Exodus 2

1Se tonal se tlacatl tlen eliyaya se iteipa ixhui nopa huejcapan tata Lev'i mosihuajti ihuaya se sihuatl tlen nojquiya eliyaya se iteipa ixhui, pero ipan seyoc familia. 2Huan isihua conecuic huan quipixqui se icone. Huan quema quiitaque para nopa oquichpil eliyaya yejyectzi, quitlatijque para eyi metztli. 3Pero quema itatahua ayoc huelque quitlat'iaj m'as tonali, quicuique se chiquihuitl tlen quichijtoya ica acatl, huan inana quitzajtzajqui ica chapopojtli para ma ax calaqui atl. Teipa quitlali nopa pilconetzi iijtic nopa chiquihuitl huan quicahuato acatzala iteno nopa atemitl Nilo. 4Nojquiya quiilhui ihuelti nopa pilconetzi ma quihuejcaita para ma quimati tlaque panosqu'ia. 5Huan m'as tiotlac, iichpoca Fara'on ininhuaya itlatequipanojcahua temoque para maltitij ateno. Huan quema nejnemiyayaj nechca atemitl, quiitaque nopa chiquihuitl tlatlajco acame. Huajca nopa ichpocatl quititlanqui se isihua tlatequipanojca ma quihualiquili nopa chiquihuitl. 6Huan quitlapo nopa aca chiquihuitl, huan quitlachili iijtic huan nopona itztoya se piloquichpiltzi tlen chocayaya. Huan iichpoca Fara'on quitlasojtlac huan quiijto: --Ni se piloquichpiltzi hebreo. 7Huajca iicni nopa pilconetzi monechcahui campa iichpoca Fara'on huan quiilhui: --¿Tijnequi ma nijnotzati se hebreo sihuatl tlen tlachichit'ia para ma quiiscalti ni oquichpil? Huan iichpoca Fara'on tlananquili: 8--Quena, xijnotzati. Huajca iicni nopa pilconetzi yajqui quinotzato inana, 9huan iichpoca Fara'on quiilhui: --Xijhuica ni oquichpil huan xinechchichitili, huan na nimitztlaxtlahuis motequi. Huajca inana nopa piloquichpiltzi quihuicac huan quiiscalti. 10Huan quema ya moscaltijtoya, quimactili iichpoca Fara'on. Huan nopa ichpocatl quichijqui icone huan quitocajti Mois'es. (Mois'es quinequi quiijtos Tlaquixtili.) Queja nopa quitocajti pampa quiijto: --Na nijquixti ipan atl. 11Se tonal quema Mois'es ya motlacachijtoya, quisqui para quinpaxaloti nopa hebreos pampa quimatqui para san se estli quipixqui ininhuaya huan momacac cuenta para nelohui inintequi. Huan quiitac se tlacatl Egipto ejquetl quihuitequiyaya se tlacatl hebreo huan quitlasojtlac, pampa eliyaya san se inieso. 12Huajca Mois'es tlachixqui campa hueli huan quema axaca quiitac, quimicti nopa tlacatl Egipto ejquetl huan quitlati itlacayo ipan xali. 13Huan hualmostla sampa quisqui Mois'es huan quiitac para ome hebreo tlacame motehuiyayaj, huajca quitlajtlani tlen tlatehuiyaya: --¿Para tlen tijmaquil'ia mohuampo huan san se imoeso inquipiyaj? 14Huan nopa hebreo tlacatl quinanquili: --¿Ajqueya mitztlalijtoc ta queja titlayacanquetl o tijuez ica tojuanti? ¿Huelis timoilhu'ia tinechmictis queja yalohua tijmicti nopa Egipto ejquetl? Quema Mois'es quicajqui ni tlamantli, majmajqui, pampa momacac cuenta para sequin quimatiyayaj para quimictijtoya nopa tlacatl Egipto ejquetl. 15Huan quema Fara'on quimatqui para Mois'es quimictijtoya se tlacatl Egipto ejquetl, tlatitlanqui ma quitemotij para quimictis, pero Mois'es cholojtejqui huan yajqui itztoti ipan tlali Madi'an. Huan quema ajsito nepa mosehuito nechca se ameli. 16Huan nopona ipan tlali Madi'an itztoya se totajtzi tlen itoca Reuel huan quinpixtoya chicome iichpocahua. Huan ipan nopa tonal inijuanti ajsitoyaj campa nopa ameli para quiquixtise atl huan quitemitise campa atlij tlapiyalime huan quinamacase inintata iborregojhua. 17Pero hualajque sequinoc borrego tlamocuitlahuiani huan quintojtocaque nopa ichpocame. Huajca Mois'es motlalanqui, huan quinmanahui huan teipa quinamacac ininborregojhua. 18Huan quema nopa ichpocame mocuepque campa itztoya inintata Reuel, yajaya quintlajtlani: --¿Quejatza ama inmocuepque nimantzi? 19Huan tlananquilijque: --Se Egipto ejquetl techmanahui ininmaco nopa sequinoc tlamocuitlahuiani. Huan teipa yajaya quiquixti atl para tojuanti huan quinamacac toborregojhua. 20Huan inintata quintlajtlani: --Huan ¿canque itztoc nopa tlacatl? ¿Para tlen inquicajtejque iselti? Xiyaca xijnotzati ma tlacuaqui. 21Huan Mois'es hualajqui huan mocajqui ipan ichaj Reuel. Huan teipa Reuel quimacac Mois'es iichpoca tlen itoca S'efora para isihua. 22Huan teipa S'efora quipixqui icone huan Mois'es quitocajti Gers'on. (Gers'on quinequi quiijtos Sejcoyoc Ejquetl.) Pampa quiijto: "Ama nise sejcoyoc ejquetl ipan ni tlali tlen ax niquixmati." 23Huan Mois'es itztoya para miyac xihuitl ipan tlali Madi'an. Huan ipan nopa tonali ipan tlali Egipto mijqui nopa tlanahuatijquetl. Pero nopa israelitame noja tlahuel tlaijiyohuiyayaj huan mocuesohuayayaj pampa tlatequipanohuayayaj san tlapic. Huan ajachica quitlajtlaniyayaj Toteco Dios ma quinpalehui ipan inintlaijiyohuilis. 24Huan Toteco quincajqui. Quena, quichihuili cuenta tlen quinequiyayaj pampa ax quiilcajqui tlen ininca mocajtoya Abraham, Isaac huan Jacob para quinmacas iniixhuihua se tlali. 25Huajca Toteco Dios quinitac nopa israelitame huan quintlasojtlac.

will be added

X\