Ezekiel 14

1Teipa sequin huehue tlacame tlen tlali Israel hualajque campa na niitztoya huan mosehuicoj noixpa. Quinequiyayaj ma nijtlajtlanis TOTECO se tlenijqui para quimatise tlachque quiijtos. 2Huan quema itztoyaj nopano, TOTECO nechcamahui huan nechilhui: 3"Tlacatl, ni tlacame ipan ininyolo quinhueyichihuaj huan quinicnel'iaj totiotzitzi. Yajuanti calactoque ipan miyac tlamantli tlen quinchihua ma tlajtlacolchihuaca. Huajca pampa queja nopa quichihuaj, ax quinamiqui niquincahuilis ma nechtlatzintoquilica se tlamantli. 4Huajca ama xiquincamahui huan xiquinilhui para quej ni na, niDIOS Tlen M'as Nijpiya Tlanahuatili, niquijtohua: 'Aqui hueli israelita tlen ipan iyolo quinhueyichihua totiotzitzi huan tlaixcopincayome huan motlalijtoc iniixpa tlamantli tlen quichihua ma huetzi ipan tlajtlacoli huan teipa hualas campa se notiocamanalojca para quitemos notlapalehuil, na niDIOS noselti nijtlatzacuiltis queja quinamiqui ica nochi tlen quichijtoc. 5Quena, na niquintlatzacuiltis para queja nopa sampa nijtlanis ininyolo huan inintlalnamiquilis nochi nopa israelitame tlen nechtlahuelcajtoque huan quinhueyichijtoque totiotzitzi huan tlaixcopincayome.' 6"Huajca xiquinilhui nochi israelitame para quej ni na, niDIOS Tlen M'as Nijpiya Tlanahuatili, niquijtohua: 'Ximoyolcuepaca tlen imotlajtlacolhua. Ximohuejcatlalica tlen imototiotzitzi huan imotlaixcopincayohua huan nochi nopa tlamantli tlen ax cuali inquichihuaj.' 7Pampa tlen hueli israelita o seyoc tlali ejquetl tlen itztoc tlatlajco imojuanti tlen nechtlahuelcahuas huan ipan iyolo quintlal'ia totiotzitzi huan tlaixcopincayome para quinhueyichihuas huan teipa monechcahuis campa se notiocamanalojca para nechtlajtlanis tlapalehuili, na niDIOS noselti nijtlatzacuiltis. 8Na nimoicancuepas huan niquincocolis tlacame tlen queja nopa quichihuaj huan niquintlatzacuiltis chicahuac. Niquintzontlamiltis huan nochi sequinoc quiitase huan imojuanti nojquiya inquiitase huan inquimachilise para na niDIOS. 9Huan intla se tlen nopa tlacajcayajca tiocamanalohuani mocajcayahuas huan moilhuis quiselijtoc se tlajtoli huan teipa temacas nopa tlajtoli tlen ax melahuac, huajca xijmatica para na niDIOS nijcajcayajqui. Huan itlajtol san elis se istlacayotl pampa ax mochihuas tlen yajaya quiijtohua, pero na nijcocolis nopa tiocamanalojquetl huan nijtzontlamiltis para ayoc itztos tlatlajco noisraelita tlacajhua. 10Quena, niquintlatzacuiltis nochi ome. Nijtlatzacuiltis nopa tlacajcayajca tiocamanalojquetl huan nopa tlacame tlen quinhueyichihuaj totiotzitzi huan teipa quitemohuaj tlapalehuili ipan se tiocamanalojquetl. 11Huan queja nopa, nopa israelitame ayoc nechtlahuelcahuase, niyon ayoc moijtlacose ica tlajtlacoli. Huan yajuanti elise notlacajhua huan na nielis niininDios. Queja nopa na, niininTECO Tlen M'as Nijpiya Tlanahuatili, niquijtohua." 12Huan TOTECO sampa nechmacac se tlajtoli huan nechilhui: 13"Tlacatl, quema nopa tlacame ipan ni tlali tlajtlacolchihuase ica na huan tlahuel nechixpanose, huajca na nijtlalanas noma huan niquintzontlamiltis. Huelis niquinquixtilis inintlacualis huan niquintitlanilis se mayantli para ma miquica tlacame huan tlapiyalime huan axaca huelis quinmanahuis. 14Yonque itztosqu'iaj nopano No'e, Daniel huan Job, ax quinmanahuisqu'iaj nopa tlajtlacolchijca tlacame. San momanahuisqu'iaj yajuanti pampa itztoque xitlahuaque noixpa. Pero nochi sequinoc nopa tlacame, niquintzontlamiltisqu'ia. Queja nopa na, niDIOS Tlen M'as Nijpiya Tlanahuatili, niquijtohua. 15"O huelis niquintitlanisqu'ia miyac tecuanime tlen tlahuel mosisin'iaj para ma quintzontlamiltica nochi nopa tlacame ipan ni tlali. 16Intla ni eyi cuajcualme itztosqu'iaj ipan nopa tlali, melahuac nimitzilhu'ia yajuanti ax huelisqu'iaj quinmanahuise inintelpocahua, niyon iniichpocahua, niyon nopa sequinoc tlacame. Momanahuisqu'iaj san yajuanti nopa eyi huan nochi m'as miquisqu'iaj huan ni tlali mocahuasqu'ia queja huactoc tlali. 17"O huelis niquinhualicasqu'ia soldados para ma quintehuica ni tlali ehuani huan nitlanahuatis ma quinmictica nochi nopa tlacame huan tlapiyalime. 18Yonque ni eyi cuajcualme itztosqu'iaj ipan ni tlali, san yajuanti momanahuisqu'iaj. Melahuac niquijtohua yajuanti ax huelisqu'iaj quinmanahuise inintelpocahua, niyon iniichpocahua. Queja nopa na, niDIOS Tlen M'as Nijpiya Tlanahuatili, niquijtohua. 19"O huelis ipampa nohueyi cualancayo nijtitlanisqu'ia ipan ni tlali se hueyi cocolistli tlen tlahuel tlamahua huan quichihuas ma miquica tlacame huan tlapiyalime. 20Yonque ipan ni tlali itztosqu'iaj No'e, Daniel huan Job, san yajuanti momanahuisqu'iaj pampa itztoque xitlahuaque noixpa. Melahuac nimitzilhu'ia, ax huelisqu'iaj quinmanahuise inintelpocahua, niyon iniichpocahua. Queja nopa na, niDIOS Tlen M'as Nijpiya Tlanahuatili, niquijtohua. 21"Yeca na, niDIOS Tlen M'as Nijpiya Tlanahuatili, niquijtohua: Noja m'as ax huelis momanahuise nopa israelitame quema na nijtitlanis ipan altepetl Jerusal'en nopa nahui tlamantli tlatzacuiltili tlen m'as fiero: tlatehuijcayotl, mayantli, tecuanime huan cocolistli tlen tlahuel tlamahua huan quichihuas ma miquica tlacame huan tlapiyalime. 22Pero mocahuase se quesqui ichpocame huan telpocame tlen yoltose. Huan yajuanti huelise quisase huan hualase mosejcotiliquij ica imojuanti tlen ama initztoque nica queja sejcoyoc ehuani ipan tlali Babilonia. Huan quema hualase, inquiitase quejatza monejnemiltijtoque nopa tlacame huan tlachque fiero quichijtoque. Huajca inmoyoltlalise huan inquimachilise para xitlahuac huan quinamiqui para nijtlatzacuilti altepetl Jerusal'en. 23Quena, imojuanti inmoyoltlalise quema inquiitase quejatza nel'ia fiero monejnemiltijtoque nopa tlacame huan fiero tlen quichijtoque. Huan huajca inquimachilise para melahuac quinamiqui nijtlatzacuilti altepetl Jerusal'en huan itlacajhua. Queja nopa na niDIOS Tlen M'as Nijpiya Tlanahuatili niquijtohua."

will be added

X\