Exodus 11

1Huan TOTECO quiilhui Mois'es: --Noja nijhualicas seyoc tlatzacuiltili ipan Fara'on huan nopa egiptome. Huan teipa ax san inmechcahuas xiyaca, pero quena, hasta inmechtojtocas. 2Ama xiquinilhui israelitame para monequi nochi tlacame huan sihuame ma quintlajtlanica inincalnechcahua tlamantli tlen oro huan plata. 3Huan TOTECO quichijtoya para nopa egiptome ma quincualitaca israelitame. Huajca quinmajmacaque nopa israelitame tlen quintlajtlaniyayaj. Nojquiya nopa tequihuejme tlen quipalehuiyayaj Fara'on quitlepanitayayaj Mois'es huan nochi egiptome nojquiya quicualitayayaj. 4Huajca Mois'es quiilhui Fara'on: --TOTECO quiijtohua para tlajco yohual yajaya panos ipan nochi tlali Egipto, 5huan quinmictis nochi imoachtohui ejca conehua ipan nochi imochajchaj nochi inEgipto ehuani. Miquis moachtohui ejca ta tiFara'on tlen timosehu'ia ipan nopa siya yejyectzi campa titlanahuat'ia huan hasta miquis iachtohui ejca sesen sihua tlatequipanojquetl tlen tisi para iteco. Nojquiya miquise nochi iniachtohui ejcahua imotlapiyalhua. 6Ipan nochi tlali Egipto, tlacame ayijtise chicahuac queja ax quema quichijtoque, huan queja ayoc quema quichihuase sampa. 7Pero campa itztoque israelitame, niyon se chichi ax tlaajhuas huan ax miquis niyon se tlacatl o tlapiyali. Huajca Fara'on ta tijmatis para TOTECO nel'ia quinicnel'ia israelitame. 8Huan hualase nechitaquij nochi ni tequihuejme tlen mitzpalehu'iaj huan motlancuaquetzase noixtla para nechilhuise chicahuac para ma tiyaca ininhuaya nochi totlacajhua. Huan quema panos ya nopa, huajca quena, niyas. Huan Mois'es quisqui iixtla Fara'on nelcualantoc. 9Huan TOTECO ya quiilhuijtoya Mois'es: --Nopa Fara'on ax inmechtlacaquilis, huan yeca queja nopa nijchihuas noja m'as huejhueyi chicahualnescayotl ipan Egipto para niquinnextilis nohueyi chicahualis. 10Huajca yonque Mois'es ihuaya Aar'on quichijque nochi ni huejhueyi chicahualnescayotl iixtla Fara'on, TOTECO quichijtoya ma moyoltetili Fara'on huan yeca ax quincahuili ma quisaca nopa israelitame tlen tlali Egipto.

will be added

X\