Exodus 33

1Huan TOTECO quiilhui Mois'es: --Xiquisa tlen nica huan xiquinyacana nopa tlacame tlen tiquinquixti tlali Egipto, huan xiquinhuica hasta nopa tlali tlen niquintencahuili Abraham, Isaac huan Jacob para niquinmacas iniixhuihua. 2Huan nijtitlanis se elhuicac ejquetl ma mitzyacana, huan yajaya quinquixtis tlen nopa tlali nopa cananeos, amorreos, heteos, ferezeos, heveos huan jebuseos. 3Huan inmechhuicas ipan nopa tlali tlen nochi temaca hasta mocahua itlajca. Pero na ax niyas imohuaya, pampa nohueli nimechixpolihuiltis ipan ojtli, pampa tlahuel tetic imoyolo. 4- 5Huan TOTECO quiilhui Mois'es: --Xiquinilhui nopa israelitame para inijuanti nel'ia yoltetique. Xiquinilhui intla niitztosqu'ia ininhuaya seyoc tlalochtli, huelis niquintlamiixpolihuiltijtosqu'ia. Huajca xiquinilhui ma moquixtilica nochi nopa tlayejyecchijchijcayotl tlen oro tlen quihualicaj queja pactoque, huan niquitas tlaque nijchihuas ica inijuanti. Huan tlahuel miyac mocuesojque nopa israelitame quema quicajque ni tlajtoli tlen chicahuac. Huan nochi moquixtilijque ininyejyecchijchijca tlen oro huan ininyoyo tlen yejyectzitzi para ma ax nesis queja pactoque, pampa ayoc paquiyayaj. 6Huajca ipan tepetl Horeb nopa israelitame moquixtilijque ininpijpilolhua, inincoshua, huan nochi tlen ica mocualtlaliyayaj para moyejyecchijchihuase. Huan ayoc quitequihuijque. 7Huan Mois'es ya momajtoya quiiyocaquetza se yoyoncali se quentzi huejca tlen ininyoyoncalhua nopa israelitame. Huan quitocajti nopa yoyoncali campa timopantise ihuaya TOTECO. Huan quema acajya quinequiyaya quitlajtlanis TOTECO se tlenijqui para quimatis ipaquilis, yahuiyaya ipan nopa yoyoncali campa mopantis ihuaya TOTECO tlen eltoya iyoca tlen ne sequinoc yoyoncaltini. 8Huan tlen hueli hora quema Mois'es yahuiyaya para mopantiti ihuaya TOTECO, nochi tlacame momatque quisaj ininchajchaj huan moquetzaj ininpuertajteno huan quitlachil'iaj Mois'es hasta quema oncalaquiyaya ipan nopa yoyoncali. 9Huan sesen huelta quema Mois'es calaquiyaya ipan nopa cali, nopa mixtli hualtemoyaya huan motlaliyaya ipuertajteno quema TOTECO camatiyaya ihuaya Mois'es. 10Huajca quema nopa israelitame quiitaque nopa mixtli moquetztoya ipuertajteno nopa yoyoncali, sese inijuanti motlancuaquetzayaya icalixpa huan quihueyichijque Toteco. 11Huan TOTECO quicamahui Mois'es moixtlachiliyayaj queja se tlen camati ihuaya ihuampo. Huan teipa Mois'es mocuepayaya campa ne sequinoc yoyon caltini. Pero nopa telpoca tlacatl Josu'e, itelpoca Nun tlen quipalehuiyaya Mois'es, mocahuayaya nopona ipan nopa yoyoncali campa mopant'iaj ihuaya TOTECO. 12Huan Mois'es quiilhui TOTECO: --Xiquita, tinechilhu'ia ma niquinyacana ni israelitame hasta nopa cuali tlali, pero ax tinechilhu'ia ajqueya tijtitlanis nohuaya. Nojquiya tiquijtohua para cuali tinechixmati huan tinechcualitztoc. 13Ama nimitztlajtlan'ia se favor. Intla nel'ia tinechcualitztoc, xinechilhui tlaque mopaquilis para nijchihuas huan queja nopa m'as huelis nimitzixmatis. Huan na nimitzneltocas huan noja tinechcualitztinemis. Huan xiquilnamiqui para ni tlacame tlen niquinyacana, nochi timoaxcahua. 14Huan TOTECO quinanquili: --Na, niimoTECO, niyas mohuaya huan nijchihuas para ximosiyajcahua. 15Huan Mois'es quiijto: --Intla ax tohuaya tiyas, amo xitechchihua ma tiquisaca tlen nica. 16Pampa intla ax tohuaya tiyas, sequinoc tlacame ax quimatise para titechicnel'ia, na huan ni motlacajhua. Intla ta ax tohuaya tiyas, huajca san se tiitztose queja tlen hueli tlacame. Pero intla ta tiyas tohuaya, nesis titechtlapejpenijtoc huan titechiyocatlalijtoc tlen nochi sequinoc tlacame ipan ni tlaltepactli. 17Huan TOTECO quiilhui Mois'es: --Huajca nijchihuas tlen tiquijtojtoc pampa nijmati tijchihuas tlen cuali, huan ta nimitzitas para tinonelhuampo. 18Huajca Mois'es quiijto: --Huajca nimitztlajtlan'ia, xinechcahuili ma nimitzitas ta ica nochi motlatlanex tlen yejyectzi. 19Huan TOTECO quinanquili: --Na nijchihuas ma panos moixtla nochi tlen cuali tlen na. Huan quema nipanos, niquijtos tlen quiijtosnequi notoca, TOTECO. Na nijtlapejpen'ia catl'ia nijtlasojtlas huan catl'ia ihuaya nijpiyas hueyi noyolo. 20Pero noxayac ax huelis tiquitas, pampa niyon se tlacatl ax huelis quiitas noxayac huan itztos. 21Huajca TOTECO quiilhui: --Nica nonechca eltoc se hueyi tetl, nopona ximoquetza ipani. 22Huan na nimitztlalis campa tlacoyontoc ipan nopa hueyi tetl, huan quema nipanos huan nesis notlatlanex nimitzixtzacuas ica noma hasta ya nipanotos. 23Teipa niquijcuenis noma, huan huelis tiquitas nocuitlapa, pero noxayac ax tiquitas.

will be added

X\