Exodus 17

1Huan nochi nopa miyac israelitame quisque tlen tlali Sin huan yajque ica yolic queja TOTECO quinnahuatiyaya. Huan nejnentiyajque huan quiijcuenijtiyajque ininyoyoncalhua mojmostla hasta ajsitoj campa itoca Refidim. Pero nopona ax oncayaya atl para atlise, 2huajca cualanque ica Mois'es huan quiilhuijque: --¡Xitechmaca atl para tiatlise! Huan Mois'es quinnanquili: --¿Para tlen incualanij noca na? San inquicualancamacaj huan inquiyejyecohuaj TOTECO. 3Pero nochi inijuanti amiquiyayaj huan quitlaijilhuiyayaj Mois'es, huan quiilhuijque: --¿Para tlen titechchihuili ma tiquisaca ipan tlali Egipto? ¿Para tlen titechhualicac nica? San titechamictis ica toconehua huan totlapiyalhua. 4Huajca Mois'es quinojnotzqui TOTECO huan quiilhui: --¿Tlaque nijchihuas ica ni tlacame? ¡San se quentzi m'as huan nechtepachose! 5Huan TOTECO quinanquili: --Xijhuica nopa cuatopili tlen ica tijmaquili nopa atemitl Nilo. Huan xiya huan ximotlali iniixtla ni tlacame para titlayacanas. Huan xiquinhuica mohuaya sequin nopa huehue tlacame tlen quihuicaj tequitl ica israelitame, huan xiya. 6Huan na nimitzchixtos campa nopa tetl nechca tepetl Horeb. Huan xijmaquili nopa tetl huan nopona quisas atl para ma atlica nochi ni israelitame. Huajca Mois'es queja nopa quichijqui iniixpa nopa huehue tlacame tlen nopa israelitame. 7Huan quitocajti nopa lugar Masah. (Masah quinequi quiijtos Campa Quiyejyecojque TOTECO Para Ma Quinmicti.) Huan nojquiya quitocajti Meriba. (Meriba quinequi quiijtos Tlanajnanquilistli.) Queja nopa quitocajti pampa nopona nopa israelitame tlanajnanquilijque huan quiyejyecojque TOTECO huan quiijtojque: "¿Itztoc TOTECO tohuaya o axaca?" 8Huan hualajque nopa amalecitame huan pejque quintehu'iaj nopa israelitame ipan Refidim. 9Huan Mois'es quiilhui Josu'e: --Xiquintlapejpeni tlacame huan xiquintehuitij nopa amalecitame. Huan mostla na nimoquetzas tlachiquiltipa ica icuatopil Toteco nomaco. 10Huan Josu'e huan nopa tlacame quichijque tlen Mois'es quinnahuati, huan quintehuitoj nopa amalecitame. Huajca Mois'es, Aar'on huan Hur tlejcoque tlachiquiltipa para quintlachilise. 11Huan quema Mois'es quitlalanayaya ima, nopa israelitame tlatlaniyayaj, pero quema quitemohuiyaya ima, nopa amalecitame tlatlaniyayaj. 12Huan teipa Mois'es macuatic. Huajca quicuique se tetl para ipan mosehuis huan Aar'on ihuaya Hur quimatlanantoyaj. Se moquetzqui ica inejmatl huan se ica iarraves. Huajca san queja nopa Mois'es huelqui quiijiyohui ica ima huejcapa hasta quema calajqui tonati. 13Huan yeca Josu'e quintlamimicti nopa amalecita soldados ica imachete. 14Huan TOTECO quiilhui Mois'es: --Xiquijcuilo ni tlajtoli ipan se amatl tlen huejcahuas para ma quiilnamiquica nopa israelitame para nochipa, huan nojquiya xijyolmelahua Josu'e tlen ya ni. Na niquintlamiltis nochi nopa amalecitame ipan ni tlaltepactli huan axaca quinilnamiquis. 15Huan Mois'es quichijqui se tlaixpamitl tlen quitocajti: "TOTECO Itztoc Queja Se Bandera Tlen Techyacana." 16Huan Mois'es quiijto: "Queja se bandera tomaco, Toteco techyacana ma titlatlanica. Pampa nopa amalecita tlacame motlalantoque iixtla TOTECO, yajaya quintehuis para nochipa."

will be added

X\