Exodus 9

1Huajca TOTECO quiilhui Mois'es: --Xiya xiquitati Fara'on huan xiquilhuiti para na niDIOS, niininTECO hebreo tlacame, huan na niquilhu'ia ma quincahua notlacajhua ma yaca nechhueyichihuatij. 2Huan xiquilhui intla ax quincahuas ma yaca huan noja quintzacuilijtos, 3huajca na, niininTECO, nijtlalis noma ipan itlapiyalhua tlen itztoque campa potrero, huan niquinmacas se hueyi cocolistli tlen nelfiero. Nopa cocolistli quinajsis icahuayojhua, iburrojhua, icamellos, ihuacaxhua, huan iborregojhua. 4Pero na niininTECO niquiniyocatlalis inintlapiyalhua israelitame ica tlen iniaxcahua nopa Egipto ehuani, pampa ax nijcahuas ma miquis niyon se tlapiyali tlen israelitame. 5Nojquiya TOTECO tlayolmelajqui nopa tonal quema quichihuas pampa quiijto: --Na nijchihuas ni tlamantli mostla. 6Huan hualmostla TOTECO ya nopa quichijqui. Nochi inintlapiyalhua Egipto ehuani mijque, pero ax mijqui niyon se inintlapiyal israelitame. 7Huan Fara'on tlatitlanqui ma yaca quinitatij inintlapiyalhua nopa israelitame huan quipantitoj niyon se tlapiyali ax mictoya. Pero yonque ya nopa elqui, Fara'on moyoltetili huan ax quincahuili ma yaca nopa israelitame. 8Huajca TOTECO quinilhui Mois'es huan Aar'on: --Xijcuica ome tlamojtzoli cuanextli campa quicacatzohuaj pantzi huan xijmajcahua ica huejcapa ipan ajacatl iixtla Fara'on. 9Huan nopa cuanextli mocuepas tlaltejpoctli tlen m'as cuechtic huan mosemanas ipan nochi tlali Egipto huan quichihuas ma quisaca miyac tlaxhuisme ipan nochi tlacame huan tlapiyalime ipan tlali Egipto. 10Huajca Mois'es ihuaya Aar'on quicuique cuanextli campa quicacatzohuaj pantzi huan yajque quiitatoj Fara'on. Nopona Mois'es quimajcajqui nopa cuanextli ica huejcapa, huan ya nopa quichijqui ma quisaca tlaxhuisme tlen temalohuayayaj ipan nochi tlacame huan tlapiyalime. 11Huan nopa tetlajchihuiani ax huelque monextijque iixtla Mois'es pampa inijuanti nojquiya quinpixque tlaxhuisme campa hueli queja nochi Egipto ehuani. 12Pero TOTECO quichijqui para Fara'on ma moyoltetili huan ma ax quinchihuili cuenta Mois'es huan Aar'on, queja TOTECO quiilhuijtoya Mois'es para quichihuasqu'ia. 13Huajca TOTECO quiilhui Mois'es: --Mostla ximehua cualca huan xiya xiquilhuiti Fara'on para na tlen niininTECO nopa hebreo tlacame huan niquijtohua ma quincahua ma yaca notlacajhua para nechhueyichihuatij. 14Pampa ni huelta nijtitlanis se tlatzacuiltili tlen ajsis ipan iyolo Fara'on, huan ipan ininyolo nochi tlen quipalehu'iaj huan nochi itlacajhua. Huan ica ya ni yajaya quimatis para axaca seyoc Dios ipan nochi tlaltepactli, san na. 15Xiquilhui Fara'on para na nihueltosqu'ia nijmictijtosqu'ia ica se cocolistli ihuaya nochi itlacajhua. 16Pero xiquilhui na nijtlali ipan itequi huan nijcajtoc ma itzto hasta ama para nijnextilis nohueyi chicahualis huan para nochi tlacame ipan tlaltepactli ma quicaquica ajqueya na. 17Pero yonque quiitztoc nochi tlen nijchijtoc iixtla, noja quintzacuil'ia notlacajhua huan ax quincahua ma yaca. 18Huajca xiquilhui para mostla ipan ni hora nijchihuas ma huetzi tesihuitl nelchicahuac queja ax quema huetztoc ipan nochi tlali Egipto hasta quema pejqui ni tlali huan hasta ama. 19Huajca xiquilhui para nimantzi ma tlanahuati ma quintzacuaca inintlapiyalhua, pampa nopa tesihuitl quinmictis nochi tlacame huan nochi tlapiyalime tlen ax quintzacuase calijtic. 20Huan sequin itlapalehuijcahua Fara'on quineltocaque tlen TOTECO quiijto huan moisihuiltijque quintlalijque calijtic nochi inintlapiyalhua huan inintequipanojcahua tlen quincojtoyaj. 21Pero itztoyaj sequin tlen san quiahuilmatque itlajtol TOTECO tlen Mois'es quinilhuijtoya, huan quincajque ipan cuatitlamitl huan ax quintzajque calijtic. 22Huajca TOTECO quiilhui Mois'es: --Xijtlalana moma huan xijmanexti elhuicac para ma huetzi tesihuitl campa hueli ipan nochi tlali Egipto. Huetzis ipan nochi tlacame huan tlapiyalime huan huetzis ipan nochi tlatoctli ipan ininmil Egipto ehuani. 23Huajca Mois'es quitlalanqui icuatopil hasta elhuicac huan TOTECO quititlanqui tlatomonilotl, tlapetlanilotl huan tesihuitl ipan nochi tlali Egipto. Huan nel'ia fiero elqui. 24Tlahuel chicahuac huetzqui nopa tesihuitl huan tlapetlaniyaya huan ax moquetzayaya. Hasta ipejya Egipto ax quema huetztoya se tesihuitl queja nopa. 25Huan nopa tesihuitl quipolo nochi tlen oncayaya ipan tlali Egipto. Quinmicti nochi tlacame huan tlapiyalime tlen ax itztoyaj calijtic, huan quipolo nochi tlatoctli ipan mili huan nochi cuatini ipan inintlal. 26San ipan tlali Gos'en campa itztoyaj israelitame, ax huetzqui niyon se tesihuitl. 27Huajca Fara'on tlatitlanqui ma quinnotzatij Mois'es huan Aar'on huan quinilhui: --Ama nitlajtlacolchijtoc. Tlen imoTECO quichihua, ya nopa xitlahuac huan tlen na huan notlacajhua tijchihuaj, ax cuali. 28Nelmiyac tlatomonilotl huan tesihuitl techajsitoc, huajca ayoc niquintzacuilis m'as nopa israelitame. Xijtlajtlanica, imoTECO, topampa tojuanti para ma ayoc huetzi tesihuitl, huan na niquincahuas ma yaca israelitame. 29Huan Mois'es quinanquili: --Nimantzi quema niquisas tlen ni altepetl, nijtlalanas noma huan nimomaijtos ica TOTECO. Huan ayoc huetzis nopa tesihuitl huan ayoc tlatomonis, huan queja nopa tijmatis para ni tlaltepactli iaxca TOTECO. 30Pero na cuali nijmati para niyon ta, niyon tlen mitzpalehu'iaj, ax inquitlepanitaj TOTECO Dios. 31Huan nochi nopa tlatoctli tlen itoca lino huan cebada nenpolijque pampa nopa cebada ya eltoya para xitinis huan nopa lino xochiyojtoya. 32Pero nopa trigo ihuaya nopa centeno ax tleno ipantic, pampa xitini teipa. 33Huan quema Mois'es quisqui campa Fara'on huan campa nopa altepetl, quitlalanqui ima ica TOTECO huan momaijto. Huan nimantzi nochi moquetzqui. Ayoc huetzqui tesihuitl, niyon ayoc tlaahuetzqui huan ayoc tlatomonqui. 34Pero quema Fara'on quiitac para ayoc huetziyaya atl, niyon ayoc huetziyaya tesihuitl, niyon ayoc tlatomoniyaya, sampa tlajtlacolchijqui. Huan ax san ya moyoltetili, pero nojquiya san se quichijque nochi tlen quipalehuiyayaj. 35Huan pampa moyoltetili, Fara'on ax quincahuili ma yaca nopa israelitame queja TOTECO teyolmelajtoya ica Mois'es para quichihuasqu'ia.

will be added

X\