Exodus 10

1Huan TOTECO quiilhui Mois'es: --Xiya xiquitati Fara'on pampa na nijchijtoc para ya ihuaya itequihuejcahua ma moyoltetilica para huelis nijchihuas ni huejhueyi tlanextilijcayotl tlen nijchihua iniixpa. 2Huan yeca se tonal ta huelis tiquinpohuilis moconehua huan moixhuihua nopa huejhueyi tlamantli tlen nijchijqui iniixpa Egipto ehuani. Quena, niquinyoltetilijtoc para xijmatica para na niDIOS, niimoTECO. 3Huajca Mois'es huan Aar'on yajque quiitatoj Fara'on huan quiilhuijque: --TOTECO Dios tlen tihebreo tlacame tiquixmatij mitztlajtlan'ia hasta quema timoechcapanos iixtla. Quiijtohua monequi xiquincahua ma yaca itlacajhua para ma quihueyichihuatij. 4Quiijtohua intla ax tijchihuas, mostla quichihuas ma hualaca chapolime ipan motlal. 5Huan nopa chapolime quitemitise ni tlali hasta ayoc nesis tlalchi. Quicuase tlen quentzi mocahua ama tlen inquitojque tlen ax nenpolijqui ica tesihuitl. Huan nopa chapolime quicuase nochi cuatini tlen mocahua. 6Temise ipan mochaj huan ininchajchaj motequipanojcahua huan nochi sequinoc Egipto ehuani. Ipan nochi ininyolis, imotatahua niyon imohuejcapan tatahua tlen huejcajquiya itztoyaj ax quema quiitztoque se tlamantli queja tlen ama nijchihuas. Quema Mois'es tlanqui camati, moicancuepqui huan quisqui tlen ichaj Fara'on. 7Huan itequihuejcahua Fara'on quiilhuijque: --¿Hasta quema ni tlacatl noja techcuesolmacas? Xiquincahua ma yaca nopa tlacame ma quihueyichihuatij ininTECO Dios. ¡Ay Tlanahuatijquetl! ¿Aya tiquita para totlal Egipto ya tlamixolejtoc? 8Huan Fara'on tlatitlanqui sampa ma quinnotzatij Mois'es huan Aar'on huan quinilhui: --Xiyaca xijhueyichihuatij imoTECO Dios. Pero achtohui xinechilhuica ajqueya inijuanti tlen yase. 9Huan Mois'es tlananquili: --Monequi nochi tiyase. Yase topilconehua hasta tohuehue tlacajhua. Yase totelpocahua, toichpocahua, nochi toborregojhua huan nochi tohuacaxhua, pampa tijchihuase se hueyi ilhuitl para TOTECO. 10Pero Fara'on quinilhui: --Tlanemijya nesi para ax ya nopa tlen inquichihuase. ¿Inmoilhu'iaj para na nimechcahuas inyase ininhuaya nochi imosihuajhua huan imoconehua huan para imoTeco yas imohuaya? 11¡Axtle! ¡Ax quej nopa elis! Xiyaca san intlacame para xijhueyichihuatij imoTECO, pampa ya nopa tlen inquiijtohuaj inquinequij. Huan itlapalehuijcahua quintojtocaque Mois'es huan Aar'on iixtla Fara'on. 12Huan TOTECO quiilhui Mois'es: --Xijxitlahua moma ipan tlali Egipto para ma hualaca chapolime huan ma quitemitica. Ma quicuaca nochi tlatoctli huan nochi tlen mocajqui quema huetzqui tesihuitl campa hueli ipan inintlal. 13Huan yeca Mois'es quixitlajqui ima ipan tlali Egipto, huan TOTECO quichijqui ma huala se ajacatl campa quisa tonati huan quiilpitzqui nopa tlali se tonal huan se yohuali. Huan hualmostla nopa ajacatl ya quinhualicatoya chapolime. 14Huan nopa chapolime calajque campa hueli ipan inintlal. Ax quema oncatoya imiyaca chapolime queja nopa ipan se tlali, niyon ayoc quema oncas. 15Quitemitijque nopa tlali hasta ax nesiyaya tlalchi, huan quicuajque nochi tlatojtoctli huan nochi cuatlactli tlen mocajtoya ipan cuatini tlen momanahuijtoya quema huetzqui tesihuitl. Ax tleno tlen xoxohuic mocajqui ipan nochi tlali Egipto, niyon ipan cuatini, niyon ipan mila. 16Huajca Fara'on tlatitlanqui nimantzi ma quinnotzatij Mois'es huan Aar'on huan quinilhui: --Nitlajtlacolchijtoc ica imoTECO Dios huan ica imojuanti, 17pero nimechtlajtlan'ia para san ni huelta xinechtlapojpolhuica notlajtlacol. Huan ximomaijtoca ica imoTECO Dios nopampa na para ma nechtlalcahui ni tlatzacuiltili tlen techmict'ia. 18Huan Mois'es quisqui ichaj Fara'on huan momaijto ica TOTECO ipampa ya. 19Huan TOTECO quipatlac iojhui nopa ajacatl, huan mocuepqui se chicahuac ajacatl campa temo tonati huan quinhuicac nopa chapolime huan quinmajcajqui ipan Hueyi Atl tlen itoca Chichiltic. Huan ax mocajqui ipan Egipto niyon se chapoli. 20Pero TOTECO quichijqui para Fara'on ma moyoltetili huan ma ax quincahuili ma yaca nopa israelitame. 21Huajca TOTECO quiilhui Mois'es: --Xijxitlahua moma para elhuicac, huan ipan nochi tlali Egipto ma onca se tzintlayohuilotl tlen nelyayahuic huan tilahuac hasta huelis tiquitzquis. 22Huajca Mois'es quitlalanqui ima para elhuicac, huan oncac se tzintlayohuilotl nelhueyi ipan tlali Egipto. 23Para eyi tonali axaca hueliyaya moitaj se ica seyoc ipan nopa tzintlayohuilotl huan axaca quisqui ipan ichaj. Pero ipan nochi ininchajchaj israelitame oncayaya tlahuili. 24Huajca Fara'on tlatitlanqui ma quinotzatij Mois'es huan quiilhui: --Xiyaca xijhueyichihuatij imoTECO, huan xiquinhuicaca nojquiya imoconehua, pero ma mocahuaca nica imoborregojhua ininhuaya imohuacaxhua. 25Pero Mois'es tlananquili: --¡Ax tihuelise! Monequi titechcahuilis ma tiquinhuicaca nopa tlapiyalime para nopa tlacajcahualistli tlen tijtlatise para tijmacase TOTECO Dios. 26Huajca nojquiya totlapiyalhua yase tohuaya. Niyon se tlapiyali ax hueli tijcajtehuase pampa monequi tiquintlapejpenise sequin inijuanti tlen titemacase quema tijhueyichihuase TOTECO Dios. Huan ax tijmatise tlaque tlapiyalime tiquintequihuise hasta tiajsise nepa. 27Pero TOTECO quichijqui para Fara'on ma moyoltetili huan ma amo quincahuili ma yaca. 28Nojquiya Fara'on quiilhui Mois'es: --Xinechtlalcahui huan xijpiya cuidado para ayoc tinechixtlachiliqui sampa. Ipan nopa tonal quema timonextiqui noixtla, timiquis. 29Huan Mois'es tlananquili: --Cuali tlen tiquijtojtoc. Ayoc quema nimitzitas sampa.

will be added

X\