoc para ipan ximosiyajcahuaca huan niyon quentzi ax nechtlepanitaj na tlen nitlatzejtzeloltic. 27Imotlayacancahua, inisraelitame, itztoque queja lobos tlen quiitzqu'iaj se tlapiyali huan quicocototzaj. Quitoyahuaj miyac estli huan temict'iaj para quitlanise tomi tlen ax xitlahuac. 28Imotiocamanalojcahua itztoque queja tlen quitlal'iaj nextli ipan se tepamitl tlen ax quipiya cuali mescla huan ya quinequi huetzis. Queja nopa quitlatise tlen melahuac. Yajuanti quiijtohuaj quiitztoque tlanextili huan quiselijtoque tlajtoli tlen na, pero ax neli. San istlacatij pampa na, niDIOS Tlen M'as Nijpiya Tlanahuatili, ax tleno niquinnextilijtoc, niyon ax tleno niquinilhuijtoc. 29Huan nojquiya ipan imotlal tlen hueli tlacame tlahuel tlatehu'iaj huan tlaxtequij. Quintlaijiyohuilt'iaj teicneltzitzi huan tlen ax tleno quipiyaj; huan tlen hueli quinchihuil'iaj nopa seyoc tlali ehuani tlen itztoque tlatlajco imojuanti. 30" 'Na nijtemo campa yajuanti se acajya tlen motlalanasqu'ia huan motlancuaquetzasqu'ia noixpa ipan ojtli huan nechtlajtlanisqu'ia ma ax niquintlamilti ni tlacame, pero ax nijpanti niyon se. 31Yeca na niquintlatzacuiltis nopa tlacame ica nohueyi cualancayo huan elis queja quinajsis se hueyi tlitl huan quintlamitlatis. Huan queja nopa niquintlaxtlahuis queja quinamiqui ipampa senquistoc nochi inintlajtlacolhua. Queja nopa na, niDIOS Tlen M'as Nijpiya Tlanahuatili, niquijtohua.' "

will be added

X\