Exodus 8

1Huan TOTECO quiilhui Mois'es: --Xiya xiquitati Fara'on huan xiquilhuiti para niimoTECO niquijtohua para ma quincahuili ma yaca notlacajhua para nechhueyichihuatij. 2Pampa intla ax quincahuilis ma yaca, na tlahuel nijtlatzacuiltis nochi itlal ica temasolime. 3Nopa atemitl Nilo quinyolitis tlahuel miyac temasolime. Huan nopa temasolime calaquise ipan ichaj, huan calaquise ipan itlapech campa cochi. Huan calaquise ipan ininchajchaj itlapalehuijcahua huan itlacajhua. Huan hasta calaquise campa quixacualohuaj harina huan campa quicacatzohuaj pantzi. 4Huan nopa temasolime huitonise ipani, huan ininpan itlatequipanojcahua huan ininpan nochi itlacajhua. 5Huan nojquiya TOTECO quiilhui Mois'es: --Teipa xiquilhui Aar'on ma tlamanextis ica icuatopil ipan nopa atentli, huan campa mantoc atl para nopona ma quisaca temasolime huan ma quitemitica ni tlali Egipto. 6Huajca queja nopa Aar'on tlamanexti ica icuatopil ipan nopa atl tlen eltoya ipan tlali Egipto, huan nopona quisque temasolime tlen quitemitijque nochi nopa tlali. 7Pero nopa tetlajchihuiani nojquiya san se quichijque ica inintetlajchihuijcayo. Nojquiya quichijque ma hualaca temasolime ipan tlali Egipto. 8Teipa Fara'on tlatitlanqui ma quinnotzatij Mois'es ihuaya Aar'on huan quinilhui: --Xijtlajtlanica imoTECO para ma techijcuenili ni temasolime na ihuaya notlacajhua. Huan huajca niquincahuas itlacajhua ma yaca quimacatij tlacajcahualistli. 9Huan Mois'es quinanquili Fara'on: --Nimitzcahuilis para xinechilhui nopa hora quema tijnequi ma nimomaijtos mopampa ta, huan ininpampa tlen mitzpalehu'iaj, huan ininpampa motlacajhua. Huan ipan nopa hora quema ta tiquijtos, nimomaijtos ica TOTECO para nopa temasolime ma mitztlalcahuica, huan ma quitlalcahuica imochajchaj. Huan tiquitas para ipan nopa hora inmechtlalcahuise huan mocahuase san ipan atemitl. 10Huajca Fara'on quiijto: --Xijchihua mostla. Huan Mois'es tlananquili: --Queja nopa elis, huan yeca tijmatis para axaca itztoc queja TOTECO Dios, 11pampa nopa temasolime ayoc itztose ipan imochajchaj. Mitztlalcahuise huan quintlalcahuise motequipanojcahua huan motlacajhua. San mocahuase ipan nopa atemitl Nilo. 12Huajca Mois'es huan Aar'on quisque ipan ichaj Fara'on. Huan teipa Mois'es quitlajtlani TOTECO ma quinijcueni nopa temasolime tlen quintitlantoya ipan Fara'on. 13Huan TOTECO quichijqui tlen Mois'es quitlajtlani, huan mijque nopa temasolime tlen itztoyaj ipan caltini huan calixpamitl huan ipan mila. 14Huan nopa tlacame quinsentiliyayaj nopa temasolime tlen mictoyaj huan quinmontonojque campa hueli huan mijmiyotiyayaj tlahuel potehui. 15Pero yonque queja nopa elqui, quema Fara'on quiitac para ayoc oncac nopa tlamantli, moyoltetili huan ayoc quinchihuili cuenta Mois'es huan Aar'on, queja TOTECO quiijtojtoya para quichihuasqu'ia. 16Huajca TOTECO quiilhui Mois'es: --Xiquilhui Aar'on ma quixitlahuas icuatopil huan ma quimaquili nopa tlaltejpoctli para ma mocuepaca atime. 17Huajca queja nopa quichijqui. Huan Aar'on quimaquili nopa tlaltejpoctli tlen tlalchi ica icuatopil, huan mocuepqui atime tlen quinajsic nochi tlacame huan tlapiyalime pampa nochi tlaltejpoctli mochijque atime. 18Huan inijuanti tlen tetlajchihu'iaj quichijque campeca para quinchihuase atime ica inintetlajchihuijcayo, pero ax huelque. Huan oncac atime ipan tlacame huan ipan tlapiyalime. 19Huajca nopa tetlajchihuiani quiilhuijque Fara'on: --¡Ni tlamantli san Dios hueli quichihua! Pero Fara'on moyoltetili huan ax quintlacaquili, queja TOTECO quiijtojtoya para quichihuasqu'ia. 20Huan TOTECO quiilhui Mois'es: --Mostla ximehua cualca huan xiya xijnamiquiti Fara'on quema temos ateno para maltiti huan xijcamahui. Xiquilhui para nimoTECO niquijtohua ma quincahua ma yaca notlacajhua para ma nechhueyichihuatij. 21Pampa intla ax quincahuas ma yaca, na nijtitlanis miyac pamitl tlen pilsayoltzitzi ipan ya, ipan itequihuejcahua huan ipan nochi itlacajhua. Quena, temis ica pilsayoltzitzi ininchajchaj nochi Egipto ehuani, huan hasta tlalchi nojquiya temis. 22Pero quema quej ni panos niquiyocaquixtis tlali Gos'en campa itztoque notlacajhua. Nopona ax oncas niyon se pilsayoltzi. Quej nopa yajaya quimatis para na, niimoTECO, tlen niitztoc ipan ni tlali. 23Nijchihuas ya ni para nesis catl'ia notlacajhua huan catl'ia ax notlacajhua. Quej ni elis mostla. 24Huan TOTECO queja nopa quichijqui. Huan hualajque nochi tlamantli sayolime ipan Fara'on huan ipan ininchajchaj itlatequipanojcahua. Nochi tlali Egipto temic ica sayolime. 25Huajca Fara'on tlanahuati ma quinnotzatij Mois'es huan Aar'on huan quinilhui: --Xiyaca xijmacatij tlacajcahualistli imoTeco Dios, pero amo xiquisaca tlen ni tlali. 26Huan Mois'es tlananquili: --Ax cuali tijchihuase queja nopa, pampa inEgipto ehuani inquinijiyaj nopa tlapiyalime tlen tijmacaj TOTECO Dios. Huan intla inEgipto ehuani intechitasqu'iaj, na cuali nijmati intechmictisqu'iaj ica tetl. 27Monequi tiyase ipan huactoc tlali hasta campa hueli tiajsise ipan eyi tonali, huan nopona tijmacase tlacajcahualistli TOTECO Dios tlen tijtequipanohuaj pampa queja nopa yajaya technahuat'ia. 28Huajca Fara'on quiijto: --Na nimechcahuas xiyaca ipan huactoc tlali para xijmacaca itlacajcahualis imoTECO Dios, pero amo xiyaca nelhuejca. Huan xijtlajtlanica imoTECO Dios nopampa na. 29Huan Mois'es tlananquili: --Quema na niquisas nica, nijtlajtlanis TOTECO para mostla ma mitztlalcahuica nopa sayolime. Huan nojquiya quintlalcahuise tlen mitzpalehu'iaj huan nochi Egipto ehuani. Pero xijpiya cuidado amo xitechcajcayahua, niyon ayoc xiquintzacuili israelitame para ma yaca quimacatij tlacajcahualistli TOTECO. 30Huan quema Mois'es quisqui ichaj Fara'on, quitlajtlani TOTECO, ma tlamica nopa sayolime, 31huan TOTECO quichijqui tlen Mois'es quitlajtlani. Huan nopa sayolime quitlalcahuijque Fara'on, huan itlayacancahua huan nochi Egipto ehuani. 32Pero Fara'on sampa moyoltetili, huan ax quincahuili ma yaca nopa israelitame.

will be added

X\