1 Huan TOTECO quiilhui Mois'es: --Xitlejco campa na niitztoc, ta ihuaya Aar'on, Nadab, Abi'u huan nopa 70 huehue tlacame tlen mohuaya quinyacanaj ni israelitame. Inijuanti ma motlancuaquetzaca ica huejca para nechhueyimatise. 2 San ta, Mois'es, huelis tinechnechcahuis campa na, niimoTECO, niitztoc. Nopa sequinoc tlayacanani ax huelise nechnechcahuise, huan nopa sequinoc israelitame ax huelis tlejcose nica imohuaya. 3 Huan Mois'es yajqui quinpohuilito nopa israelitame nochi tlen TOTECO quiijtojtoya huan tlen tlanahuatijtoya. Huan nochi israelitame san se huelta tlananquilijque: --Nochi tlen TOTECO quiijtojtoc, tijchihuase. 4 Huajca Mois'es quiijcuilo nochi tlen TOTECO quiilhuijtoya. Huan hualmostla cualca mejqui huan quisencajqui se tlaixpamitl itzintla nopa tepetl, huan quiquetzqui nopa tlaixpamitl ipan majtlactli huan ome tetini queja imiyaca itelpocahua Israel tlen ica pejqui nopa majtlactli huan ome huejhueyi familias tlen israelitame tlen ama onca. 5 Teipa quintitlanqui sequin israelita telpocame ma quimacaca TOTECO tlacajcahualistli tlatlatili. Huan quinmictijque huan quintlatijque torojme para tlacajcahualistli para ma quipiyaca tlayoltlalili ihuaya TOTECO. 6 Huan Mois'es quicuic tlajco nopa estli, huan quitejqui ipan huajcaltini huan nopa seyoc tlajco quiijtzelo ipan tlaixpamitl. 7 Teipa quicuic nopa amatlapohuali tlen quipixtoya itlanahuatil TOTECO, o nopa tlajtolsencahuali tlen TOTECO quichijqui ininhuaya israelitame huan tlen monequi quineltocase. Huan quinpohuili nochi nopa amatlapohuali huan inijuanti quiijtojque: --Quena, tijneltoquilise TOTECO huan tijchihuase nochi tlen yajaya techilhuijtoc. 8 Huajca Mois'es quicuic nopa estli ipan huajcaltini, huan quinijtzelhuili nochi israelitame, huan quiijto: --Ya ni nopa estli tlen quipehualt'ia nopa tlajtolsencahuali tlen TOTECO quichijtoc imohuaya quema inmechmacac nochi ni tlanahuatili. 9 Huan teipa Mois'es tlejcoc ipan nopa tepetl ihuaya Aar'on, Nadab, Abi'u huan nopa 70 huehue tlacame tlen quinyacanayayaj nopa israelitame. 10 Huan nopa israelita tlayacanani quiitaque Dios, ininTeco israelitame. Huan tlatzintla iicxihua quipixqui se piso azultic queja nopa yejyectzi tetl tlen itoca zafiro, huan eliyaya tlahuel tzalintic queja elhuicactli. 11 Huan yonque nopa tlayacanca israelitame quiitaque Toteco Dios huan san sejco tlacuajque huan atlique iixtla, ax quinmicti. 12 Huan TOTECO quiilhui Mois'es: --Xitlejco campa niitztoc ipan ni tepetl huan ximocahua nica. Huan nimitzmacas nopa tepatlactli campa niquijcuilojtoc nopa ley huan nochi nopa tlanahuatili para tiquinmachtis israelitame. 13 Huan Mois'es tlejcoc ipan itepe Toteco ica Josu'e itlapalehuijca. 14 Huan quinilhui nopa huehue tlacame: --Xinechchiyaca nica hasta quema timocuepase. Nica mocahuase Aar'on huan Hur imohuaya, huan intla acajya quipiya se cualantli quema ax niaca, ma quinilhuica inijuanti. 15 Huan Mois'es tlejcoc ipan nopa tepetl huan se mixtli quitzajqui. 16 Huan itlatlanex TOTECO temoc ipan tepetl Sina'i, huan nopa mixtli quitzajqui nopa tepetl para chicuasen tonali. Huan quema ajsic nopa chicompa tonal, TOTECO quinotzqui Mois'es tlatlajco ipan nopa mixtli. 17 Huan nopa israelitame tlen itztoyaj tlatzintla quiajcotlachilijque huan quiitaque itlatlanex TOTECO, huan para inijuanti elqui queja se tlilelemectli tlen nochi quitlatiyaya tepeixco. 18 Huajca Mois'es tlejcotiyajqui ipan nopa tepetl, huan calajqui ipan nopa mixtli huan nopona mocajqui para 40 tonali huan 40 yohuali.
