Exodus 4

1Huan Mois'es tlananquili: --¿Tlaque nijchihuas intla nopa israelitame ax nechneltoquilise, niyon ax nechchihuilise cuenta? Huelis san quiijtose para ta, TOTECO, ax timonextijtoc nohuaya. 2Huajca TOTECO quiilhui Mois'es: --¿Tlaque tijpiya momaco? Huan Mois'es tlananquili: --Se cuatopili. Huan TOTECO quiilhui: 3--Xijmajcahua tlalchi. Huan Mois'es quimajcajqui tlalchi huan ipan nopa tlalochtli nopa cuatopili mochijqui se cohuatl. Huan Mois'es motlalojtejqui pampa quiimacasiyaya, 4pero TOTECO quiilhui: --Xiquitzqui ipan icuitlapil. Huan Mois'es quiitzqui nopa cohuatl huan mocuepqui sampa cuatopili. 5Huan TOTECO quiilhui: --Queja nopa tijchihuas iniixpa nopa israelitame para ma quineltocaca para na tlen niininTeco imohuejcapan tatahua, Abraham, Isaac huan Jacob, nimonextijtoc moixpa para nimitztequimacas. 6Huan TOTECO quiilhui: --Huan ama, xijcalaqui moma moyolixco. Huan Mois'es quicalaqui ima iyolixco huan quema quiquixti, quiitac para quipiyayaya nopa fiero tlacayo palanca cocolistli tlen itoca lepra huan eliyaya chipahuac queja sitlal setl. 7Huajca TOTECO quiilhui: --Sampa xijcalaqui moma moyolixco. Huan Mois'es queja nopa quichijqui. Huan quema sampa quiquixti ima, ya mochicajtoya huan eltoya cuali queja nochi itlacayo. 8Huajca TOTECO quiilhui: --Intla ica nopa achtohui tlanextilijcayotl, ax mitzneltoquilise, huajca mitzneltocase ica nopa tlen ompa. 9Pero intla ax mitzneltocase ica ni ome tlanextili, xijquixti atl tlen nopa atemitl huan xijtoyahua tlalchi. Huan quema nopa atl tlen tijquixtis ipan atemitl toyahuis tlalchi, mocuepas estli. Huan Mois'es quiilhui TOTECO: 10--¡Ay, Toteco! Na ax hueli nitlatenquixt'ia cuali. Huan ax san ama o yalohua ax nihueli. Ni tlen huejcajquiya. Nochipa quema nicamati, ohui quisa tlajtoli ipan nonenepil, pampa nitlajtolcuatacani. 11Pero TOTECO quiilhui: --Najaya niquinmacatoc inincamac tlacame. Naja nijchihua para se ma ax huelis camatis, o ma ax huelis tlacaquis. Nijchihua para se ma tlachiyas, o ma ax tlachiyas. 12Huajca xiya huan na niitztos mohuaya quema ticamatis, huan nimitznextilis tlen monequi tiquijtos. 13Huan Mois'es sampa quiijto: --¡Ay, Toteco! Xijchihua se favor, xijtitlani seyoc huan ax na. 14Huajca TOTECO cualanqui ihuaya Mois'es huan quiilhui: --¿Tiquita cualtitoc para yas mohuaya moicni Aar'on tlen nojquiya iixhui mohueyi tata Lev'i? Na nijmati para ya cuali camati. Huan ama huala ipan ojtli mitznamiquiqui. Yajaya paquis miyac quema mitzitas. 15Huajca xijcamahui huan xijpohuili nochi tlen monequi quiijtos, huan yajaya camatis tlen tijpohuilis. Huan na niitztos imohuaya quema incamatise huan nimechnextilis tlen monequis inquichihuase. 16Ta tiquilhuis Aar'on tlen monequi quiijtos huan Aar'on quinilhuijtiyas sequinoc tlen ta tiquilhuis. Yajaya camatis tlen ta ticamatisqu'ia huan mitztlepanitas queja tiitztosqu'ia ta tiDios. 17Pero xijhuica ni cuatopili ipan moma pampa ica ya ni tijchihuas tlanextilijcayotl tlen huejhueyi. 18Huajca Mois'es mocuepqui ichaj imontat Jetro, huan quiilhui: --Xinechcahuili ma nimocuepa tlali Egipto campa itztoque noicnihua tlen san se estli tijhuicaj. Nijnequi niquitas intla noja itztoque. Huan Jetro tlananquili: --Xiya ica cuali. 19TOTECO quiilhui Mois'es quema noja itztoya ipan tlali Madi'an: --Amo ximajmahui ximocuepa ipan tlali Egipto pampa ya mijque nochi tlen quinequiyayaj mitzmictise. 20Huajca Mois'es quincuitejqui isihua huan icone huan quintlecolti ipan se burro huan mocuepqui tlali Egipto. Huan ipan ima quihuicayaya nopa cuatopili tlen Toteco Dios quimacac. 21Huan teipa TOTECO quiilhui Mois'es: --Quema tiajsiti tlali Egipto, xiquita para tijchihuas iixtla Fara'on nochi nopa tlanextilijcayotl tlen nimitzmacatoc chicahualistli xijchihua. Pero na nijyoltetilis para ax quincahuas ma quisaca israelitame. 22Huajca tiquilhuis Fara'on para na niimoTECO niquijtohua para nopa israelita tlacame niquinicnel'ia queja se quiicnel'ia icone achtohui ejquetl. 23Huan xiquilhui para niquilhu'ia ma quincahuili ma quisaca para yase nechhueyichihuatij. Pero intla ax quincahuas ma quisaca, na nijmictis icone achtohui ejquetl. Queja nopa xiquilhuiti Fara'on. 24Huan quema moquetztoya Mois'es huan iteixmatcahua nopa tlayohua ipan ojtli para tlali Egipto, TOTECO monexti ica Mois'es, huan quinequiyaya quimictis pampa ax quichijqui queja quiijtohua tlanahuatili. Ax quipiltzontequilijtoya iyecapa nopa cuetlaxtli tlen eltoc ipan ipiltlacayo ioquichpil. 25Huajca isihua Mois'es tlen itoca S'efora quicuic se cuchillo tlen tetl huan quipiltzontequili tlen monequi ipan ipiltlacayo icone huan quitoxonqui ipan iicxi Mois'es huan quiilhui: "Nel'ia, ta tise nohuehue tlen espoltic." 26Huajca TOTECO ayoc cualanqui ica Mois'es huan quicahuili ma yohui. Huan S'efora quitocajti Mois'es "nohuehue tlen espoltic" pampa monejqui yajaya quitzontequilis icuetlaxo icone. 27Nojquiya TOTECO quiilhuijtoya Aar'on para ma yas ipan nopa huactoc tlali para mopantiti ihuaya Mois'es. Huajca Aar'on yajqui quinamiquito Mois'es ipan nopa tepetl campa monextijtoya Toteco Dios. Huan nopona Aar'on quitlajpalo huan quitzoponi. 28Huan Mois'es quipohuili Aar'on nochi tlamantli tlen TOTECO quiilhuijtoya ma quiijto huan nojquiya quinextili nopa huejhueyi tlanextilijcayotl tlen quinahuatijtoya ma quichihua. 29Huajca Mois'es huan Aar'on ajsitoj tlali Egipto huan quinsentilijque nopa huehue israelita tlacame. 30Huan Aar'on quinpohuili nochi tlen TOTECO quiilhuijtoya Mois'es huan quichijqui nopa tlanextilijcayotl tlen TOTECO quinextilijtoya ma quichihua. 31Huan nochi nopa tlacame quineltocaque para TOTECO quintitlantoya. Huan quema quimatque israelita tlacame para TOTECO quinchihuilijtoya cuenta huan quinitztoya queja tlaijiyohuiyayaj, motlancuaquetzque iixpa TOTECO huan quihueyichijque.

will be added

X\