Exodus 32

1Quema nopa israelitame quiitaque para Mois'es huejcahuayaya huan ax nimantzi temoyaya tlen nopa tepetl, mosentilijque campa Aar'on huan quiilhuijque: --Xitechchihuili se tlaixcopincayotl para ma techyacana pampa ax tijmatij tlaque ipantitoc Mois'es tlen techquixti ipan tlali Egipto. 2Huan Aar'on quinilhui: --Ma moquixtilica ininpijpilolhua imosihuajhua, imotelpocahua huan imoichpocahua; huan ma nechhualiquilica nica. 3Huajca nochi moquixtilijque ininpijpilolhua huan quihuiquilijque Aar'on. 4Huan yajaya quiseli huan quiatili nopa oro, huan quema quiquixti ipan tlitl, quitejtzonqui ica se martillo huan quichijqui queja se becerro. Huajca nopa israelitame quiijtojque: --¡Xitlacaquica inisraelitame, ya ni todios tlen techquixti ipan tlali Egipto! 5Huan quema Aar'on quiitac quejatza paquiyayaj nopa israelitame, quisencajqui se tlaixpamitl iixtla nopa becerro, huan teyolmelajqui: --Mostla tijpiyase se ilhuitl para TOTECO. 6Huan hualmostla nochi israelitame mejque cualca huan quinmictijque tlapiyalime huan quintlatijque ipan nopa tlaixpamitl, huan quimacaque tlacajcahualistli para Toteco ma moyoltlali ininhuaya. Teipa nochi mosehuijque ipan se hueyi tlacualistli huan tlacuajque huan tlaique queja ax monequi. Huan teipa nochi quichihuayayaj tlen fiero queja tlen quichihuaj tlen hueli tlacame. 7Huajca TOTECO quiilhui Mois'es: --Xitemo amantzi tlen ni tepetl, pampa motlacajhua tlen tiquinquixti tlen tlali Egipto monenpolojtoque. 8Nimantzi quicajtejque nopa tlanahuatili tlen niquinnahuati ma quitoquilica. Quiatilijque oro huan mochihuilijque se becerro huan amantzi quihueyichihuaj huan quimactil'iaj tlacajcahualistli, huan quiijtohuaj: 'Inisraelitame, ya ni imodios tlen inmechquixti ipan tlali Egipto.' 9Nojquiya TOTECO quiilhui Mois'es: --Nimomacatoc cuenta quejatza itztoque ni tlacame huan niquita para nelyoltetique. 10Huajca ama xinechcahua, pampa nel'ia tlahuel nicualani ininhuaya huan niquintzontlamiltis, pero tlen ta, Mois'es, niquinchihuas sequinoc tlacame tlen momiyaquilise tlahuel miyac huan itztose ipan se hueyi tlali. 11Pero Mois'es chicahuac quitlajtlani ITECO Dios ma amo quichihua, quiijto: --¡Ay TOTECO! ¿Para tlen ticualanis ica motlacajhua tlen ta tiquinquixti ipan tlali Egipto ica mohueyi chicahualis? 12Nopa egiptome quiijtose para ta tlen tiininTeco tiquinquixti ipan tlali Egipto, pampa ya timoilhuiyaya para tiquinmictis ipan tepetini, pampa tijnequiyaya tiquinixpolihuiltis tlen ni tlaltepactli. TOTECO, ax hueli tiquincahuilise egiptome ma quiijtoca ya nopa. Yeca ayoc xicualani. Ximoyolcuepa ica tlen timoilhuijtoc tijchihuas huan amo xiquincoco motlacajhua. 13Xiquinilnamiqui Abraham, Isaac, huan Israel motequipanojcahua tlen ta timotestigojquetzqui ica moselti huan tiquinilhui tiquinmiyaquilis iniixhuihua para ma elica tlahuel miyaqui hasta axaca huelis quinpohuas. Tiquijto itztose queja imiyaca sitlalime nepa elhuicac. Huan nochi ni tlali tiquinmacas iniixhuihua. Huan tiquijto quiselise huan elis iniaxca para nochipa. Quena, queja nopa tiquintencahuili motequipanojcahua. 14Huajca TOTECO moyolcuepqui ica tlen moilhuijtoya quinchihuilisqu'ia itlacajhua. 15Huan Mois'es pejqui temo tlen nopa tepetl, huan quihualicayaya imaco nopa ome tepatlactli tlen quipixtoya nopa tlanahuatili. Huan itlanahuatilhua Toteco ijcuilijtoya iixtla huan iica nopa tepatlactli. 16Yajaya Toteco Dios tlen quitejtejqui nopa tetl huan quichijqui nopa tepatlactli huan yajaya tlen ipan tlajcuilo. 17Huan quema Josu'e quicajqui tlahuejchihuayayaj nopa israelitame nopona tlatzintla, quiilhui Mois'es: --Nijcaqui tlahuejchihuaj campa itztoque nopa tlacame queja onca se tlatehuijcayotl. 18Pero Mois'es quinanquili: --Ax tlahuejchihuaj pampa tlatlantoque, niyon ax quichihuaj pampa sequinoc quintlantoque. Nijcaqui tlen huicaj seyoc tlamantli huicatl. 19Huan quema Mois'es monechcahuiyaya campa itztoyaj nopa israelitame, quiitac nopa becerro huan quejatza mijtotiyayaj, huan nel'ia cualanqui. Huan quimajcajqui itzintla tepetl nopa tepatlactli tlen quihuicayaya imaco huan cuechtic mocajqui. 20Huan quicuic nopa becerro tlen quichijtoyaj huan quitlati, huan quitisqui hasta quichijqui tlatixtic. Huan nopa itlatixo quiijtzelo ipan atl, huan quinchihualti nopa israelitame ma quiica nopa atl. 21Huan Mois'es quiilhui Aar'on: --¿Tlaque mitzchihuilijque ni tlacame para tiquinyacantoc ma quichihuaca ni tlajtlacoli nelhueyi? 22Huan Aar'on tlananquili: --Amo xicualani nohuaya, tata. Ta cuali tijmati ni tlacame quinpact'ia quichihuase tlen ax cuali. 23Inijuanti nechilhuijque ma niquinchihuili se tlaixcopincayotl para ma techyacanas pampa ax tijmatque tlaque mopantic ta tlen titechquixti ipan tlali Egipto. 24Huan na niquinnanquili para intla quipiyaj tlamantli tlen oro, ma quiquixtica huan inijuanti nechmacaque. Huan nijtlali nopa oro ipan tlitl huan quisqui ni becerro. 25Huan Mois'es quiitac para nochi quipolojtoyaj ininpinahualis. Huan Aar'on quincahuilijtoya ma quichihuaca tlen hueli tlen quinequiyayaj quichihuase. Huan quiitac inincualancaitacahua quinhuetzquiliyayaj. 26Huajca moquetzqui iixmelac campa calaquiyayaj ipan ipejya nopa altepetl tlen ininyoyoncalhua. Huan Mois'es quiijto: --Nochi tlen itztoque ica TOTECO ma hualaca nica nohuaya. Huan nochi iixhuihua Lev'i mosentilijque ihuaya. 27Huajca Mois'es quinilhui tlen moiyocatlalijtoyaj ica ya: --TOTECO Dios tlen tiisraelitame quiijtohua para sesen imojuanti monequi xijcuica imomachete, huan xipehuaca ipan nopa achtohui caltini huan xipanotiyaca hasta campa ontlami nochi ni yoyoncaltini. Huan xicalaquica ipan sesen yoyoncali huan xiquinmijmictijtiyaca yonque imoicnihua, imohuampoyohua o imocalnechcahua pampa tlahuel fiero quichijtoque. 28Huan iixhuihua Lev'i quichijque queja Mois'es tlanahuatijtoya huan ipan nopa tonal mijque nechca eyi mil tlacame. 29Huajca Mois'es quinilhui: --Ama inmoiyocatlalijque para itequi TOTECO pampa inquineltocatoque tlen inmechnahuatijtoc, yonque monejqui inquintzontlamiltijque imoconehua huan imoicnihua. Huajca ama TOTECO inmechtiochihuas. 30Huan hualmostla Mois'es quinilhui ne sequinoc israelitame: --Inquichijtoque se hueyi tlajtlacoli. Ama monequi niyas huan nitlejcos campa itztoc TOTECO huan intla nihuelis nimechixtzacuilis imotlajtlacol. 31Huajca Mois'es mocuepqui campa itztoya TOTECO, huan quiilhui: --Melahuac nopa tlacame quichijtoque se hueyi tlajtlacoli huan mochihuilijque se tlaixcopincayotl tlen oro. 32Na nimitztlajtlan'ia chicahuac xiquintlapojpolhui. Intla axtle, nojquiya xinechmicti na, huan xiquixpolo notoca ipan nopa amatlapohuali tlen tiquijcuilo. 33Pero TOTECO quinanquili Mois'es: --San niquixpolos itoca huan nijmictis tlen noca na tlajtlacolchihua. 34Huajca xiya xiquinhuica nopa tlacame hasta campa nimitzilhui. Huan xijmati para temachtli noelhuicac ejca mitzyacanas. Pero quema ajsis nopa tonali quema nitetlatzacuiltis, niquintlatzacuiltis ni tlacame ipampa inintlajtlacolhua. 35Huan TOTECO quititlanqui se tlatzacuiltijca cocolistli ipan nopa tlacame pampa quihueyichijque nopa becerro tlen Aar'on quichijqui.

will be added

X\